ညမထွက်ရ အမိန့်ထုတ်ပြန်ထားသည့် ကျောက်တော်မြို့နယ် သရက်အုပ်ကျေးရွာသား ဦးကျော်မောင်ချေ (အသက် ၆၄ နှစ်) သည် စက် တင် ဘာလ ၁၁ ရက်တွင် သတ်ဖြတ်ခံလိုက်ရသည့် ဖြစ်ရပ်သည် ရခိုင်ဒေသတွင်း နေထိုင်သည့် ပြည်သူများ ၏ စိုးရိမ်မှုကို ကြီးမားစေပြီး ဘ၀လုံခြုံ မှုအတွက် ခြိမ်းခြောက်မှုတခု အဖြစ်လည်း ရှုမြင်ကြောင်း ဒေသခံများ က ဆိုကြသည်။
ဦးကျော်မောင်ချေသည် မြို့ပေါ်မှ ၄ မိုင်ခန့် ဝေးသည့်၎င်းနေထိုင်ရာကျေးရွာသို့ ပြန်လာစဉ်လုံခြုံရေးမရှိသည့်လမ်းခရီး၌အသတ်ခံရ ကြောင်း၊ ညမထွက်ရ အမိန့်ထုတ်ပြန်ထားသည့်အတွက် အချိန်စော၍ ညနေ ၅ နာရီဝန်းကျင် ပြန်လာစဉ် အသတ်ခံရကြောင်း၊ထိုလူ သတ်မှုအားကြည့် ခြင်းအားဖြင့် တရားဥပဒေ စိုးမိုးမှု လုံးဝ မရှိသေးကြောင်း ကျောက်တော် ဒေသခံ ဦးမောင်မောင် က ဆိုသည်။
“ညမထွက်ရ အမိန့် ထုတ်ပြန်ထားတဲ့အပြင် အစိုးရ ခြေမြန်တပ်ရင်း သုံးလေးခု ရှိတဲ့နေရာမှာ ဒီလို ဖြစ်တာက ဥပဒေစိုးမိုးရေးကိုစိန်ခေါ်သလို မျိုး ဖြစ်နေတယ်၊ တရားခံ အစစ်တွေလည်းပဲ ဖမ်းဆီးနိုင်တာ မရှိသေးဘူး”ဟု ၎င်း က ဆိုသည်။
ဦးကျော်မောင်ချေ၏ အသုဘအခမ်းအနားကို ယမန်နေ့က ပြုလုပ်ရာ ဒေသခံ ပြည်သူသောင်းချီတက်ရောက်ခဲ့ပြီး တရားခံ အစစ်အမှန်ကို အ မြန်ဆုံး ဖော်ထုတ် ဖမ်းဆီးပေးရန် အာဏာပိုင်များထံ တောင်းဆိုခဲ့ကြကြောင်း သိရသည်။
ဦးကျော်မောင်ချေ အသတ်ခံရသည့် ကိစ္စနှင့်ပတ်သက်၍ သံသယရှိသည်ဟု ယူဆရသူ ပိုက်သည်ကျေးရွာမှ ရွှေမောင်(ခ) အ ဒူမာလိတ် နှင့် လာလူး(ခ)ဖော်ရီအာမတ် တို့ နှစ်ဦးအား ဖမ်းဆီးစစ်ဆေးနေသည်ဟု ကျောက်တော်မြို့နယ် စခန်းမှူး ဦးလှမျိုး အောင်က ပြောဆို ကြောင်း RFA မြန်မာပိုင်း သတင်း၌ ပါရှိသည်။
ထို့အတူ ဘူးသီးတောင်မြို့နယ် ကင်းချောင်းရွာခံ ဦးထွန်းရွှေလှိုင်(အသက် ၄၀)နှစ်သည် သြဂုတ်လ ၂၃ ရက်နေ့တွင် ၎င်းပိုင်ဆိုင်သည့် စိုက် ခင်းခြံတွင် တဦးတည်း ရှိနေစဉ် အသတ်ခံရကြောင်း၊ ၎င်းသည် အဒူလာတေး ဆိုသူနှင့် အလုပ်စပ်တူ လုပ်နေကြောင်း၊ ထိုလူသတ် မှုနှင့် ပတ် သက်၍ တရားခံဟု ယူဆရသည့် အဒူလာတေး ၏ မိတ်ဆွေ ၃ ဦးကို ဖမ်းဆီးထားကြောင်း သိရ သည်။
