Wednesday, August 31, 2016

ငပလီကမ်းခြေအနီး ဟိုတယ်ဆောက်လုပ်မူ ဒေသခံများ ထောက်ခံမည်မဟုတ်

နောင်ခိုင်အောင်


ရခိုင်ပြည်နယ် သံတွဲ ငပလီမြို့၊ မဇင်ရပ်ကွက် သံတွဲလေဆိပ် အနီး ပင်လယ်ကမ်းခြေရှိ အများပြည်သူပိုင် မြေကို DCA (Department of Civil Aviation) – မြန်မာ လေကြောင်းမှ ဂရမ်လုပ်ပြီး ဟိုတည် ဆောက်လုပ်ရန် ငှားရမ်းထားမှုကို မဇင်ရပ်ကွက်သားများ အနေဖြင့် ထောက်ခံသွားမည် မဟုတ်ကြောင်း နိရဉ္စရာ သတင်းဌာနသို့ သံတွဲ ဒေသခံများက ပြောဆိုသည်။

ယခင် အစိုးရလက်ထက်တွင် မြန်မာ့လေကြောင်း DCA မှ အများပြည်သူပိုင် မြေကွက် တစ်ခုအား ဂရမ်ပြုလုပ်ပြီးနောက် Golden Hinthawaddy Company Ltd (ဂိုးလ်ဒင်းဟသာင်္ဝတီကုမ္ပဏီ)အား ဟိုတည် ဆောက်လုပ်ရန် နှစ် (၃၀) စာချုပ်ဖြင့် ငှားရမ်းခဲ့သည်ဟု သိရသည်။

၎င်းဂိုးလ်ဒင်း ဟင်္သာဝတီ ကုမ္ပဏီမှ ယင်းမြေကွက်တွင် ဟိုတည်ဆောက်လုပ်ရာ လက်ရှိကာလတွင် မြို့နယ် စည်ပင်မှ ချမှတ်ထားသော စည်းကမ်းများနှင့် ကိုက်ညီမှု မရှိဟု ဆိုကာ ရပ်တန့်ထားခဲ့ပြီး ဟိုတည် ဆောက်လုပ်ရန် အတွက် ဒေသခံ ပြည်သူများ၏ သဘောတူ ထောက်ခံမှု လိုအပ်သည်ဟု ဆိုသည်။

သို့အတွက် ယခုလ ၂၆ ရက်နေ့က မဇင်ရပ်ကွက် ဘုန်းတော်ကြီးကျောင်းတွင် ကျေးရွာအုပ်ချုပ်ရေးမှူး ဦးသိန်းကျော်မှ မဇင်ရပ်ကွက်နေ ဆယ်အိမ်မှူးနှင့် ရာအိမ်မှူးများ အပါအ၀င် ရပ်ကွက်နေ မိဘ ပြည်သူများနှင့် အစည်းအဝေး တစ်ရပ် ပြုလုပ်ပြီး ၎င်းဟိုတည်ဆောက်လုပ်မှုကို လက်ခံရန် အခြေအနေ ရှိ/မရှိ မေးမြန်းခဲ့သည်ဟု သိရသည်။

၎င်းအစည်းအဝေးသို့ လူပေါင်း ၈၆ ယောက်တက်ရောက်ခဲ့ပြီး အများစုက ဟိုတည်ဆောက်လုပ်ရန် သဘောမတူကြောင်း ဆုံးဖြတ်ခဲ့ကြသည်ဟု ရပ်ကွက် အုပ်ချုပ်ရေးမှူး ဦးသိန်းကျော်မှ နိရဉ္စရာသို့ ပြောကြားသည်။

မဇင် ရပ်ကွက်နေဦးစိုးမင်းက “ဒီမြေဟာ ကျွန်တော်တို့ သိသလောက် ကလေးတွေ ဘောလုံးကွင်းနေရာ၊ အများပြည်သူ ပင်လယ်ဆင်းလို့ သက်မွေးဝမ်းကျောင်းပြုဖို့ လွတ်လွတ်လပ်လပ် သွားလာခဲ့တဲ့နေရာ ဖြစ်ပါတယ်။ ဘယ်အချိန်မှာ DCA က ပိုင်ထားတယ်ဆိုတာ ကျွန်တော်တို့လည်း မသိပါဘူး။ သူတို့ ဂရမ်ခံတုန်းကလည်း ဘယ်ပြည်သူမှ မသိလိုက်ရပါဘူး။ ကျွန်တော်တို့ မှတ်မိသလောက် ဒီဒေသက လူတွေက ဒီနေရာမှာ လေကောင်းလေသန့်ရှူတယ်။ ငါးရှာတယ်။ ခရုကောက်တယ်။ ဒီလိုသွားလာခဲ့တဲ့နေရာပါ” ဟု ပြောသည်။

၂၀၁၅ ခုနှစ် ဟိုတည်နှင့် ခရီးသွားလာရေး ၀န်ကြီးဌာန၏ ထုတ်ပြန်ချက် ဥပဒေအရ ကမ်းခြေနှင့် ဒီရေ ရောက်သော နေရာမှ မီတာ ၅၀ အကွာမှာသာ အဆောက်အဦ ဆောက်လုပ်ခွင့် ပြုထားသော်လည်း လက်ရှိမှာ သောင်ပြင်အထိ ဟိုတည်ကို တည်ဆောက်ထားသည်ကို တွေ့ရကြောင်း၊ စည်ပင် တားထားသော်လည်း ဆောက်လုပ်မှုများ ရှိနေကြောင်း ရပ်ကွက်နေ ပြည်သူ တစ်ဦးဖြစ်သည့် ဦးစန်းယုက ပြောသည်။

