မိုးသူ
ပန်းချီဈေးကွက်သည် ၂၀၁၅ ခုနှစ် ဖေဖော်ဝါရီလမှစတင်ကာ အရောင်းအ၀ယ်ပါးလာခြင်းသည် ဒေါ်လာဈေးများမြင့်တက်လာခြင်း၊ ကုန်ဈေးနှုန်း များတက် လာခြင်းကြောင့်ဖြစ်သည်ဟု ပန်းချီဆရာအများစုက ဇွန် ၁၇ ရက်တွင် မဇ္ဈိမသို့ပြောကြားခဲ့သည်။
“ပန်းချီဈေးကွက်က တစ်အိအိနဲ့ကို ကျဆင်းနေတာ အခုထိကို ခေါင်းမဖော်နိုင်သေးဘူး။ ဘာဖြစ်လို့လဲဆိုတော့ အခုဆိုရင် မြန်မာနိုင်ငံမှာက ကုန်ဈေးနှုန်း တွေက လည်း တက်လာတယ်။ ဒေါ်လာဈေးတွေကလည်း တက်လာတယ်။ အခြား အထွေအထွေအခက်အခဲတွေကြောင့် ပြည်ပက၀ယ်စုတဲ့လူတွေကလည်း သိပ်ပြီးတော့ မ၀ယ်ကြတော့ဘူး” ဟု Summit Art Gallery မှ ပန်းချီမြင့်စိုးက ပြောကြားခဲ့သည်။
မြန်မာ့ပန်းချီဈေးကွက်သည် ပြည်ပ၀ယ်လိုအားကို ၉၀ ရာခိုင်နှုန်း အလေးထားနေရသည့်အတွက် ဒေါ်လာဈေးနှုန်း မြင့်မားမှုကြောင့် ၀ယ်လိုအားမှာ တစ်ဖြည်းဖြည်း ကျဆင်းနေခြင်းဖြစ်ပြီး ယခုအချိန်အထိ ဦးမလှည့်နိုင်သေးကြောင်းပြောသည်။
လက်ရှိ ဇွန်လ ၁၇ရက် အမေရိကန်ဒေါ်လာပေါက်ဈေးသည် တစ်ဒေါ်လာလျှင် ကျပ် ၁၁၉၀ရှိပြီး ရွှေဈေမှာ ၇၄၇,၅၀၀ ပေါက်ဈေးရှိနေသည်။
Gallery ပန်းချီဈေးကွက်တွင် ပန်းချီတစ်ကားနှုန်းသည် အနိမ့်ဆုံး နှစ်သိန်းမှ အမြင့်ဆုံး ၂၅သိန်းထိ ရှိသည်ဟု ပန်းချီမြင့်စိုးက သုံးသပ်ပြောကြားခဲ့သည်။ လောက နတ် ပန်းချီပြခန်းကလည်း ပန်းချီရောင်းအားသည် ၂၀၁၄ ခုနှစ်ကထက် ၇၀ ရာခိုင်နှုန်း ကျဆင်းလာလျက်ရှိပြီး ထိုသို့ရောင်းအားကျ ဆင်းခြင်းသည် ဖေဖော်ဝါရီတွင် စတင်ခဲ့သည်ဟု ပန်းချီ ကျော်ဖြူစံက သုံးသပ်ပြောကြားသည်။
ဟိုတယ်ဧည့်ခန်းများ၊ ၀ယ်ယူစုဆောင်းသူများ၊ ပြည်ပဧည့်သည်များသာ အဓိကထားဝယ်ယူလေ့ရှိသည့် ပန်းချီကားဖြစ်သော်လည်း မြန်မာနိုင်ငံတွင် ဈေးကွက် မငြိမ်မသက်မှုများ၊ ကုန်ဈေးနှုန်းများ မြင့်တက်လာမှုကြောင့် ၀ယ်ယူသူများသည် တစ်ဖြည်းဖြည်းနည်းပါးလာကာ ပန်းချီရောင်းချသူများအနေဖြင့် ယခင်ကထက် ပိုမိုရုန်းကန်နေရကြောင်း ပန်းချီရောင်းချသူများက ပြောခဲ့သည်။
No comments:
Post a Comment