အဖွဲ့ခေါင်းဆောင် (၃) ဦး ခေါင်ဆောင်သည့် အဖွဲ့ငယ် သုံးဖွဲ့မှ ယမန်နေ့ ညနေပိုင်း အချိန်က ၀င်ရောက်လာခဲ့ပြီး ယနေ့နံနက် (၈) နာရီ အချိန်ခန့်တွင် တာချီလိတ် အခြေစိုက် ခြေမြန်တပ်ရင်း ခမရ (၃၅၉) တပ်နယ်မြေ အတွင်း လက်နက်ချ အခမ်းအနား ကျင်းပ ခဲ့သည်ဟု အာဏာပိုင်နှင့် နီးစပ်သူတဦးက အခုလို ပြောသည်။
“အားယီခေါင်းဆောင်တဲ့အဖွဲ့က (၁၆) ယောက်၊ အားထူးခေါင်းဆောင်တဲ့အဖွဲ့က (၄) ယောက်၊ ယောဟန်ခေါင်းဆောင်တဲ့ အဖွဲ့က (၅) ယောက် အားလုံး (၂၅) ယောက် ၀င်လာတယ်။ ဒီမနက် (၈) နာရီမှာ သူတို့ကို အခမ်းအနားနဲ့ ကြိုဆိုလိုက်တယ်။”လက်နက် မျိုးစုံ (၁၈) လက်၊ ခဲယမ်း မျိုးစုံ အပါအ၀င် ဖောက်ခွဲရေး ပစ္စည်းများနှင့်အတူ ၀င်ရောက်လာခြင်း ဖြစ်ပြီး တာချီလိတ် အခြေစိုက် စစ်ဗျူဟာ ဗိုလ်မှူး ကြီး ခင်မောင်စိုး ဦးဆောင်၍ ဌာန ဆိုင်ရာ တာဝန် ရှိသူ များက လက်ခံ ကြိုဆို ခဲ့သည်ဟု ၎င်းက ဆက်ပြော သည်။
လွန်ခဲ့သည့် ဧပြီလ (၂၃) ရက်နေ့က စိုင်းနော်ခမ်း၏ တပ်ဖွဲ့ဝင်(၈) ဦးမှ တာချီလိတ် နယ်မြေခံတပ်ထံ လက်နက်ချခဲ့ပြီး ဧပြီလ (၂၅) ရက် နေ့တွင် ၎င်းအပါ အ၀င် တပ်ဖွဲ့ဝင် (၈) ဦးအား လာအို(လောဝ်) နိုင်ငံ အတွင်း ဖမ်းဆီး မိခဲ့ သည်။
၎င်းအား လာအိုနိုင်ငံမှ တရုတ်နိုင်ငံသို့ ယခုလ (၁၀) ရက်နေ့က လွဲပြောင်းပေး ခဲ့ပြီးနောက် ကျန်ရှိနေသည့် တပ်ဖွဲ့ဝင်များ မကြာခန အ လင်းဝင်လျက်ရှိကြောင်း အစိုးရအာဘော် သတင်းများ၌ ဖော်ပြသည်။
ထိုင်းနိုင်ငံ အခြေစိုက် ရှမ်းပြည်မူးယစ်ဆေးဝါး စောင့်ကြည့် လေ့လာရေး အဖွဲ့ခေါင်းဆောင် ဦးခွန်ဆိုင်းက ယခုကဲ့သို့ မကြာခန ၀င် ရောက် လာခြင်းကြောင့် လောလာဆယ် ရွှေတြိဂံ ဒေသအတွင်း မူးယစ် ဆေး ရောင်းဝယ်မှု အရှိန် အနည်းငယ် ရပ်တန့် သွားနိုင် သည်ဟု ယူဆ သည်။
သို့သော် လုံးဝ ပပျောက်သွားမည် မဟုတ်ကြောင်းနှင့် နောက်ပိုင်းတွင် ဦးဆောင်သူ တဦးပြန်လည် ပေါ်ပေါက်လာနိုင်သည်ဟု အခုလို သုံး သပ်ပြောဆိုသည်။
“ကုန်သည်တွေက ကူးသန်းသွားလာတဲ့ အခါမှာ သူတို့ ပစ္စည်းတွေ အပ်နှံထားဖို့ ယုံကြည် စိတ်ချ ရတဲ့နေရာတွေ လိုတာကိုး။ အဲလို အပ်နှံဖို့အတွက် လူတွေ ကိုရှာရတာပေ့ါ။ အဲလိုနဲ့ တဖြည်းဖြည်းချင်း တ ယောက်ယောက်က သူ့ရဲ့ သြဇာ အာဏာတွေ ထူထောင်လာ နိုင်တာပေ့ါ။ ဒါပေမယ့် အခုလောလောဆယ် ချက်ချင်း ဖြစ်ဖို့တော့ မရှိသေးဘူးပေ့ါ။”
စိုင်းနော်ခမ်းနှင့် အဖွဲ့သည် လူအင်အား (၁၅၀) ခန့်ဖြင့် လာအို(လောဝ်)၊ ထိုင်းနှင့် မြန်မာ နယ်စပ် ရွှေတြိဂံ ဒေသတ၀ိုက်တွင် လှုပ်ရှား နေ ပြီး မဲခေါင်မြစ် အတွင်း သွားလာနေသည့် ကုန်တင် သင်္ဘော များ နှင့် ခရီး သည်တင် ရေယာဉ် များအား စီးနင်း တိုက်ခိုက် ပြန်ပေး ဆွဲမှု များ ပြုလုပ် နေသည်ဟု စွပ်စွဲခံ ထားရ သည်။
ထို့အပြင် လွန်ခဲ့သည့် ၂၀၁၁ ခုနှစ် အောက်တိုဘာလ (၅) ရက်နေ့က တရုတ် ကုန်တင် သင်္ဘောတစီးအား စီးနင်းတိုက်ခိုက်၍ သင်္ဘော သား (၁၃) ဦးအား သတ်ဖြတ်ခဲ့သည်ဟု ထိုင်းအာဏာပိုင်အဖွဲ့က စွပ်စွဲ ပြောဆို ခဲ့သည်။
No comments:
Post a Comment