ရခိုင်ပြည်နယ် မင်းပြားမြို့တွင် တယ်လီနော ဆက်သွယ်ရေးကုမ္ပဏီက လှူဒါန်းသည့် ကယ်ဆယ်ရေး ပစ္စည်းများကို တင်ဆောင်လာသည့် စက်လှေတစ်စီးနစ်မြုပ်ရာ စက်လှေမောင်းသူမှာ ပျောက်ဆုံးနေကြောင်း သတင်း ရရှိသည်။
၎င်း ပျောက်ဆုံးနေသူမှာ ကုလားမတောင် ကျေးရွာမှ ဘဦးထွန်းလှ၏သား မောင်တင်ဝင်း (၃၇) နှစ် ဖြစ်သည်။
မင်းပြားမြို့သို့ တယ်လီနော ဆက်သွယ်ရေးကုမ္ပဏီက လှူဒါန်းသည့် ရေဘေး ကယ်ဆယ်ရေးပစ္စည်းများ ကို ထုတ်ယူပြီး ရွာသို့ ပြန်စဉ် စက်လှေမှာ မတော်တဆ နစ်မြုပ်သွားခဲ့ခြင်း ဖြစ်ကြောင်း မင်းပြားမြို့မ ရဲစခန်းမှ ရဲအုပ် ဦးစိန်ထွန်းဦးမှ ဟုတ်မှန်ကြောင်း အတည်ပြု ပြောကြားသည်။
“စက်လှေနစ်မြုပ်တာက မှန်ပါတယ်။ ဇူလှိုင်လ ၁၆ ရက် ညနေ ၃ နာရီ ၄၅ မိနစ်လောက်မှာပါ။ နစ်မြုပ်တဲ့ နေရာကတော့ မင်းပြားမြို့ ဦးစိုးတင့် ရပ်ကွက်နဲ့ ၂ ဖာလုံခန့် ဝေးပါတယ်။ မြစ်ကမ်းနဲ့ ပေ ၁၂၀ ခန့်ကွာ ရာမောင်မြစ်ထဲမှာ နစ်မြုပ်တာပါ။ စက်လှေပေါ်မှာ လူငါးဦးပါလာပြီး စက်လှေမောင်းတဲ့ မောင်တင်ဝင်း ပျောက်ဆုံးနေပါတယ်” ဟု ပြောသည်။
ပျောက်ဆုံးနေသူ မောင်တင်ဝင်းသည် ကုလားမတောင် ကျေးရွာအုပ်ချုပ်ရေးမှူး ဦးအောင်ဝင်း၊ စာရေး ဦးမောင်သန်း အပါအ၀င် ကျေးရွာသား ခုနှစ်ဦးတို့နှင့် အတူ မင်းပြားမြို့သို့ ကယ်ဆယ်ရေး ပစ္စည်း လာထုတ်ကြောင်း၊ ကျေးရွာအုပ်ချုပ်ရေးမှူးနှင့် စာရေးတို့မှာ မင်းပြားတွင် ကျန်နေခဲ့ပြီး မောင်တင်ဝင်းနှင့် နောက်လေးဦးမှာ ပစ္စည်းများကို စက်လှေပေါ်တင်၍ ပြန်ရာ ရာမောင်မြစ်အတွင်း စက်လှေ နစ်မြုပ် သွားခဲ့ကြောင်း၊ လူလေးဦးမှာ အသက်ရှင်ကျန်ရစ်သော်လည်း မောင်တင်ဝင်းကို ယခုအချိန်ထိ ရှာမတွေ့သေးကြောင်း သိရသည်။
“စက်လှေပေါ်မှာတော့ တယ်လီနော ဆက်သွယ်ရေးကုမ္ပဏီက လှူဒါန်းတဲ့ ဆန်အိတ် ၅၀ ၊ ပဲ ၁၇ အိတ်၊ ဆီ ၁၀ ပိသာထည့် ဂါလံဗူး ၁၅ ဗူး ပါတယ်။ ကာလတန်ဖိုး ၂၉ သိန်းပါ။ စက်လှေနစ်မြုပ်ချိန်မှာ မိုးသက်လေပြင်း အနည်းငယ် ကျရောက်နေပါတယ်။ ပျောက်ဆုံးနေတဲ့ မောင်တင်ဝင်းကိုတော့ လိုက်ရှာနေတုန်းပါ၊ ကျွန်တော်တို့ ရှာဖွေတွေ့ရှိပြီးမှ အရေးယူဆောင်ရွက်မှုတွေ လုပ်ရမှာပါ” ဟု ဒုစခန်းမှူး ဦးစိန်ထွန်းဦးကပြောသည်။
ရခိုင်ပြည်နယ်အတွင်း ဇူလှိုင်လ ပထမအပတ်က ရေကြီးရေလျှံမှုဖြစ်ပွားခဲ့သဖြင့် တယ်လီနော ဆက်သွယ်ရေး ကုမ္ပဏီသည် ရခိုင်ရေဘေးအတွက် ကျပ်သိန်း ၈၆၄ သိန်း ကူညီထောက်ပံ့ပေးခဲ့သည်။
No comments:
Post a Comment