ရှမ်းပြည်နယ်အရှေ့ပိုင်း တာချီလိတ်မြို့နယ်အတွင်း ကျပ် သိန်း ၇၀၀ ခန့်ရှိ ဘိန်းဖြူနှင့် ရောင်စုံ စိတ်ကြွဆေးပြားများကို တရက်တည်း ၄ ကြိမ် ဖမ်းဆီးရမိကြောင်း တာချီလိတ်မြို့နယ် မူးယစ်ဆေးဝါး တားဆီးနှိမ်နှင်းရေး ပူးပေါင်း ရဲတပ်ဖွဲ့က သတင်း ထုတ်ပြန်သည်။
တာချီလိတ်မြို့နယ်တွင် ယခုလ ၅ ရက် နေ့လယ် ၁၂ ခွဲမှ ည ၇ နာရီအတွင်း မိုင်းဖုန်း (ခ) အုပ်စု၊ ဖန်မင်အုပ်စု၊ ဝိန်းကျောက် ရပ်ကွက်နှင့် ဆေခမ်း ရက်ကွက်တို့မှ မူးယစ်ဆေးဝါးများကို ဖမ်းမိခြင်းဖြစ်ပြီး မူးယစ်ဆေးဝါးများနှင့်အတူ တရားခံ ၈ ဦးကိုလည်း ဖမ်းဆီးရမိထားကြောင်း တာချီလိတ်မြို့နယ် မူးယစ်ဆေးဝါး တားဆီးနှိမ်နှင်းရေး အထူး ရဲတပ်ဖွဲ့ရုံး ဦးစီးမှူး ရဲအုပ် အောင်ကျော်စိုးက ဧရာဝတီကို ပြောသည်။
“သူတို့က တနေရာရာကိုပို့ဖို့အတွက် ပြင်ဆင်နေတာတော့ မဟုတ်ဘူး။ သူတို့ရှိပြီးသားဟာကို ရောင်းဖို့အတွက် နမူနာပြဖို့ လုပ်နေတဲ့ ပစ္စည်းတွေကို ကျနော်တို့က ဖမ်းဆီးရမိတာ။ ဝယ်လက်ကတော့ သာစည်မြို့နယ် နားယောင်း ကျေးရွာမှာ သွား စပ်ပြီးတော့မှ ဘယ်ကိုဆက်ပို့မယ်ဆိုတာတော့ သူတို့အစီအစဉ်ပေါ့”ဟုလည်း ရဲအုပ် အောင်ကျော်စိုးက ပြောပြသည်။
ဖမ်းဆီးရမိသူများတွင် အသက် ၂၃ နှစ်အရွယ်ရှိ ပက်တနာဘွန် (ခ) နီး အမည်ရ ထိုင်းနိုင်ငံသားတဦး ပါဝင်ပြီး ၎င်းကို ကာလတန်ဖိုး ကျပ် ၉ သန်းနီးပါး ရှိသည့် နီညိုရောင် စိတ်ကြွဆေးပြားများ၊ WY စာတန်းပါ လိမ္မော်ရောင် စိတ်ကြွဆေးပြား များ နှင့် အတူ တာချီလိတ်မြို့နယ်၊ မိုင်းဖုန်း(ခ) အုပ်စု၊ ဝှေလေလန် ပူးပေါင်း စစ်ဆေးရေးစခန်းတွင် ဖမ်းမိခဲ့ခြင်း ဖြစ်သည်ဟုလည်း ဆိုသည်။
ထိုင်းနိုင်ငံသား ပက်တနာဘွန် (ခ) နီး မောင်းနှင်လာသည့် ဆိုင်ကယ်ကို တားဆီးစစ်ဆေးရာ၌ ၎င်းဝတ်ဆင်ထားသော အတွင်းခံဘောင်းဘီနှင့် ပေါင်ခွကြားတွင် ရာဘာပူပေါင်းအတွင်း သိုဝှက်သယ်ဆောင်လာသည့် စိတ်ကြွဆေးပြားများကို တွေ့ရှိခဲ့ခြင်း ဖြစ်သည်ဟု မူးယစ်တပ်ဖွဲ့၏မှတ်တမ်းတွင် ဖော်ပြထားသည်။
ထို့နေ့ တရက်တည်းတွင် တာချီလိတ်မြို့နယ်၊ ဖန်မင်အုပ်စု၊ မယ်ယန်း ပူးပေါင်း စစ်ဆေးရေးစခန်းတွင် အသက် ၃၇ နှစ် အရွယ်ရှိ ကျော်နိုင်ထူး မောင်းနှင်လာသည့် Hilux Vigo အမျိုးအစား မော်တော်ယာဉ်အား ရပ်တန့်စစ်ဆေးရှာဖွေရာ ကာလ တန်ဖိုး ကျပ် ၅၆ သိန်းခန့်ရှိ ဘိန်းဖြူ ဘလောက်တုံးကို ဖမ်းဆီးရမိခဲ့သည်ဟု ရဲအုပ် အောင်ကျော်စိုးက ပြောသည်။
ဖမ်းဆီးရမိသည့်တရားခံများ၏ ထွက်ဆိုချက်အရ တာချီလိတ်မြို့ရှိ ဝိန်းကျောက် ရပ်ကွက်နှင့် ဆေခမ်း ရပ်ကွက်တို့မှ ကွင်းဆက် တရားခံများထံမှ ကျပ်သိန်း ၆၀၀ နီးပါးခန့်ရှိ ဘိန်းဖြူနှင့် ပန်းရောင်၊ အညိုရောင်၊ လိမ္မော်ရောင် ၊ အစိမ်းရောင် များ ရောနှာထားသည့် စိတ်ကြွဆေးပြားများ ဆက်တိုက်ဖမ်းဆီးနိုင်ခဲ့သည်ဟု သိရသည်။
တရက်တည်း ၇ နာရီအတွင်း ၄ ကြိမ် ဖမ်းဆီးရမိသည့် မူးယစ်ဆေးဝါးများနှင့်အတူ ဖမ်းဆီးရမိသည့်တရားခံ ၈ ဦးအား တာချီလိတ် မြို့မရဲစခန်းက မူး/စိတ် ပုဒ်မ ၁၅/၁၉(က)/၂၁ အရ အမှုဖွင့် ဆောင်ရွက်လျက် ရှိကြောင်း ရဲအုပ် အောင်ကျော်စိုး က ပြောသည်။
No comments:
Post a Comment