ဟုမ္မလင်း- မုံရွာသွား အမြန်ရေယာဉ် တိမ်းမှောက်မှုကြောင့် ပျောက်ဆုံးနေသူများစာရင်းကို ပြန်လည်စိစစ်မှုများအရ မူလတန်းပြ၊ အလယ်တန်းပြနှင့် အထက်တန်းပြ ဆရာ၊ ဆရာမ ၃၇ ဦး ပါဝင်ကြောင်း လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေး ဦးစီးဌာနက တာဝန်ရှိသူတဦးက ပြောသည်။
“လာပေးထားတဲ့ ပျောက်ဆုံးစာရင်းတွေထဲမှာ ပညာရေးဝန်ထမ်း ဘယ်လောက်ပါမလဲဆိုပြီး ဒီနေ့စီစစ်လိုက်တဲ့ အထဲမှာ ၃၇ ဦးခန့် ရှိတယ်။ ထပ်လဲတိုးနိုင်သေးတယ်။ ဆရာ၊ ဆရာမ အလောင်းတွေ သေဆုံးသူတွေထဲက မနေ့က ပိုင်ရှင်ပေါ်လာတဲ့ အလောင်းတလောင်းပါတယ်။ ကျန်တာတွေတော့ မသိရသေးဘူး” ဟု လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဦးစီးဌာန ညွှန်ကြားရေးမှူး ဦးစဝီလီဖရန့်က ဧရာဝတီကို ပြောသည်။
ယနေ့ (အောက်တိုဘာလ ၁၈ ရက်) ညနေ ၄ နာရီအထိ ရရှိထားသည့် သေဆုံးသူစာရင်း စုစုပေါင်း ၃၈ ဦး အထိ ရှိလာပြီဖြစ်ကြောင်း ဦးစဝီလီဖရန့်က ဆက်ပြောသည်။
ရေယာဉ် တိမ်းမှောက်မှုကြောင့် သေဆုံးပျောက်ဆုံးနေသူများတွင် ဟုမ္မလင်းမြို့နယ်၊ ခုံတန်းကြီးကျေးရွာ မူလတန်းကျောင်းမှ ဆရာမတချို့ပါဝင်ကြောင်းနှင့် စာရင်းများအရ ဟုမ္မလင်း၊ ခန္တီး၊ ဖောင်းပြင်၊ မော်လိုက် စသည့် မြို့နယ်များရှိ အခြေခံပညာရေးကျောင်းများတွင် တာဝန်ကျနေသည့် ဆရာ၊ ဆရာမများ ပါကြောင်း ပျောက်ဆုံးစာရင်း ဖွင့်ထားသည့် မိသားစုများထံမှ သိရသည်။
“ကျနော့် ညီမလေးက ခုံတန်းကြီးကျေးရွာ မူလတန်းကျောင်းမှာ နေ့စားလပေးနဲ့ အလုပ်ဝင်နေတာ ၃ လပဲ ရှိသေးတယ်။ မတိမ်းမှောက်ခင် ညပိုင်း ၁၀ နာရီလောက်က ကျနော်နဲ့ ဖုန်းပြောဖြစ်သေးတယ်။ သူတို့တွေ upper တွဲမှာ လိုက်လာတယ်။ အပြင်မှာ လူတွေအရမ်းများတယ် ဆူညံနေတာပဲလို့ ပြောတယ်။ upper တွဲမှာ တခြားဆရာမတွေနဲ့ အတူတူ နေကြတယ်လို့ ပြောတယ်။ နောက်ပြီး ချောင်းဦးက မင်္ဂလာဆောင်ကိုသွားဖို့ မိသားစု တစုလဲ သူတို့နဲ့ တူတူပါတယ်လို့ ပြောတယ်” ဟု ပျောက်ဆုံးစာရင်းဖွင့် ရှာဖွေနေဆဲဖြစ်သည့် ဆရာမခိုင်ချိုချိုမော်၏ အစ်ကိုဖြစ်သူ ကိုဝေယံက ပြောသည်။
ထို့အပြင် ရေယာဉ်တိမ်းမှောက်မှုတွင် မုံရွာမြို့၊ သံလာရပ်ကွက်၌ နေထိုင်သည့် ဆရာ၊ ဆရာမ ၄၊ ၅ ဦးခန့် အပါအဝင် အဝေးသင်ကျောင်းသား ၇ ဦးခန့် ပါဝင်သည်ကို ကြားသိရကြောင်းနှင့် ယင်းသူများထဲတွင် အဝေးသင်တက္ကသိုလ် ကျောင်းသူတချို့ လွတ်မြောက်လာကြကြောင်း ကိုဝေယံက ဆက်ပြောသည်။
မြန်မာနိုင်ငံလုံးဆိုင်ရာ ဆရာ၊ ဆရာမများအဖွဲ့ချုပ်မှ အဖွဲ့ဝင်ဆရာ၊ ဆရာမများက ဒေသခံများနှင့်ပူးပေါင်းပြီး ရေယာဉ်တိမ်းမှောက်မှု၌ သေဆုံးပျောက်ဆုံးသည့် ဆရာ၊ဆရာမ စာရင်း အမှန်ရရှိရန် လိုက်လံကောက်ခံမှုများ ရှိနေကြောင်း အဖွဲ့ချုပ်ဥက္ကဌ ဒေါက်တာသန်းနိုင်ဦး ပြောသည်။
“ ကျနော်တို့ ရရှိတဲ့စာရင်းတွေထဲမှာ အစိုးရခန့်ထားတဲ့ ပညာရေးဝန်ထမ်းရော ဆွဲခန့်တွေပါ ပါတယ်။ ဆွဲခန့်ဆိုတာက ကျောင်းတွေကနေ ဆရာ၊ ဆရာမ လိုအပ်ချက်နဲ့ တနှစ်တခါခန့်တဲ့ ဘွဲ့ရသူတွေပါ။ ဆုံးရူံးသွားရတဲ့ ပညာရေးဝန်ထမ်းတွေအတွက် နိုင်ငံတော်အဆင့် ထုတ်ပြန်စေချင်တယ်။ ကူညီပေးမှုတွေ ဖြစ်စေချင်တယ်” ဟု မြန်မာနိုင်ငံလုံးဆိုင်ရာ ဆရာ၊ဆရာမများ အဖွဲ့ချုပ် မုံရွာတက္ကသိုလ်မှ မြန်မာစာလက်ထောက်ကထိက ဦးကျော်ဝေဖြိုးက ဆိုသည်။
ပြီးခဲ့သည့် အောက်တိုဘာလ ၁၅ ရက် နံနက် ၅ နာရီ အချိန်ခန့်က ဟုမ္မလင်း- မုံရွာသို့ ပြေးဆွဲနေသည့် အောင်စိုးမိုးကျော် ရေယာဉ်သည် စစ်ကိုင်းတိုင်းဒေသကြီး ကနီမြို့နယ် မိချောင်းတွင်းကျေးရွာအနီး ချင်းတွင်း မြစ်အတွင်း တိမ်းမှောက်မှုဖြစ်ပွားခဲ့ခြင်း ဖြစ်သည်။ ရေယာဉ်တိမ်းမှောက်မှု ဖြစ်ပွားသည့်နေ့တွင် ပြန်လည်ကယ်ဆယ်ခဲ့မှုကြောင့် အသက်ရှင်သူဦးရေ ၁၅၄ ဦးနှင့် သေဆုံး ၄ ဦးကို တွေ့ရှိခဲ့သည်။
No comments:
Post a Comment