ကချင်စစ်ပွဲများ ရပ်တန့်ရေး မြစ်ကြီးနားမြို့တွင် ဆန္ဒဖော်ထုတ်

နန်းလွင်နှင်းပွင့်

ကချင်ပြည်နယ်အတွင်း တပ်မတော်နှင့် ကချင်လွတ်လပ်ရေးတပ်မတော် (KIA) တို့အကြား တိုက်ပွဲဖြစ်ပွားမှု အရှိန် ပိုမြင့်လာသဖြင့် တိုက်ပွဲများ ရပ်တန့်ရေးအတွက် ကချင်တိုင်းရင်းသားတသောင်းနီးပါးက ယနေ့နံနက် မြစ်ကြီးနားမြို့၊ စီတာပူရပ်ကွက်ရှိ မနောကွင်းတွင် ဆန္ဒထုတ်ဖော်ပွဲတရပ် ကျင်းပပြုလုပ်ခဲ့သည်။

ဆန္ဒထုတ်ဖော်ပွဲကို နံနက် ၇ နာရီခွဲခန့်မှ နေ့လည် ၁၁နာရီအထိ ကျင်းပခဲ့ပြီး ဒေသခံပြည်သူလူထုများ အပါအဝင် ဘာသာရေးဆရာများ၊ သမိုင်းနှင့် သဘာဝပတ်ဝန်းကျင်ဆိုင်ရာ အတတ်ပညာရှင်များ၊ အရပ်ဘက်မှ လူထုကိုယ်စား လှယ်ခေါင်းဆောင်များက ဦးဆောင်ပြုလုပ်ခဲ့ခြင်းဖြစ်သည်။

ဆန္ဒထုတ်ဖော်ပွဲသို့ တတ်ရောက်လာသူများက “တပ်မတော်မှ ထိုးစစ်ဆင်ခြင်း ချက်ချင်းရပ်” ၊ “နိုင်ငံရေးပြဿနာကို နိုင်ငံရေးနည်းလမ်းဖြင့် ဖြေရှင်းရေး ဒို့အရေး”၊ “နိုင်ငံရေးပြဿာနာ မပြေလည်သရွေ့ အကြီးစားစီမံကိန်းများ ရပ်ဆိုင်း ထားရေး ဒို့အရေး” ၊ “စစ်ဘေးရှောင်များ ဂုဏ်သိက္ခာရှိစွာ နေရပ်ပြန်နိုင်ရေး ဒို့အရေး” ၊ “ကချင်ပြည်နယ်တွင် ဖက် ဒရယ်စနစ်နှင့် ကိုယ်ပိုင်ပြဌာန်းခွင့်ရရှိရေး”၊ “တိုင်းရင်းသူအမျိုးသမီးများကို အဓမ္မပြုကျင့် သတ်ဖြတ်မှု အလိုမရှိ” စသည့် အချက်များကို ကြွေးကြော်ကြပြီး၊ ဗီနိုင်းဆိုင်းဘုတ်များကိုလည်း ကိုင်ကာဆန္ဒထုတ်ဖော်ခဲ့ကြသည်။

ဤသို့ ဆန္ဒထုတ်ဖော်ရခြင်းမှာ ကချင်ပြည်နယ်အတွင်း KIAနှင့်ကချင် တိုင်းရင်းသား ဒေသခံများ ရှိနေသည့် နေရာများကို တပ်မတော်က တဖက်သက် ထိုးစစ်ဆင်နေခြင်းကြောင့်ဖြစ်သည်ဟု ဒေသခံများနှင့် ခေါင်းဆောင်သူ များက ဧရာဝတီကို ပြောသည်။

ဦးဆောင်သူ ရပ်မိရပ်ဖတဦးဖြစ်သည့် ဦးလုံဂျုံတူးရော်က “ကချင်လူထုက ဒီထိုးစစ်တွေကို ပြတ်ပြတ်သားသား ရှုံချပါတယ်။ မြန်မာ့တပ်မတော်ရဲ့ ကချင်ဒေသမှာ ဆင်နွဲနေတဲ့ ထိုးစစ်အားလုံးကို ချက်ချင်းရပ်ပေးပါ”ဟု ဆန္ဒ ထုတ်ဖော်ပွဲ၌ ထည့်သွင်းပြောဆိုသွားသည်။

၂၀၁၁ ခုနှစ်၊ ဇွန်လမှစ၍ တပ်မတော်နှင့် KIA တို့အကြား ၅နှစ်ကျော်ကြာ ဖြစ်ပွားနေသည့်တိုက်ပွဲများတွင် ကချင် ဒေသခံတို့၏ ရွာ ပေါင်း ၃၀၀ ကျော်၊ ဘုရားကျောင်း ၆၀ကျော်၊ စာသင်ကျောင်းပေါင်း ၁၀၀ ကျော်နှင့် လူနေအိမ် သောင်းဂဏန်းခန့်မှာ ဖျက်ဆီးခံခဲ့ရပြီး ကချင်တိုင်းရင်းသား တသိန်းကျော်မှာလည်း စစ်ရှောင်ဒုက္ခသည်ဘဝရောက် နေရသည် ဦးလုံဂျုံတူးရော်က ပြောသည်။

ယခုနှစ် သြဂုတ်လကုန်ပိုင်းမှစ၍ ကချင်ပြည်နယ်အတွင်းရှိ KIA တပ်စခန်းများအနီး၌ တိုက်ပွဲများ၊ ပစ်ခတ်မှုများမကြာ ခဏဖြစ်ပွားလျက်ရှိရာမှ စက်တင်ဘာလနှောင်းပိုင်းတွင် KIA ၏ ဌာနချုပ်ရှိရာလိုင်ဇာမြို့ပတ်ဝန်းကျင်ရှိ တပ်စခန်းများ တွင်ပါ တိုက်ပွဲ ပိုမိုပြင်းထန်လာခဲ့ခြင်း ဖြစ်သည်။

KIA ၏ သတင်းနှင့် ပြန်ကြားရေးတာဝန်ခံ ဒုဗိုလ်မှူးကြီး နော်ဘူက “အခုတော့တိုက်ပွဲတွေ ငြိမ်နေပါတယ်။ နောက်ဆုံး တိုက်ပွဲဖြစ်ခဲ့တာက အင်ခရမ်တောင်ကုန်းနားမှာ အောက်တိုဘာလ ၁ ရက်နေ့ကပါ”ဟု ပြောသည်။

တိုက်ပွဲငြိမ်နေခြင်းမှာ လုံးဝတိုက်ပွဲရပ်တန့်သွားမည့် အနေအထားမျိုး မဟုတ်ပဲ တပ်မတော်ဘက်မှ စစ်ကြောင်း များ လည်း KIA တပ်စခန်းများ အနီးတွင် ဆက်လက်ရှိနေပြီး၊ တပ်မတော်စစ်ကြောင်းများကို ရဟတ်ယာဉ်များဖြင့် ထောက်ပံ့ရေး ပစ္စည်းများချပေးနေသည်ကိုလည်း မြင်တွေ့ရကြောင်း ၊ ထို့ကြောင့် သတိအနေအထားဖြင့် ဆက်လက် နေရကြောင်း ဒုဗိုလ်မှူးကြီး နော်ဘူက ဆိုသည်။

“တပ်မတော်က ထိုးစစ်ဆင်တာ မရပ်ရင်တော့ ခုခံစစ်ပွဲက ဆက်ဖြစ်မှာပဲ။ ဒါ့ကြောင့် ပြည်သူလူထုတွေလည်း အားလုံး သတိအနေအထားနဲ့ ထိုးစစ်ဆင်တာ ရပ်တန့်ဖို့ တောင်းဆိုကြရမှာဖြစ်သလို၊ ဘာသာတရားနဲ့ ပြောမယ်ဆိုရင် ဆုတောင်းနေရမှာဖြစ်ပါတယ်” ဟု ပြောသည်။

