ရခိုင်ပြည်လွတ်မြောက်ရေးတပ်မတော် (ALA) မှ ရဲဘော် တစ်ဦးသည် ဘင်္ဂလာ-မြန်မာ နယ်စပ် အမှတ် ၂ မိုင်တိုင် အနီးတွင် အောက်တိုဘာလ ၂၆ နေ့က မိုင်းနင်းမိပြီး ခြေထောက် နှစ်ဘက်လုံးတွင် ဒဏ်ရာ ရရှိခဲ့သည်ဟု သိရသည်။
ဒဏ်ရာရသူ ရဲဘော် ခိုင်ပိုင်သိန်းကို နယ်စပ်မှ တစ်ဆင့် စစ်တွေမြို့ ဆေးရုံသို့ယူဆောင်လာပြီး ဆေးကုသမှု ခံယူနေသည်ဟု သိရသည်။
“ ဘင်္ဂလားနယ်ခြားစောင့်တပ်နဲ့ တိုက်ပွဲဖြစ်ပွားခဲ့တဲ့ နေရာကို ၀င်ရှင်းပြီး ပြန်အဆုတ်မှာ မိုင်းနင်း မိပါတယ်။ မိုင်းက တအား ပြင်းထန်ပါတယ်။ ခြေထောက်တစ်ဘက် ဒူးခေါင်းအထက်ကနေ ဖြတ်ပစ်ခဲ့ရပြီး၊ နောက်တစ်ဘက်လည်း ဒဏ်ရာ ရခဲ့ပါတယ်”ဟု ALA တပ်မှူး ခိုင်စိုးမြက နိရဉ္စရာ သတင်းဌာနသို့ ပြောသည်။
ရခိုင်ပြည်လွှတ်မြောက်ရေး တပ်မတော်နှင့် ဘင်္ဂလာဒေ့ရှ် စစ်တပ်အကြား နယ်စပ်တွင် တိုက်ပွဲ ဖြစ်ပွားသည်မှာ သုံးကြိမ်ရှိပြီ ဖြစ်ကြောင်း ကျောက်တော်ပြန်ကြားရေး ရုံးတာဝန်ခံ ခိုင်ရဲလင်းက ပြောသည်။
“အိန္ဒိယ၊ မြန်မာ၊ ဘင်္ဂလားဒေ့ခ်ျ ဆုံရာအနီး အမှတ် ၂ မိုင်တိုင်အနီးမှာ ကျွန်တော်တို့ နေရာယူထားတာကို လာတိုက်တာပါ။ တိုက်ပွဲဖြစ်တော့ စစ်ကူသွားပေးတဲ့အခါ ကျွန်တော်တို့ဘက်က ဆေးမှူး ခိုင်စိုးပိုင် ကျသွား ပါတယ်။ ယခု တစ်ကြိမ်နဲ့ဆိုရင် တိုက်ပွဲဖြစ်ပွားတာ သုံးကြိမ်ရှိပြီ၊ မိမိတို့ဘက်က တစ်ဦးကျ၊ ၄ ဦး ဒဏ်ရာ ရထားပါတယ်။ ၂ ဦးက မိမိတို့ ဗဟိုဌာနချုပ်မှာ ဆေးကုသမှု ခံယူနေပါတယ်” ဟု သူက ဆိုသည်။
ALA မှ ရဲဘော်များသည် ယခင်တိုက်ပွဲဖြစ်ပွားခဲ့သော နေရာမှ ဆုတ်ခွာလာကြပြီဟု သိရသည်။
ယခင် ဒဏ်ရာရရှိခဲ့သူ ခိုင်နီမင်း သည်လည်း စစ်တွေဆေးရုံတွင် ဆေးကုသ ခံယူနေရဆဲ ဖြစ်သည်ဟု သိရသည်။
No comments:
Post a Comment