ဘူးသီးတောင်မြို့နယ် ပြင်ရှည်ကျေးရွာမှ မရီရီသန်း ဆိုသူ အမျိုးသမီးငယ်သည်လည်း စက်တင်ဘာလ ၂ ရက်နေ့က ဈေးမှနေ ထိုင်ရာ ကျေး ရွာသို့ အပြန် လမ်း၌ လူတစုက လိုက်လံနှောင့်ယှက်၍ထွက်ပြေးရာဓားဖြင့်လိုက်ခုတ်သည့်အတွက်ခြေဖနောင့်ပြတ်လုနီးပါးဖြစ် သွားကြောင်း၊ ယခုအခါ ဘူးသီးတောင် ဆေးရုံ၌ ဆေးဝါးကုသမှု ခံယူနေကြောင်း ဒေသခံများက ပြောသည်။
မရီရီသန်းအား ဓားဖြင့်ခုတ်သူ ၃ ဦးကို အာမခံဖြင့် ဘူးသီးတောင် ရဲစခန်းက လွှတ်ပေးထားကြောင်း၊ ယခုအခါ အမျိုးသမီးများ သာမက အ မျိုးသားများလည်း သွားလာရေးအတွက် စိုးရိမ်မှုများရှိနေကြောင်း ဒေသခံ ဦးထွန်းအောင်သိန်း က ပြောသည်။
“လူသတ်မှု၊ လုယက်မှု၊ နှောင့်ယှက်မှုတွေ ဆက်တိုက်ဖြစ်နေတော့ လူတွေက တယောက်တည်း ရွာပြင်ထွက်ပြီး အလုပ်မလုပ် ရဲကြတော့ဘူး၊ ဒေသခံ အများစုက တောတွေ၊ လယ်ကွင်းထဲမှာ လုပ်ကိုင်စားသောက်သူ များတယ်၊ အလုပ် လက်မဲ့ တွေ တနေ့ ထက် တနေ့ ပိုများလာနေ တယ်”ဟု ၎င်း က ဆိုသည်။
ဘူးသီးတောင်မြို့နယ်သည် အစိုးရ စစ်ဆင်ရေး ကွပ်ကဲမှု ဌာနချုပ်(စကခ) ၁၅ နှင့် ခြေမြန်တပ်ရင်း ၁၀ ရင်းကျော်အခြေစိုက်ထားသည့် နယ် စပ် ဒေသတခုလည်း ဖြစ်သည်။
ညမထွက်ရ အမိန့်ထုတ်ပြန်ထားသည့် အပြင် စစ်တပ်၊ လုံထိန်းတပ်ဖွဲ့များ အနေဖြင့် ကျေးရွာများကိုသာ လုံခြုံရေးယူ ထားနိုင်ပြီး လယ် ယာ လုပ်ငန်းခွင်နှင့် တောတောင်များ၌ လုပ်ကိုင်စားသောက်သူများအတွက် လုံခြုံရေးပေးနိုင်ခြင်း မရှိပေ။
ရခိုင်နှင့်ဒေသခံ တိုင်းရင်းသားအများစုသည် လယ်ယာလုပ်ငန်း၊ ရေလုပ်ငန်း၊ တနိုင်တပိုင် ငါးဖမ်းသည့် အလုပ်တို့ဖြင့်အသက်မွေး ကြ ကြောင်း၊ ထိုလုပ်ငန်းများသည် တဦး၊ နှစ်ဦး စသည့်ဖြင့် လုပ်ကိုင်ရကြောင်း၊ ယခုအခါ လုံခြုံရေးစိုးရိမ်သည့် အတွက် လုပ်ငန်းခွင် မသွား ရဲကြတော့ကြောင်း၊ လယ်ယာလုပ်ငန်းများ မလုပ်ကိုင်ရသည့်အတွက် လာမည့် နှစ်တွင် ဆန်၊ စပါး ရှားပါး၍ အလုပ်လက်မဲ့ ဦးရေပါ ပိုမို များ လာနိုင်ခြေ ရှိကြောင်း ရခိုင်ဒေသခံများ က ပြောသည်။
ရခိုင်ပြည်နယ် အစိုးရအဖွဲ့၏ နယ်စပ်ရေးရာ ၀န်ကြီး ဗိုလ်မှူးကြီး ထိန်လင်းက“လုံခြုံရေးကတော့ ပုံမှန်အတိုင်း ယူထားတာဆိုတော့ ထပ်တိုးဖို့ မရှိပါဘူး၊ အားလုံးက တည်ငြိမ်နေပါပြီ၊ လူသတ်မှု ကိစ္စတွေတော့ တာဝန်ရှိသူတွေကပဲ တရားဥပဒေအရ ဆောင်ရွက်နေပါတယ်”ဟု ဧရာဝတီ ကို ပြောသည်။
