Saturday, February 27, 2016

လာဘ်ထိုးပြီး မူးယစ်ရောင်းဝယ်နေမှု လွှတ်တော်တွင် တင်ပြ

ထွန်းထွန်း


ကချင်ပြည်နယ်၊ ဖားကန့်မြို့နယ်အတွင်း သက်ဆိုင်ရာ အာဏာပိုင် အဖွဲ့အစည်းများသို့ တရက်လျှင် လိုင်းကြေးအနေဖြင့် သိန်း ၁၀၀ ကျော်ပေးကာ မူးယစ်ဆေးဝါး ရောင်းဝယ်မှုများ ရှိနေကြောင်း ဖာကန့်မြို့နယ် ပြည်သူ့လွှတ်တော် ကိုယ်စားလှယ် ဦးတင့်စိုးက ယနေ့ကျင်းပသည့် ပြည်သူ့လွှတ်တော် အစည်းအဝေးတွင် ဆွေးနွေး ပြောကြားခဲ့သည်။

“ဖားကန့်၊ လုံခင်းရွာထဲမှာ ဖမ်းမိခဲ့တဲ့အဖွဲ့က ရတဲ့စာရင်းတွေမှာ ၅၈ ရက်စာအတွက် သိန်း ၅ ထောင်ကျော် လိုင်းကြေး ပေးခဲ့ရတာ တွေ့ရတယ်။ သူတို့က ရေသန့်ဘူး ၀ယ်တာကအစ ထည့်မှတ်ထားတဲ့ စာရင်းဖြစ်လို့ စာရင်းက ခိုင်မာပါတယ်။ ဘယ်သူ့ကို ဘယ်လောက် ပေးရတယ်ဆိုတာလည်း ပါတယ်။ မူးယစ်ဆေး ရောင်းသူတွေနဲ့ သက်ဆိုင်တဲ့အဖွဲ့တွေ ဆိုတာကတော့ သူတို့ကို ဖမ်းဆီးမယ့်သူတွေနဲ့ မူးယစ်တားဆီးရေး အဖွဲ့တွေပဲ ရှိပါတယ်။ သူတို့ကို ဖမ်းခဲ့တာကလည်း Pat Jasan အဖွဲ့ကပါ” ဟု ဦးတင့်စိုးက ဧရာဝတီကို ပြောသည်။

ကချင်ပြည်နယ် ၀ိုင်းမော်မြို့နယ် ပြည်သူ့လွှတ်တော်ကိုယ်စားလှယ် ဦးလဂန်ဇယ်ဂျူံး တင်သွင်းသည့် ကချင်ပြည်နယ်ရှိ မူးယစ်ဆေးဝါးများ တိုက်ဖျက်ရာတွင် ပြည်သူလူထု၏ ပူးပေါင်းပါဝင် ဆောင်ရွက်မှုကို ကြိုဆို၍ ဟန့်တား နှောင့်ယှက်သူများ၏ အန္တရာယ်မှ ကာကွယ်ပေးရန်နှင့် ထိရောက်သော ကူညီဆောင်ရွက်မှုများ အမြန်ဆုံး ဆောင်ရွက်ပေးရန် ပြည်ထောင်စု အစိုးရကို တိုက်တွန်းကြောင်း အဆိုအား ထောက်ခံဆွေးနွေးရာတွင် ဦးတင့်စိုးက ထည့်သွင်း တင်ပြသွားခြင်း ဖြစ်သည်။

ထိုသို့ သက်ဆိုင်ရာဌာနများ၏ အဂတိ လိုက်စားမှုများကို အရေးယူ ဆောင်ရွက်မှုများ ပြုလုပ်ရန် တိုက်တွန်းခဲ့ပြီး ဖားကန့်မြို့နယ်အတွင်း ရေမဆေးကျောက် ရှာဖွေသည့် အလုပ်သမားဦးရေ ၈ သောင်းခန့်မှာလည်း မူးယစ်ဆေးဝါး သုံးစွဲမှုများ ရှိနေကြောင်း ဦးတင့်စိုးက လွှတ်တော်၌ တင်ပြဆွေးနွေးရာတွင် ပြောဆိုခဲ့သည်။

လက်ရှိအချိန်၌ ကချင်ပြည်နယ် ၀ိုင်းမော်၊ ဆဒုံး၊ ကန်ပိုင်တီ ဒေသများရှိ ဘိန်းခင်းများအား ဖျက်ဆီးရန် သွားရောက်ကြသည့် ကချင်လူထု အခြေပြု မူးယစ်တိုက်ဖျက်ရေးအဖွဲ့ (Pat Jasan) သည် ယနေ့နံနက်ပိုင်းက ဘိန်းခင်းများဆီသို့ သွားရာလမ်းတွင် ဗုံးခွဲတိုက်ခိုက်ခြင်း၊ သေနတ်ဖြင့် ပစ်ခတ်ခံရခြင်းတို့ကြောင့် လူ ၂၀ ဦးခန့် ဒဏ်ရာရရှိခဲ့ကြောင်း သိရသည်။

No comments: