“အတ္ထရံမြစ်ရယ် သံလွင်မြစ်ရယ် နောက် ဂျိုင်းမြစ်ရယ် မွန်ပြည်နယ်ဧရိယာအတွင်းက တင်ဒါပိုက်ချက်တွေကို တင်ဒါရောင်းချမယ်၊ ဇူလိုင်လ ၂၅ ရက်နေ့မှာ စတင်ရောင်းချမယ်၊ တင်ဒါကို ၅ ခါရောင်းချသွားမှာဖြစ်တယ်” ဟု မော်လမြိုင်ခရိုင် ငါးလုပ်ငန်းဦးစီးဌာန ခရိုင်ဦးစီးဌာနမှူး ဦးဝင်းမြင့်က ပြောသည်။
ရောင်းချမည့် အထူးတင်ဒါပိုက်ချက်များအနက် မော်လမြိုင်ခရိုင်အတွင်းရှိ မော်လမြိုင်မြို့နယ်တွင် ပိုက်ချက် ၅၀၊ ကျိုက်မရောတွင် ၂၀ ၊ မုဒုံတွင် ၃ ချက်နှင့် ချောင်းဆုံတွင် ပိုက်ချက် ၂၄ ချက်နှင့် သထုံခရိုင် ပေါင်မြို့နယ်တွင် ပိုက်ချက် ၅ ချက် စုစုပေါင်း ၁၀၂ ချက်ရှိသည်ဟု မော်လမြိုင်ခရိုင် ငါးလုပ်ငန်းဦးစီးဌာနမှ သိရသည်။
အထူးတင်ဒါပိုက်ချက် တင်ဒါရောင်းချခြင်းကို မွန်ပြည်နယ် ငါးလုပ်ငန်းဦးစီးဌာနရုံးတွင် ဇူလိုင်လ ၂၅ ရက်နေ့တွင် ကျင်းပသွားမည်ဖြစ်ကြောင်း တင်ဒါချက်အလိုက် ကြိုတင်ပေးသွင်းရမည့်ငွေများကိုလည်း ဇူလိုင်လ ၂၂ ရက်နေ့ နောက်ဆုံးထားကာ မြန်မာ့စီးပွားရေးဘဏ်(မော်လမြိုင်) သို့ ပေးသွင်းရမည်ဖြစ်ကြောင်း ငါးလုပ်ငန်းဦးစီးဌာနက ကြေညာထားသည်။
ငါးလုပ်ငန်းဦးစီးဌာနအနေဖြင့် ၂၀၁၆-၂၀၁၇ ခုနှစ် အထူးတင်ဒါပိုက်ချက်များ တင်ဒါရောင်းချခြင်းနှင့် ပတ်သက်သည့် တင်ဒါစည်းမျဉ်းစည်းကမ်းများကိုလည်း တင်ဒါဝယ်သူများ သိရှိနားလည်ရန်အတွက် ဇူလိုင်လ ၁၈ ရက်နေ့က ရှင်းလင်းခဲ့ပြီးဖြစ်သည်ဟု ဦးဝင်းမြင့်က ပြောသည်။
ပိုက်ချက်တင်ဒါဆွဲမည့် ရေလုပ်သားများအနေဖြင့် ငါးလုပ်ငန်းဦးစီးဌာနအနေဖြင့် ပိုက်ချက်တည်နေရာများကို မှန်ကန်သည့်အမှတ်အသားဖြင့် စနစ်တကျသတ်မှတ်ပေးစေခြင်ကြောင်း၊ ပိုက်ချက်တည်နေရာကြောင့် ပြဿနာဖြစ်မည်ကို စိုးရိမ်ကြောင်း ရေလုပ်သားတစ်ဦးက ပြောသည်။
၂၀၁၅-၂၀၁၆ ခုနှစ်လုပ်ငန်းရာသီမှာတော့ မွန်ပြည်နယ် မော်လမြိုင်ခရိုင်အတွင်းရှိ မော်လမြိုင်၊ ကျိုက်မရော၊ မုဒုံနှင့် ချောင်းဆုံမြို့နယ်တို့မှ စုစုပေါင်း ပိုက်ချက် ၉၈ ချက် တင်ဒါရောင်းချခဲ့ပြီး တင်ဒါရောင်းရငွေ စုစုပေါင်း ကျပ်သိန်းပေါင်း ၆၀ဝ၀ နီးပါးရရှိခဲ့သည်ဟု မော်လမြိုင်ခရိုင် ငါးလုပ်ငန်းဦးစီးဌာနရုံးမှ သိရသည်။
No comments:
Post a Comment