မဇ္ဈိမ
မြန်မာနိုင်ငံ၏ နိုင်ငံတော်အတိုင်ပင်ခံ ပုဂ္ဂိုလ်နှင့် နိုင်ငံခြားရေးဝန်ကြီးဖြစ်သူ ဒေါ်အောင်ဆန်းစုကြည် အပါအဝင် မလေးရှားနိုင်ငံ၏ ထိပ်တန်းခေါင်းဆောင်များကို အစ္စလာမ်မစ် စစ်သွေးကြွအဖွဲ့ ISIS တို့၏ အန္တရယ်ပြုမည့် ပစ်မှတ်တွင် ထည့်သွင်းထားကြောင်း ရေးသားထားသည့်စာ မလေးရှားနိုင်ငံ Negri Sembilan ရဲစခန်းက ရရှိထားသည်ဟု စင်္ကာပူအခြေစိုက် Straits Times သတင်းစာက ရေးသားသည်။
အဆိုပါစာသည် ISIS တို့က အမှန်တကယ် ပေးပို့သည့် စာဟုတ်မဟုတ် မလေးရှားရေးတပ်ဖွဲ့က စုံစမ်းသွားမည်ဟု ဆိုထားသည်။ ISIS တို့ အန္တရယ်ပြုမည့် မလေးရှားနိုင်ငံ ထိပ်တန်းခေါင်းဆောင်များတွင် မလေးရှားဝန်ကြီးချုပ် နာဂျစ်အပါအဝင်၊ ဒုတိယဝန်ကြီးချုပ်နှင့် အခြား ထိပ်တန်းခေါင်းဆောင်များလည်း ပါဝင်သည်။
နှစ်မျက်နှာရှိသည့် စာတွင် မြန်မာနိုင်ငံမှ ဒေါ်အောင်ဆန်းစုကြည်၏ အမည်လည်း ပါဝင်ပြီး ပစ်မှတ်ထားခံရသည့် ခေါင်းဆောင်များ၏ ဓာတ်ပုံများကိုပါ အဆိုပါစာတွင် ပူးတွဲ ထည့်သွင်းထားသည်ဟု ဆိုသည်။
အစ္စလာမ်မစ် စစ်သွေးကြွအဖွဲ့ ISIS အဖွဲ့ဝင်ဦးရေ ၇၀၀ ခန့် မလေးရှားနိုင်ငံ Negri Sembilan ခရိုင်အတွင်း ရှိနေသည်ဟု စာတွင် ရေးသားထားသော်လည်း မလေးရှား ရဲတပ်ဖွဲ့ကမူ အဆိုပါအချက်ကို အတည်မပြုပါ။ ဆိုပါ ရေးသားမှုမှာ ကြွားဝါရေးသားမှုသာဖြစ်ကြောင်း ရဲတပ်ဖွဲ့က ယုံကြည်သည်ဟု ဆိုသည်။
စာနှင့် ဓါတ်ပုံများပါဝင်သော အညိုရောင်စက္ကူအိတ်ကို ယခုအခါ မှုခင်းဌာနသို့ ပေးပို့လိုက်ပြီဖြစ်သည်။
ယခုအခါ မလေးရှား ရဲတပ်ဖွဲ့က အဆိုပါ စာပေးပို့သူ မည်သူမည်ဝါဖြစ်သည်ကို စုံစမ်းစစ်ဆေးနေလျက်ရှိသည်ဟု သိရသည်။
" ဒီစာထဲမှာက ဘာလို့ နိုင်ငံ့ခေါင်းဆောင်တွေအပြင် ပြည်ပ ခေါင်းဆောင်တွေရဲ့ အမည်တွေပါ ပါနေရတာလဲဆိုတာကတော့ သိပ်ရှင်းရှင်းလင်းလင်း မသိရသေးပါဘူး၊ ဒါပေမယ့်လည်း ဘာပဲဖြစ်ဖြစ် ဒီလို ခြိမ်းခြောက်ခံရလို့ ကျွန်တော်တုိ့ ရဲတပ်ဖွဲ့အနေနဲ့ ထိတ်လန့် နေရမှာမဟုတ်သလို ကိုယ့်လုပ်ရမယ့် တာဝန်အတိုင်း ကျေပွန်အောင် ဆက်လက်ထမ်းဆောင်ကြမှာပါ" ဟု မလေးရှား ရဲအရာရှိတစ်ဦးက ပြောကြားသွားသည်။
No comments:
Post a Comment