အောက်တိုဘာလ ၁ ရက်ကလည်း ရှမ်းပြည်နယ်မြောက်ပိုင်းရှိ မုံးကိုးမြို့နယ်၊ ပူဝမ်ကျေးရွာတွင် လက်နက်ကြီးကျည် ကြောင့် ကချင်တိုင်းရင်းသားကလေးငယ် ၂ ဦး သေဆုံးသွားပြီး ကလေးငယ် ၁ဦးနှင့် သက်ကြီးရွယ်အို ၁ဦးတို့မှာ ဆေးရုံတင်ထားရသည်။

လက်ရှိ KIAနှင့် ဖြစ်ပွားနေသည့် တိုက်ပွဲများအပါအ၀င် မုံးကိုးမြို့နယ်ရှိ ကျေးရွာကို လက်နက်ကြီးဖြင့်ပစ်ခတ်သည် ဆိုသော ပြောဆိုချက်များနှင့် ပတ်သက်၍ တပ်မတော်၏ ပြောရေးဆိုခွင့်ရသူအား ဧရာဝတီမှအကြိမ်ကြိမ် ဆက်သွယ် ခဲ့သော်လည်း ဆက်သွယ်၍ မရခဲ့ပါ ။

ဝိုင်းမော်မြို့နယ်၊ မိုင်းနားစစ်ရှောင်စခန်းမှ စစ်ရှောင်ဒုက္ခသည် ဒေါ်ကော့မိုင်က “ကျမတို့ကခွဲခြားချင်တဲ့ စိတ်မရှိဘူး။ အကုန်လုံး ညီညီညွတ်ညွတ်နေချင်တာ။ နင်က ဗမာ၊ ငါက ကချင်၊ နင်ကသေသင့်တယ်။ ငါက ရှင်သင့်တယ် အဲ့ဒီလို မဟုတ်ပါဘူး။ ရှေ့တန်းသွားရတဲ့လူတွေ အကုန်လုံးကို သနားတယ်။ သူတို့မှာလည်း မိသားစုနဲ့ ကလေးတွေနဲ့ နေ တာလေ သူတို့ကိုလည်း မဆုံးစေချင်ဘူး” ဟု ပြောသည်။

စစ်ရှောင်ဒေသခံများမှာ ဒုက္ခသည်စခန်းများ၌ ၅ နှစ်ကျော်နေထိုင်နေခဲ့ရသည့်အပြင် ကမ္ဘာ့စားနပ်ရိက္ခာ အစီအစဉ် (WFP) မှလည်း ထောက်ပံ့မှုကို လျော့ချလိုက်သဖြင့် နေရပ်သို့ မြန်မြန်ပြန်လိုကြောင်း၊ငြိမ်းချမ်းရေးရရန် အစိုးရထံမှ တောင်းဆိုလိုကြောင်း ပြောကြသည်။

ယနေ့ မြစ်ကြီးနားမြို့တွင် ကျင်းပသည့် လူထုဆန္ဒထုတ်ဖော်ပွဲကို သက်ဆိုင်ရာ ရဲတပ်ဖွဲ့ထံသို့ ငြိမ်း/စု/စီ ဥပဒေအရ စုဝေးကာ မြို့တွင်းလမ်းလျှောက်ခွင့် တင်ခဲ့သော်လည်း လျှောက်ထားချိန် ၅ ရက် မပြည့်သေးသဖြင့် လမ်းလျှောက်ခွင့် မရခဲ့ပါ။

ထို့ကြောင့် ကချင်ရိုးရာ မနောကွင်းတွင်သာ စုဝေးပြီး ဆုတောင်းခြင်း၊ တောင်းဆိုလိုသည်များကို ကြွေး ကြော်ခြင်းများ သာ ပြုလုပ်ခဲ့ပြီး၊ လာမည့် အောက်တိုဘာလ ၆ ရက်တွင် မြို့အတွင်း လမ်းလျှောက်ဆန္ဒထုတ်ဖော်လိုပါ ပြုလုပ်နိုင် ကြောင်း ခွင့်ပြုမိန့်ရသဖြင့် ထိုနေ့တွင်လည်း ထပ်မံ ပြုလုပ်သွားမည်ဟု သိရသည်။