မဇ္ဈိမ
တပ်မတော်၊ ပြည်သူ့စစ်တပ်ဖွဲ့ဝင်များ၊ နယ်ခြားစောင့် တပ်ဖွဲ့ဝင်များ၊ မြန်မာနိုင်ငံ ရဲတပ်ဖွဲ့ဝင်များနှင့် ဒေသခံ ဘိန်းစိုက်တောင်သူများ ပူးပေါင်းကာ ကချင်ဒေသတွင်း စိုက်ပျိုးထားသည့် ဘိန်းစိုက်ခင်းများကို ဖျက်စီးသွားမည်ဟု တပ်မတော်ပိုင် မြဝတီသတင်းစာက မတ်လ ၃ ရက်တွင် ရေးသားထားသည်။ ကချင်ပြည်နယ် ဝိုင်းမော်မြို့နယ် ကန်ပိုက်တီဒေသရှိ ဝေမိုးရွာနှင့် ထန်းမိုခမ်း ပတ်ဝန်းကျင်တွင်လည်း ဖေဖေါ်ဝါရီ ၂၉ ရက်တွင် တပ်မတော်သားများ၊ ပြည်သူ့စစ်တပ်ဖွဲ့ဝင်များ၊ နယ်ခြားစောင့် တပ်ဖွဲ့ဝင်များ၊ မြန်မာနိုင်ငံ ရဲတပ်ဖွဲ့ဝင်များနှင့် ဒေသခံများ ဘိန်းစိုက်ဧက ငါးဧကကို လူအင်အား ၃၅၀ ဖြင့်ဖျက်ဆီးခဲ့သည်ဟု ဆိုသည်။
အလားတူ မတ်လ ၁ ရက်တွင် ထိန်းမိုခမ်းကျေးရွာတစ်ဝိုက်ရှိ ဘိန်းစိုက်ဧက ၁၂ ဧကကို အင်အား ၅၀၀ ဖြင့် ဖျက်ဆီးခဲ့သည်ဟုလည်း ဆိုသည်။ အလားတူ ရှမ်းပြည်နယ်တောင်းပိုင်း ပအိုဝ်းကိုယ်ပိုင် အုပ်ချုပ်ခွင့်ရ ဒေသ ဟိုပုံးမြို့နယ်အတွင်း ကျေးရွာအုပ်စု ခြောက်စုအတွင်း စိုက်ပျိုးထားသည့် ဘိန်းခင်း စိုက်ဧက ၆၅ ဧက ကို မြို့နယ် ရဲတပ်ဖွဲ့မှူး ရဲမှူး မောင်မောင်ဝင်းနှင့် ရဲတပ်ဖွဲ့ဝင်များက ဖျက်ဆီးခဲ့သည်ဟု မတ်လ ၃ ရက်ထုတ် ကြေးမုံ သတင်းစာတွင် ရေးသားထားသည်။
ကချင်ပြည်နယ်အတွင်း ၂၀၁၅ ခုနှစ် ဒီဇင်ဘာ ၂၉ ရက်မှ ၂၀၁၆ ခုနှစ် မတ်လ ၁ ရက်အထိ ပူတာအို၊ ဆွမ်ဘရာဘွမ်ဒေသ၊ ချီဖွေပန်ဝါဒေသ၊ မိုးမိတ်ဒေသ၊ တနိုင်းဒေသ၊ ဆဒုံး ကန်ပိုက်တီဒေသတို့တွင် စိုက်ပျိုးထားသည့် ဘိန်းခင်း စိုက်ပျိုးဧက ပေါင်း ၁၇၈၁ ဧက ကို ဖျက်ဆီးခဲ့ပြီးဖြစ်သည်ဟုလည်း မြဝတီ သတင်းစာက ရေးသားသည်။ ရှမ်းပြည်နယ်အတွင်းတွင်မူ ၂၀၁၅-၂၀၁၆ ဘိန်းဖျက်ရာသီတွင် ဘိန်းခင်းစိုက် ဧကပေါင်း ၃၈၇၇ ဧက ကို ဖျက်ဆီးခဲ့သည်ဟုလည်း မတ်လ ၃ ရက်ထုတ် ကြေးမုံသတင်းစာတွင် ရေးသားထားသည်။
No comments:
Post a Comment