နယ်မြေအလိုက်လုံခြုံရေး ယူထားကြသည့်အတွက် လုံခြုံရေး ကိစ္စဆောင်ရွက်ကြမည်သာ ဖြစ်ကြောင်း၊ တရားဥပဒေစိုးမိုးရေးအတွက် သက် ဆိုင်သူများက လုပ်ဆောင်မည် ဖြစ်ကြောင်း လည်း ဆက်ပြောသည်။
အာဏာပိုင်များဘက်မှ ထိုသို့ပြောဆိုနေသော်လည်း တဘက်တွင် ဒေသခံများ အခက်အခဲပေါင်း စုံနှင့် ရင်ဆိုင် ကြုံတွေ့နေရခြင်းအပေါ် ရခိုင် နိုင်ငံရေး အသိုင်းအ၀ိုင်းက ဝေဖန်ပြောဆိုမှုများ ရှိနေသည်။
“ဘူးသီးတောင်၊ မောင်တော နယ်မြေက အေးအေးဆေးဆေးပါပဲ၊ လယ်ကွင်းတွေဆိုလည်း စိမ်းစို နေတယ်၊ ကျနော်တောင် ပြီး ခဲ့တဲ့ နှစ်ရက် က အဲဒီဘက်ကို သွားကြည့်သေးတယ်လေ”ဟု နယ်စပ်ဝန်ကြီး ဗိုလ်မှူးကြီး ထိန် လင်း က ဆိုသည်။
မောင်တောဒေသ၌ ၃ ရာခိုင်နှုန်းဝ န်းကျင်သာရှိသည့် ရခိုင်တိုင်းရင်းသား၊ ဗမာတိုင်းရင်းသားနှင့်ရခိုင်မျိုးနွယ်စုတိုင်းရင်းသားလူမျိုးများ သည် ထိုဒေသ၌ မနေထိုင်လိုကြတော့ကြောင်း၊ အာဏာပိုင်များအနေဖြင့် လုံခြုံရေး အပြည့်အ၀ တာဝန် ယူပေးမှ သာ နေထိုင်ရန် စဉ်း စားမည်ဟု ရခိုင်ပြည်နယ် ပဋိုပက္ခအတွက် ဖွဲ့စည်းထားသည့် စုံစမ်းရေးကော်မရှင်ထံ တင်ပြခဲ့ကြောင်း ဒေသခံများ က ဧရာဝတီ ကို ပြော သည်။
စုံစမ်းရေးကော်မရှင်သည် မောင်တောမြို့နယ်သို့ ရောက်ရှိစဉ် ကျောင်းမီးရှို့ခံလိုက်ရသည့် မောရ၀တီဆရာတော် အရှင်ဝိဇယ အား တွေ့ဆုံ မေးမြန်း လျှောက်ထားရာ မောင်တောဒေသ၌ ကြီးမားသည့်အရေးအခင်း အဖြစ် ၁၉၄၂ ခုနှစ်တွင် တကြိမ်၊ ၁၉၈၈ နှင့် ၁၉၉၄ ခုနှစ်တို့တွင် လည်း ဖြစ်ပွားခဲ့ပြီး၊ ယခုနှစ် ဇွန်လတွင် ဖြစ်ပွားခဲ့ရသည့် အကြမ်းဖက်မှုများကို မိန့်ကြား၍ နောင်တွင် လည်း ထပ်မံဖြစ်ပေါ်လာနိုင် သည့် အခြေ အနေများကို ရှင်းပြခဲ့ကြောင်း နိရဉ္စရာသတင်းဌာန ၌ ရေးသားထားသည်။
ကော်မရှင်အဖွဲ့သည် ဒေသခံတိုင်းရင်းသားများနှင့်ဘင်္ဂါလီမွတ်စလင်လူမျိုးများကို သီးသန့်စီတွေ့ဆုံ မေးမြန်းမှုများ ပြုလုပ်သွား ကြောင်း သိ ရသည်။ ၎င်းအဖွဲ့သည် ရခိုင်ဒေသတွင်း ပဋိပက္ခ ဖြစ်ပွားခဲ့ရသည့် အကြောင်းရင်းကို စုံစမ်းဖော်ထုတ်၍ ဒေသတွင်း တည် ငြိမ်ရေး၊ ဖွံဖြိုးရေး လုပ်ငန်းစဉ်များ ဆောင်ရွက်နိုင်မည့် နည်းလမ်းများ ရှာဖွေမည်ဟု ယနေ့ထုတ် အစိုးရ သတင်းစာများ ၌ ဖော်ပြထားသည်။
ရခိုင်ပြည်၌ ဇွန်လဆန်းက စတင်ခဲ့သော အကြမ်းဖက်မှုများ၊ ပဋိပက္ခများ ကြောင့် မြို့နယ် ၁၀ ခု ၀န်းကျင်အား ညမထွက်ရ အမိန့် ပုဒ်မ ၁၄၄ ထုတ်ပြန်ထားသကဲ့သို့ ရခိုင်တပြည်လုံးအား အရေးပေါ်အခြေအနေ ကြေညာထားခြင်းကိုလည်း ရုပ်သိမ်းနိုင် မှု မရှိသေးပေ။
