မနန်းဝိုးဖန်၏ ခင်ပွန်း ဂျပန်နိုင်ငံသား မစ္စတာ နာမဆဲ မိုတိုဟီကို (ဓာတ်ပုံ - ဧရာဝတီ)
အထူးစုံစမ်းစစ်ဆေးရေးဦးစီးဌာန (စသုံးလုံး) က ခေါ်ယူစစ်ဆေးမှုကြောင့် ရုံးအဆောက်အအုံပေါ်မှ ခုန်ချသေဆုံးသွားသည့် မနန်းဝိုးဖန် ၏ အိမ်ခြံမြေအမှုနှင့် ပတ်သက်၍ သူ၏ခင်ပွန်းဖြစ်သူ ဂျပန်နိုင်ငံသား မစ္စတာ နာမဆဲ မိုတိုဟီကိုကို စသုံးလုံးက အရေးပေါ် စီမံချက် ဥပ ဒေ ပုဒ်မ ၅ (ဇ) ဖြင့် ဖမ်းဆီးပြီး ရုံးတင် တရား စွဲဆို လိုက်ကြောင်း သိရှိ ရသည်။
မနန်းဝိုးဖန်က ကျပ် သိန်းသုံးသောင်း တန်ဖိုးရှိ အိမ်ခြံမြေများ ၀ယ်ယူထားပြီး ယင်းဝယ်မှုတွင် မစ္စတာ နာမဆဲ မိုတိုဟီကိုက ငွေကြေး ထောက်ပံ့ ခဲ့သည် ဟုဆိုကာ မေလ ၁၇ ရက် နေ့တွင် မစ္စတာ နာမဆဲ မိုတိုဟီကိုအပါအ၀င် အိမ်ခြံမြေပွဲစားများနှင့် အရောင်းအ၀ယ်လုပ် ကြသူ အားလုံးကို စသုံးလုံးက အင်းစိန်ထောင်တွင် ဖမ်းဆီးထိန်းသိမ်းပြီး လှိုင်သာယာတရားရုံးတွင် အမှုစွဲဆိုလိုက်ကြောင်း ယင်းအမှု ကို အသေးစိတ်စုံစမ်းလေ့လာနေသူ အမျိုးသားလွှတ်တော် ကိုယ်စားလှယ် ဦးဖုန်းမြင့်အောင်က ပြောကြားသည်။
“၁၉၅၀ အရေးပေါ်စီမံချက်၊ စီးပွားရေးဆိုင်ရာ ဥပဒေ ပုဒ်မ ၅ (ဇ) နဲ့ စွဲချက်တင်တာ။ ရှေ့နေချုပ်ရုံးက စသုံးလုံးကို ဒီပုဒ် မနဲ့ စွဲချက် တင် နိုင် တယ်ဆိုပြီး ခွင့်ပြု လိုက်လို့ စသုံး လုံးက တရား စွဲတာ။ အခု မစ္စတာ နာမဆဲ မိုတိုဟီကိုနဲ့ အိမ်ခြံမြေ အကျိုး ဆောင်တွေ အားလုံး အင်းစိန် အကျဉ်း ထောင်မှာ ရှိနေတယ်” ဟု ဦးဖုန်းမြင့်အောင်က ဧရာဝတီသို့ ပြောသည်။
ရန်ကုန်မြို့ရှိ မြန်မာနိုင်ငံဆိုင်ရာ ဂျပန်သံရုံးနှင့် သက်ဆိုင်ရာ ရဲစခန်းသို့ မစ္စတာ နာမဆဲ မိုတိုဟီကိုနှင့် တခြားဆက်စပ်သူများ အဖမ်းခံ ရခြင်း နှင့် ပတ်သက်၍ ဧရာဝတီက ဆက်သွယ် ခဲ့သော်လည်း ပြန်လည် ဖြေကြားခြင်း မရှိပေ။
Yangon Press International ၏ သတင်းတပုဒ်တွင်မူ ဂျပန်နိုင်ငံသို့ပြန်မည့် မစ္စတာ နာမဆဲ မိုတိုဟီကိုကို လေဆိပ်၌ တားမြစ် ဖမ်းဆီး ခဲ့ခြင်း ဖြစ်ကြောင်း၊ ဂျပန် သံရုံးက အင်းစိန် ထောင်တွင် ချုပ်နှောင် ခံထား ရသော မစ္စတာ နာမဆဲ မိုတိုဟီကိုကို တွေ့ခွင့်ရရန် ကြိုးပမ်း နေကြောင်း ဖော်ပြ ထားသည်။
မနန်းဝိုးဖန်ကို ဥပဒေမဲ့ ဖမ်းဆီးစစ်ဆေးမှု၊ စစ်ဆေးမှုတွင် မရပ်မနား စစ်ဆေးမှုများအပါအ၀င် ဥပဒေမဲ့ ပြုကျင့်မှုများအတွက် စသုံးလုံးက တာဝန်ယူခြင်းမရှိကြောင်း မိသားစုဝင်များထံမှ သိရှိရသည်။
“တိုင်စာတွေ အားလုံးပို့ထားတယ်။ အဲဒါတွေအတွက် ဘာမှ အကြောင်းမပြန်ဘဲ အခုနောက်ဆုံး မနန်းဝိုးဖန် ခင်ပွန်းကို ဖမ်းပြီး ရုံးတင် တာ” ဟု မိသား စုနှင့် နီးစပ်သူ တဦးက ဆိုသည်။
လက်ရှိတွင် မနန်းဝိုးဖန်အမှုသည် အမှုသုံးခု ဆက်စပ်ဖြစ်ပွားလာကြောင်း ဦးဖုန်းမြင့်အောင်က ပြောသည်။
“အခုဆိုရင် အမှုက ပိုပြီးရှုပ်ထွေးလာတယ်။ ဂျပန်နိုင်ငံသားကို တရားမ၀င် စီးပွားရေးဥပဒေပုဒ်မနဲ့ ရုံးတင်တာက တမှု၊ နောက်တမှုက နန်းဝိုးဖန် အဆောက်အအုံပေါ်က ဘယ်လိုကျ သေဆုံးသွားသလဲဆိုတဲ့ အမှု၊ အဲဒီအမှုက ကျောက်တံတားရဲစခန်းက သေမှုသေခင်း ဖွင့်ထား တယ်။ ဒါက အဖြေမထွက်သေးဘူး။ နောက်တမှုက မနန်းဝိုးဖန်ရဲ့ မိသားစုရှေ့နေက စသုံးလုံးကို မနန်းဝိုးဖန် သေဆုံးအောင် ပြုလုပ် စေမှု နဲ့ တရား စွဲဖို့ ကြိုးပမ်း နေတာက တမှု။ အားလုံးပေါင်း သုံးမှုပေါ့” ဟု ဦးဖုန်းမြင့် အောင်က ဆိုသည်။
ဦးဖုန်းမြင့်အောင်က မိမိအနေနှင့် ယင်းအမှုတွင် စသုံးလုံးက မနန်းဝိုးဖန်ကို တရားဥပဒေနှင့်အညီ စစ်ဆေးခြင်း ပြု၊ မပြုဆိုသော အချက် ကို အထူးစိတ်ဝင်စားကြောင်း၊ ယင်းကိစ္စကို လွှတ်တော်ရုံးမှတဆင့် အစိုးရအဖွဲ့ထံသို့ မေးခွန်းမေးမြန်းထားကြောင်း ပြောသည်။
“ကိုယ် မေးခွန်းမေးထားတယ်။ ကိုယ်က ဂျပန်ကြီးကိစ္စထက် နန်းဝိုးဖန်ကို စသုံးလုံးက ဘယ်လိုစစ်ဆေးသလဲ။ စစ်ဆေးတာက ဥပဒေနဲ့အညီ စစ်ဆေးတာဟုတ်ရဲ့လား။ ဒါကိုပဲ အဓိက စိတ်ဝင်စားတယ်။ ဥပဒေနဲ့အညီ စစ်ဆေးတယ်ဆိုရင်လည်း ဘယ်လိုစစ်ဆေးသလဲ။ ဒါကို သေသေချာချာသိချင်တာ။ ဒါက အရေးကြီးတယ်” ဟု ဦးဖုန်းမြင့်အောင်က ဆိုသည်။
မနန်းဝိုးဖန်ကို မတ်လ ၂၁ ရက်နေ့တွင် စသုံးလုံးက ဖမ်းဆီးထိန်းသိမ်း စစ်ဆေးနေစဉ် မတ်လ ၂၄ ရက်နေ့ မနက် ၅ နာရီကျော်တွင် စသုံးလုံး ရုံးအဆောက်အအုံပေါ်မှ ခုန်ချသေဆုံးသွားခြင်းဖြစ်ကြောင်း၊ မနန်းဝိုးဖန်၏ အသုဘကို မတ်လ ၃၀ ရက်နေ့က ထိန်ပင်သုဿန်တွင် ပြုလုပ်ခဲ့ကြောင်း စုံစမ်းသိရှိရသည်။
No comments:
Post a Comment