၂၀၁၅ နိုဝင်ဘာလ ၈ ရက်နေ့က ကျင်းပခဲ့သော ပါတီစုံ အထွေထွေ ရွေးကောက်ပွဲတွင် အရှုံးနှင့် ရင်ဆိုင်ခဲ့ရသော်လည်း ရွေးကောက်ပွဲ ရလဒ် အပေါ် ကျေနပ်ကြောင်း စစ်တွေမြို့နယ်မှ လွှတ်တော် ကိုယ်စားလှယ်များက ပြောသည်။
စစ်တွေမြို့နယ် ပြည်သူ့လွှတ်တော်နေရာကို တိုင်းရင်းသားစည်းလုံးညီညွတ်ရေးပါတီကို ကိုယ်စားပြုပြီး ၀င်ရောက် အရွေးခံပြီး ရှုံးနိမ့်ခဲ့သည့် ဒေါ်လှအေးက ရွေးကောက်ပွဲ ရလဒ်အပေါ် ကျေနပ်ကြောင်းနှင့် ရခိုင်အမျိုးသားပါတီ အနိုင်ရရှိသွား၍ ၀မ်းသာကြောင်း နိရဉ္စရာသတင်းဌာနသို့ ပြောသည်။
“ကျေနပ်မှုရှိပါတယ်။ ပြည်သူတွေက ကျွန်မတို့ ကွင်းဆင်းကတည်းက ရခိုင်ပါတီကိုဘဲ ဦးစားပေးနေတာပါ။ ရခိုင်ဆိုရင် ရခိုင်ပဲဖြစ်ရမှာပေါ့။ ကျွန်မတို့သာ ရခိုင်ပါတီကို ကိုယ်စားပြုပြီး ပြိုင်မယ်ဆိုရင် မဲပုံးလျှံထွက်အောင် ပေးမယ်လို့ မဲဆန္ဒရှင်ပြည်သူတွေက ပြောပါတယ်” ဟု သူမက ဆိုသည်။
ရွေးကောက်ပွဲအတွင်း တစ်စုံတစ်ရာ အခက်အခဲများ ကြုံတွေ့ခဲ့ရပါလားဟု မေးမြန်းရာ “ သိပ်တော့ မရှိပါဘူး။ စစ်တွေမြို့နယ် အမှတ် (၁) မဲဆန္ဒနယ်မြေ သင်ပုန်းတန်းကျေးရွာ မှာတော့ မဲရုံ ပရ၀ုဏ် အတွင်းကို မဲရုံမှူးက ကျွန်မတို့ လွှတ်တော် ကိုယ်စားလှယ်တွေကို ၀င်ရောက်ခွင့် မပြုခဲ့ပါဘူး။ ဒီလို ပြသနာအချို့တော့ ကြုံတွေ့ ခဲ့ရတာ ရှိပါတယ်” ဟု သူမက ပြောဆိုသည်။
အမျိုးသားဒီမိုကရေစီ အဖွဲ့ချုပ်ကို ကိုယ်စားပြုပြီး စစ်တွေမြို့နယ်မှ ၀င်ရောက် အရွေးခံခဲ့သည့် ဦးသင်္ခါကျော်ကလည်း အရှုံးနှင့် ကြုံတွေ့ခဲ့သော်လည်း ရွေးကောက်ပွဲရလဒ်အပေါ် ကျေနပ်မှုရှိကြောင်း ပြောဆိုသည်။
“ကျွန်တော်တို့အနေနဲ့လည်း ကျေနပ်ပါတယ်။ဒီလောက်မဲရတာကိုတောင် ကျေးဇူးတင်ရအုံးမယ်။ အစကတည်းက စစ်တွေမြို့ပေါ်မှာ အနိုင်မရဘူးဆိုတာကို သိပြီးသားပါ။ NLD ပါတီအနေနဲ့ တစ်ပြည်နယ်လုံး အတိုင်းအတာနဲ့ ၀င်ရောက်အရွေးခံရမယ် ဆိုလို့သာ အရွေးခံတာပါ”ဟု ဦးသင်္ခါကျော်က နိရဉ္စရာသတင်း ဌာနသို့ ပြောသည်။
ကြံ့ခိုင်ရေးနှင့် ဖွံ့ဖြိုးရေး ပါတီကို ကိုယ်စားပြုပြီး စစ်တွေမြို့နယ် ပြည်သူ့လွှတ်တော်နေရာက ၀င်ရောက် ယှဉ်ပြိုင်သော ဒေါက်တာ ကျော့သာစိန်ကမူ ရွေးကောက်ပွဲရလဒ် အပေါ်တွင် ကျေနပ်မှုရှိသော်လည်း လွှတ်တော်ကိုယ်စားလှယ်များ၏ အရည်အချင်းကို မကြည့်ဘဲ ရခိုင်ပါတီဆိုလျှင် ထောက်ခံမဲပေးသည့် အပေါ်၌ အားမလိုအားမရ ဖြစ်မိသည်ဟု ပြောဆိုသည်။
“ကျွန်မအနေနဲ့ ရခိုင်ပြည်နယ်မှာ တစ်ခါမှ ရွေးကောက်ပွဲနဲ့ မကြုံဖူးပါဘူး။ ဒီရခိုင်ပြည်နယ်မှာကတော့ ရခိုင်ပြည်သူတွေရဲ့ စိတ်ထဲမှာက အစွဲတစ်ခုတော့ ရှိနေကြတယ်။ ရခိုင်ဆိုရင် ရခိုင်သားပါတီကိုပဲ မဲပေးရမယ် ဆိုတဲ့ အစွဲ။ ဒီအစွဲဟာ ပါတီကို ကိုယ်စားပြုပြီးတော့ ၀င်ရောက်အရွေးခံတဲ့သူဟာ အရည်အချင်းရှိရဲ့လား၊ မရှိဘူးလား ဆိုတာကို မကြည့်ဘဲ မဲပေးခဲ့ကြတာတွေကို တွေ့ခဲ့ရတယ်။ ဒီအပေါ်မှာတော့ အားမလို အားမရ ဖြစ်မိပါတယ် ”ဟု သူမက ပြောသည်။
ဒေါက်တာ ကျော့သာစိန်သည် ရန်ကုန်၌မွေးပြီး ရန်ကုန်တွင် ကြီးပြင်းခဲ့သော်လည်း ရခိုင်ပြည်ကို ချစ်မြတ်နိုးပြီး ရခိုင်ပြည်နယ် အကျိုးကို သယ်ပိုးလိုသော ရည်ရွယ်ချက်ဖြင့် ရန်ကုန်ရှိ အိမ်နှင့်ခြံများကို ရောင်းချ၍ ရခိုင်သို့ ပြောင်းရွှေ့ အခြေချ နေထိုင်လာသူ တစ်ဦးဖြစ်သည်ဟု သိရသည်။
No comments:
Post a Comment