ရခိုင်ပြည်နယ်၏ မြို့တော် ဖြစ်သည့် စစ်တွေမြို့နယ် ဧရိယာ၌ပင် တည်ငြိမ်မှု၊ လုံခြုံမှု လုံးဝ မရှိသေးပေ။ လုံခြုံရေး တာဝန်ယူထားသည့် အစိုး ရစစ်တပ်၊ လုံထိန်းတပ်ဖွဲ့ဝင် တချို့၏ ဒေသခံ ပြည်သူများအပေါ် ဖိနှိပ် ဆက်ဆံခြင်း၊ ဖမ်းဆီး စစ်ဆေးမှု ပြုလုပ်ခြင်း များ ရှိနေ၍ စိုးရိမ်မှုများ ရှိနေကြောင်း စစ်တွေ ဒေသခံများက ပြောသည်။
ညမထွက်ရ အမိန့်ထုတ်ပြန်ထားစဉ် အပြင်ထွက်သည့် ဗျိုင်းဖြူ ရပ်ကွက်မှ ကိုမောင်မောင်ချေ (အသက်၁ရ နှစ်)ကိုလည်း စစ်တပ်မှ မှား ယွင်း ပစ် ခတ်မှု ကြောင့် သေဆုံးသွားကြောင်း၊ သားဖြစ်သူ၏ ရုပ်အလောင်း အား သွားကောက်သည့် ဖခင်ဖြစ်သူ ဦးငပုသည်လည်းဖမ်း ဆီးခံ ထား ရဆဲ ဖြစ်ကြောင်း ၀ံလက် ကျေး လက်ဒေသ ဖွံ့ဖြိုးရေး ဖောင်ဒေးရှင်း(ရခိုင်ပြည်) အဖွဲ့က ဆို သည်။
အကြောင်းအမျိုးမျိုးကြောင့် အပြင်ထွက်သည့်အတွက် စစ်တွေဒေသခံ ၇၀ ၀န်းကျင်ကို ဖမ်းဆီး၍ ထောင်ဒဏ် ၆ လစီ ချမှတ် လိုက် ကြောင်း ဒေသဆိုင်ရာ အာဏာပိုင်များ၏ ထုတ်ပြန်ချက်အရ သိရသည်။
ရခိုင်ဒေသတွင်း ဖြစ်ပေါ်ခဲ့သော ပဋိပက္ခများ၊ အကြမ်းဖက်မှုများကြောင့် စစ်တွေ၊ ဘူးသီးတောင်၊ ကျောက်ဖြူ၊ ရမ်းဗြဲ၊ သံတွဲ စသည့် မြို့နယ် များကို ညမထွက်ရ အမိန့် ပုဒ်မ ၁၄၄ အား သမ္မတ ဦးသိန်းစိန် က ဇွန်လ ၁၀ ရက်နေ့တွင် ကြေ ညာခဲ့ခြင်း ဖြစ်သည်။ ရခိုင်ပြည် နယ်ကို ထိုနေ့မှ စ၍ အရေးပေါ် အခြေ အနေလည်း ကြေညာခဲ့သည်။ အကြမ်းဖက်မှု စတင်ခဲ့သည့်မောင်တောမြို့၌ ဇွန်လ ၈ ရက်နေ့က စတင်၍ ပုဒ်မ ၁၄၄ ထုတ်ပြန်ခဲ့သည်။
ရခိုင်ပြည်နယ် ပဋိပက္ခများအတွင်း လူ ၈၀ ၀န်းကျင် သေဆုံး၍ ဒုက္ခသည်ပေါင်း ခြောက်သောင်း ကျော်ရှိနေပြီး အရေးပေါ် အ ကူအညီနှင့် ပြန် လည်ထူထောင်ရေး အကူအညီများ လိုအပ်နေသည်ဟု နယ်စပ်ရေးရာ ၀န်ကြီးဌာန ၀န်ကြီး ဒု ဗိုလ်ချုပ်ကြီး သိန်းဌေး က မီဒီယာများ ကို ပြော ထားသည်။
ပဋိပက္ခများကြောင့် အဆောက်အအုံ ၄၈၂၂ လုံး၊ ဘုန်းကြီးကျောင်း ၁၄ ကျောင်း၊ စာသင်ကျောင်း ၃ ကျောင်း၊ ဗလီ ၁၇ ခု ပျက် စီး သွား ခဲ့ သည်ဟု လည်း အစိုးရ သတင်းစာရှင်းလင်းပွဲ ထုတ်ပြန်ချက်အရ သိရှိရသည်။
No comments:
Post a Comment