ကမ္ဘာကျော် ဖော်ကျူး (Fortune) မဂ္ဂဇင်းက ရွေးချယ်တဲ့ ကမ္ဘာ့အကြီးကျယ်ဆုံး ခေါင်းဆောင်စာရင်းမှာ လာမယ့်အစိုးရသစ်အဖွဲ့ နိုင်ငံခြားရေးဝန်ကြီးအဖြစ် သတင်းပြေးနေသူ ဒီမိုကရေစီကြယ်ပွင့် ဒေါ်အောင်ဆန်းစုကြည်ဟာ တတိယနေရာမှာ ရှိနေတယ်လို့ ဖော်ပြခံခဲ့ရပါတယ်။
အသက် ၇၀ အရွယ် ရှိနေပြီဖြစ်တဲ့ ဒေါ်အောင်ဆန်းစုကြည်ဟာ အမေဇုန်ဝက်ဘ်ဆိုက် တည်ထောင်သူ စီးပွားရေးလုပ်ငန်းရှင် ဂျက်ကော့ဘ်ဘက်ဇော့နဲ့ ဂျာမနီဝန်ကြီးချုပ် အန်ဂျလာမာကဲလ်တို့ရဲ့ နောက် တတိယနေရာမှာ ရှိနေတာဖြစ်ပါတယ်။
ဒေါ်အောင်ဆန်းစုကြည်ဟာ မြန်မာနိုင်ငံရဲ့ ဒီမိုကရေစီရရှိရေး လမ်းကြောင်းတလျှောက်မှာ ကြံ့ကြံ့ခံရပ်တည်ခဲ့ပြီး ဆယ်စုနှစ်ချီကြာအောင် နေအိမ်အကျယ်ချုပ်ဘ၀နဲ့ နေထိုင်ခဲ့ရသူတဦးအဖြစ် ကျော်ကြားခဲ့ပါတယ်။
ဖော်ကျူးမဂ္ဂဇင်းက ဒေါ်အောင်ဆန်းစုကြည်ဟာ မတရားသဖြင့် အုပ်ချုပ်ဖိနှိပ်မှုအောက်မှာ နှစ်ပေါင်း ၃၀ နီးပါး အတိုက်အခံအဖြစ် ရပ်တည်ခဲ့သူဖြစ်တယ်လို့ ရည်ညွှန်း ဖော်ပြခဲ့တာပါ။
ပြီးခဲ့တဲ့ ရွေးကောက်ပွဲမှာတော့ သူနဲ့ ကာလရှည် လက်တွဲတိုက်ပွဲဝင်ခဲ့သူ ဦးထင်ကျော်က နိုင်ငံတော်သမ္မတ ဖြစ်လာခဲ့ပြီး နှစ်ပေါင်း ၅၀ ကျော်ကာလအတွင်း ပထမဆုံး အရပ်သားအစိုးအဖြစ် ဖွဲ့စည်းနိုင်ခဲ့တာပါ။
ဖော်ကျူးမဂ္ဂဇင်းရဲ့ ခုလိုရွေးချယ်မှုဟာ ကမ္ဘာတလွှားမှ စီးပွားရေး၊ နိုင်ငံရေး၊ အနုပညာနဲ့ ပရဟိတလုပ်ငန်းတွေမှာ စွမ်းစွမ်းတမံ လုပ်ကိုင်နေကြပြီး တခြားသူတွေအတွက် စံပြဖြစ်စေတဲ့ ကမ္ဘာကို ပြောင်းလဲစေနိုင်တဲ့ အမျိုးသား၊ အမျိုးသမီး ၅၀ ကို ရွေးချယ်တာမျိုး ဖြစ်ပါတယ်။
No comments:
Post a Comment