“ ကျွန်တော်တို့ ပြည်သူတွေက ဥပဒေကို ထဲထဲဝင်ဝင်နားမလည်တာ မဟုတ်ဘူး။ ဒါပေမယ့် ဒီဟိုတည် ဆောက်လုပ်နေတာဟာ ဥပဒေနဲ့ မညီဘူးလို့ ခံစားမိတယ်။ ဥပဒေနဲ့ ညီ / မညီကို သက်ဆိုင်ရာက စစ်ဆေးပေးရမယ့် တာဝန် ရှိတယ်။ ဒါကြောင့် အမြန်စစ်ဆေးဖို့ အထက်အာဏာပိုင်တွေကို တိုက်တွန်း ပြောဆိုအပ်ပါတယ်” ဟု ဦးစန်းယုက ပြောသည်။

ကျေးရွာအုပ်ချုပ်ရေမှူး ဦးသိန်းကျော်က “ ဒီခေတ်မှာ ပြည်သူသဘောထား မပါဘဲနဲ့တော့ လုပ်လို့ရ တာမရှိပါဘူး။ ဟိုတည်ဆောက်ဖို့အတွက်လည်း ကျွန်တော်တို့က လက်မှတ်ထိုးပြီး ခွင့်ပြုထားတာမျိုး မရှိပါဘူး။ ပြည်သူက မလိုလားဘူးဆိုရင်တော့ သက်ဆိုင်ရာကို အဆင့်ဆင့်ကို တင်ပြပေးသွားဖို့ ကျွန်တော် ကူညီမယ်” ဟု ပြောသည်။

ယခု ဟိုတည်ဆောက်နေသော နေရာမှာ ပင်လယ်ကို အမှီပြုပြီး ငါးရှာ၊ ခရုကောက် ဝမ်းစာရှာ စားကြ ရသည့် အနီးအနား ကျေးရွာသားများ၏ ကလေးငယ်များ အားကစား လုပ်လာကြသည့် ဘောလုံးကွင်း ဖြစ်ကြောင်း၊ ယခုနေရာတွင် ဟိုတည်တည်ဆောက်သဖြင့် ဒေသခံများ ပင်လယ်ထဲသို့ ဆင်းရန် လမ်းပိတ်သွားခဲ့ပြီး ကလေးငယ်များ ကစားစရာ မြေနေရာ မရှိ ဖြစ်သွားကြောင်း ဦးသိန်းထွန်းမှ ဆက်လက် ပြောကြားသည်။

ဒေသခံကျေးရွာသားတွေပြောဆိုချက်အရ ယခု ငပလီကမ်းခြေတွင် ဟိုတည် အများစု ဆောက်ထားသော မြေနေရာမှာ ဒေသခံများ၏ ဘိုးဘွားလက်ထက်က ပိုင်ဆိုင်ခဲ့သော အုန်းခြံ၊ ကွမ်းခြံများ ဖြစ်ကြောင်း၊ ၁၉၅၁ ခုနှစ်တွင် သံတွဲ လေယာဉ်ကွင်း စီမံချက်အရ လေယာဉ်ကွင်းနှင့် နီးသောကြောင့် ဖယ်ပေးခိုင်းရာမှ ဒေသခံများက နိုင်ငံတော် ကောင်းကျိုး အတွက် ရည်ရွယ်ပြီး ဖယ်ပေးခဲ့သော်လည်. နောက်ပိုင်းတွင် ယင်းမြေနေရာများတွင် ပုဂ္ဂလိကပိုင် ဟိုတည်များသာ အသီးသီး ပေါ်ပေါက်လာခဲ့သည်ဟု သိရသည်။

၎င်းပြင် စစ်အစိုးရ လက်ထက်တွင်လည်း ခလ၇ (၅၅) တပ်ရင်း တိုးချဲ့ရန်ဟု အကြောင်းပြကာ ဒေသခံ လယ်သမားများအား ၂၀၀၀ ခုနှစ် ဇူလှိုင်လ ၃၁ ရက်နေ့ နောက်ဆုံးထားပြီး ထွက်ပေးရမည်၊ မထွက် ပေးပါက ဘော်ဒူဇာဖြင့် ဖြိုမည်ဟု ခြိမ်းခြောက်သဖြင့် မိုးထဲရေထဲတွင် ဒေသခံများ ထွက်ပေးခဲ့ရကြောင်း၊ နောက်ပိုင်းတွင် ၎င်းမြေများကို နှစ် (၃၀) စာချုပ်ဖြင့် ဟိုတည်ဆောက်ရန် ခရိုနီများသို့ ငှားရမ်းခဲ့ကြောင်း၊ ယခု ယင်းမြေနေရာတွင် ဟိုတည် ၄ လုံးတည်ဆောက်ထားကြောင်း ရပ်ကွက် အုပ်ချုပ်ရေးမှူးက ပြောကြားသည်။

ယင်းမြေများအစား ဒေသံများအား ပေ ၄၀၊ ပေ ၆၀ မြေကွက်များ ချပေးခဲ့သော်လည်း မည်သူမျှ ယင်းမြေနေရာတွင် မနေထိုင်ကြကြောင်း သူက ဆက်လက် ပြောကြားသည်။

သံတွဲငပလီ ကမ်းခြေတွင် ဟိုတည် အလုံးပေါင်း ၃၀ ခန့် ရှိသော်လည်း ၎င်းအထဲတွင် ဒေသခံ ရခိုင် အမျိုးသားပိုင် ဟိုတည် တစ်လုံးသာ ရှိပြီး ကျန်ဟိုတည်များမှာ ပြည်နယ်ပြင်က စီးပွားရေး သမားများ ပိုင်ဆိုင်သော ဟိုတည်များ ဖြစ်ကြောင်း သိရသည်။

No comments: