အာဆီယံ ခရီးသွားလုပ်ငန်း ပြပွဲ ဈေးကြီးလွန်းသည်

မောင်မောင်

ATF (Asean Tourism Forum) အာဆီယံ ခရီးသွားလုပ်ငန်း ဖိုရမ် ၂၀၁၅ ကို နေပြည်တော်မှာရှိတဲ့ မြန်မာ အပြည်ပြည်ဆိုင်ရာ ကွန်ဗင်းရှင်း ဗဟိုဌာန (MICC) မှာ ဇန်န၀ါရီလ ၂၂ ရက်နေ့မှ စတင်ပြီး ၂၉ ရက်နေ့အထိ ၈ ရက်တိုင်တိုင် တခမ်းတနား ကျင်းပတော့မှာ ဖြစ်ပါတယ်။ ၁၉၈၁ မှ စတင်ကာ နှစ်စဉ်နိုင်ငံအလိုက် အလှည့်ကျ ကျင်းပလာခဲ့တာ ၃၃ ကြိမ်ရှိသွားခဲ့ပါပြီ။ အခု မြန်မာနိုင်ငံက အိမ်ရှင်အဖြစ် လက်ခံကျင်းပခွင့် ရတဲ့ ၂၀၁၅ ခုနှစ်ဟာ ၃၄ ကြိမ်မြောက်ဖြစ်ပြီး မြန်မာနိုင်ငံအတွက်တော့ ပထမဆုံးအကြိမ်ဖြစ်ပါတယ်။

၂၀၀၆ ခုနှစ်က အိမ်ရှင်အဖြစ် ကျင်းပခွင့်ရခဲ့ပေမယ့် အကြောင်းအမျိုးမျိုးကြောင့် မကျင်းပနိုင်ဘဲ ဖိလစ်ပိုင်နိုင်ငံကို လွှဲပြောင်း ပေးခဲ့ရတယ်လို့ သိရပါတယ်။

နိုင်ငံအလိုက် အိမ်ရှင်နိုင်ငံအဖြစ် ကျင်းပခဲ့တဲ့ အကြိမ်အရေအတွက်ကို ကြည့်မယ်ဆိုရင် စုစုပေါင်း ၃၃ ကြိမ်မှာ မလေးရှား ၆ ကြိမ်၊ အင်ဒိုနီးရှား၊ ထိုင်း၊ စင်ကာပူ၊ ဖိလစ်ပိုင် ၅ ကြိမ်စီ၊ ကမ္ဘောဒီးယား၊ လာအို၊ ဘရူနိုင်း ၂ ကြိမ်စီနှင့် ဗီယက်နမ်၊ မြန်မာ ၁ ကြိမ်စီတို့ ဖြစ်ပါတယ်။

ATF ၂၀၁၅ မှာ အာဆီယံ ၁၀ နိုင်ငံအပါအ၀င် နိုင်ငံပေါင်း ၄၀ ကျော်က မီဒီယာတွေ ခရီးသွားလုပ်ငန်းနှင့် ပါဝင် သက်ဆိုင်သူ (Stakeholder) ၁၅၀၀ ကျော် တက်ရောက်မယ့် ခရီးသွားလုပ်ငန်းပြပွဲ (Travel Expo =Travex) ကိုလည်း ဇန်န၀ါရီလ ၂၆ ရက်မှ ၂၉ ရက်နေ့ထိ ကျင်းပသွားမှာဖြစ်ပါတယ်။ Travex မှာ Seller-Meet-Buyer (SMB) နဲ့ Buyer-Meet-Seller (BMS) ရောင်းသူ ၀ယ်သူတွေ့ဆုံပွဲ အစီအစဉ်များ ပါဝင်ပါတယ်။ Seller ဆိုတာ မိမိနိုင်ငံအတွင်းမှာရှိတဲ့ ခရီးစဉ်ဒေသများကို ရောင်းချတဲ့သူဖြစ်ပြီး Buyer ဆိုတာ ရောင်းချသူ Seller ရဲ့ ခရီးစဉ် များကို ၀ယ်ယူသူဖြစ်တယ်။ တနည်းဆိုရင် Seller ဟာ Inbound Tour လုပ်ကိုင်သူဖြစ်ပြီး Buyer ဟာ Outbound Tour လုပ်ကိုင်သူဖြစ်တယ်။

