ဇော်ခမ်းဟိန်း
ရှမ်းပြည်နယ်တောင်ပိုင်း၊ ပင်းတယမြို့နယ် ပွေးလှကျေးရွာအုပ်စုတွင် ယခင်နှစ်များထက် စောစီးစွာ ရေကန်များ ခမ်းခြောက်မှုကြောင့် သောက်သုံးရေ အခက်အခဲဖြစ်နေ ရသည်ဟု ဒေသခံများက ပြောကြားသည်။ ပွေးလှကျေးရွာအုပ်စုအတွင်းရှိ ရှောက်ပင်ရွာ၊ ပွင့်လန်းရွာ၊ ၀ါထရာရွာတို့ စုပေါင်းအားထား အသုံးပြု သော တောင်ကျရေအိုင်နှင့် စိမ့်စမ်းရေထွက်ကန်တို့မှာ ဖေဖော်ဝါရီလ နောက်ဆုံးအပတ်မှစတင် ခမ်းခြောက်သွားပြီး သောက်သုံးရေအတွက် ၃ မိုင်ခန့်ဝေးသော စက်ရေတွင်းရှိသည့် ပွေးလှရွာသို့ နွားလှည်း၊ ထော်လာဂျီ၊ ဆိုင်ကယ်များဖြင့်ရေ၀ယ်ယူသုံးစွဲနေရသည်ဟု ရှောက်ပင်ရွာမှ ရပ်မိရပ်ဖ တစ်ဦးဖြစ်သူ ဦးထွန်းကြိုင်ကပြောသည်။
''ပုံးဝါ(ရေ ၂၀ လီတာဆန့်ပုံး) တစ်ပုံးကို တစ်ရာ၊ နှစ်ရာကျပ်ပေးဝယ်ရတယ်။ ခါတိုင်းနှစ်တွေလဲ ခမ်းတယ်ဆိုပေမယ့် ဒီနှစ်စောပြီးခမ်းကုန်တယ်၊ ဌာနဆိုင်ရာက ရေကန်ကို နှုန်းတွေလာဆယ်ပေး ပေမယ့် မိုးမရွာတော့ ဘာမှလုပ်လို့မရဘူး။ အဘတို့လို့ မရှိဆင်းရဲသားတွေ နေ့စဉ် ရေ၀ယ်သုံးနေရ တော့ ဘယ်လိုမှအဆင်မပြေဘူး။'' ဟု ၄င်းကဆိုသည်။
ဒေသခံတစ်ဦးဖြစ်သူ ဦးအောင်ဖေ ကလည်း ဖြစ်နိုင်ပါက စက်ရေတွင်းများတူးပေးလျှင် အဆင်ပြေ မည်ဖြစ်ပြီး ရွာသုံးရွာအသုံးပြုနေသော တောင်ကျရေအိုင်မှာ ကျွဲ၊ နွားများအတွက်သာ အသုံးဝင်တော့ သည်ဟုပြောကြားသည်။ သောက်သုံးရေခက်ခဲလျှက်ရှိသော ရှောက်ပင်ရွာတွင် အိမ်ခြေ ၁၇၀၊ လူဦးရေ(၇၄၀)ခန့်၊ ၀ါထရာရွာတွင် အိမ်ခြေ ၁၂၀၊ လူဦးရေ(၅၉၀)ခန့်၊ ပွင့်လန်းရွာတွင် အိမ်ခြေ ၂၀၀၊ လူဦးရေ(၈၇၀)ခန့်ရှိပြီး ဓနု၊ တောင်ရိုး၊ ပအိုဝ့်၊ ရှမ်း လူမျိုးတို့စုပေါင်းနေထိုင်ကြသည်။
ပြီးခဲ့သည့် ဇန်န၀ါရီလ ကုန်ပိုင်းကလည်း ရှမ်းပြည်နယ်တောင်ပိုင်း ညောင်ရွှေမြို့နယ်အတွင်း လက်မောင်းကွေးကျေးရွာအုပ်စုတွင် အချိန်အခါမဟုတ် ရေခန်းခြောက်မှုကြောင့် ဒေသခံများအတွက် ယနေ့ထိရေအလှူရှင် လိုအပ်လျှက်ရှိသည်။ ပွေးလှကျေးရွာအုပ်စုအတွင်းရှိ ရေခမ်းခြောက်မှု အခြေအနေအား အကူအညီပေးရန် သွားရောက် ကြည့်ရှုခဲ့သော တောင်ရိုးစာပေနှင့်ယဉ်ကျေးမှုအသင်းလူငယ်အထောက်ကူပြုအဖွဲ့မှ ဦးအောင်ဆန်းက ရှောက်ပင်ရွာ၊ ပွင့်လန်းရွာ၊ ၀ါထရာရွာတို့စုပေါင်းသုံး ရေကန်များခမ်းခြောက်သွားပြီး အနီးအနားရှိ ကျားကုန်းရွာ၊ ဒီပေရွာ၊ ကြိမ်တောရွာ၊ စင်္ကြာတောရွာနှင့် အခြားရွာများလည်း ခမ်းစပြုနေသည် ကိုမြင်တွေ့ခဲ့ရသည်ဟု မဇ္ဈိမသို့ပြောသည်။
သောက်သုံးရေနှင့်ပတ်သက်ပြီး အခက်ခဲရှိပါက သက်ဆိုင်ရာမြို့နယ် ကျေးလက်ဒေသဖွံ့ဖြိုးတိုးတက် ရေးဦးစီးဌာနများသို့ ဆက်သွယ်အကူအညီတောင်းနိုင်ကြောင်း ပြည်နယ်နှင့်တိုင်းအလိုက် ညွှန်ကြားရေးမှူးများ၏ ဖုန်းနံပါတ်များထုတ်ပြန်ထားသော်လည်း မဇ္ဈိမက ဆက်သွယ်မေးမြန်းရာ ပြန်လည်ဖြေဆိုခြင်းမရှိပေ။
No comments:
Post a Comment