ATF ရဲ့ ရည်ရွယ်ချက်များကတော့ အောက်ပါအတိုင်းဖြစ်ပါတယ်။

(၁) အာဆီယံကို တခုတည်းသော ဆွဲဆောင်မှုရှိသည့် လည်ပတ်စရာ နေရာဒေသတခုဖြစ်လာစေရန်၊

(၂) အာရှ ဖစိဖိတ်ဒေသအတွင်း အာဆီယံကို ပြိုင်ဖက်ကင်းသော နေရာဒေသတခုဖြစ်လာစေရန်အတွက် အသိပညာ မြှင့်တင်ပေးရန်၊

(၃) အာဆီယံအဖွဲ့ဝင်နိုင်ငံများသို့ ခရီးသွားဧည့်သည်များ ပိုမိုဝင်ရောက်စေရန်၊

(၄) အာဆီယံဒေသအတွင်း ခရီးသွားလုပ်ငန်း ဖွံ့ဖြိုးတိုးတက်စေရန်၊

(၅) အာဆီယံခရီးသွားလုပ်ငန်း ရပ်ဝန်းရှိ ကဏ္ဍအသီးသီးအကြား ပူးပေါင်းဆောင်ရွက်မှုအား ကောင်းလာစေရန်တို့ဖြစ်ပါတယ်။

မြန်မာနိုင်ငံက အိမ်ရှင်အဖြစ် ကျင်းပခွင့်ရခြင်းဟာ နိုင်ငံအတွက်သာမက ခရီးသွားလုပ်ငန်းနဲ့ ပတ်သက်သူ Stakeholder တိုင်းရင်းသား လုပ်ငန်းရှင်များအတွက် အထူးအခွင့်အရေးကောင်း ဖြစ်ပါတယ်။ မိမိတို့၏ ရောင်းကုန် (Product) များနဲ့ ၀န်ဆောင်မှု (Service) များကို နိုင်ငံတကာမှ မီဒီယာများ၊ လုပ်ငန်းအမျိုးစားတူ Stakeholder များအား လက်တွေ့ကျကျ ထိတွေ့ သိရှိစေနိုင်မှာ ဖြစ်ပါတယ်။

မြန်မာနိုင်ငံကို အကြိမ် ၂၀ ကျော် လာရောက်ခဲ့ဖူးသော ပြင်သစ်လူမျိုး ရှေးဟောင်းသုတေသန ပညာရှင် Dr. Alain Mahuzier က သူ၏ (L’Or de L’ Asie) အာရှ ရွှေနိုင်ငံဟု တင်စားထားသော မြန်မာနိုင်ငံ အကြောင်းစာအုပ်တွင် “မြန်မာနိုင်ငံသည် အခြားနိုင်ငံများနှင့်မတူ တမူထူးခြားသော ခရီးသွား အရင်းအမြစ်များ ပြည့်နှက်နေကြောင်း၊ နှစ်ပေါင်းများစွာ တည်တံ့နေသော ရှေးဟောင်းယဉ်ကျေးမှု အမွေအနှစ်များ၊ ရှုမငြီးဖွယ်ရာ သဘာဝအလှအပ၀န်းကျင်များ၊ သွားလိုသည့်ခရီးစဉ်များကို လုံခြုံမှု အပြည့်ဖြင့် သွားနိုင်သော တည်ငြိမ်အေးချမ်းမှုများ တိုင်းရင်းသား သွေးချင်းတို့၏ တဖက်သားကို ရိုင်းပင်းကူညီတတ်သည့်၊ လှိုက်လှဲပျူငှာ ဧည့်ဝတ်ကျေပွန်တတ်သော လူနေမှုဘ၀ပုံစံများသည် ကမ္ဘာလှည့် ခရီးသည်များကို ထူးထူးခြားခြား ဆွဲဆောင်နေကြောင်း အခြားသော နိုင်ငံနှင့် လူမျိုးတို့၏ ယဉ်ကျေးမှု ဓလေ့စရိုက်ဟန်ပန်များ ရောယှက်မှု ကင်းရှင်းသော ကိုယ်ပိုင်ဟန်၊ ကိုယ်ပိုင်ယဉ်ကျေးမှုတို့ဖြင့် သီးသီးသန့်သန့် ထည်ထည်ဝါ၀ါ ရှိနေကြောင်း” စသည့်တို့ကို ရေးသားဖော်ပြထားပါတယ်။

အဲ့ဒီလို ကိုယ့်နိုင်ငံရဲ့ အနေထားကောင်းတွေကို နိုင်ငံတကာက မီဒီယာတွေ၊ Stakeholder တွေကို လက်တွေ့ကျကျ သိရှိစေနိုင်တာဟာ နိုင်ငံအတွက် မဟာအခွင့်အလမ်းကောင်းကြီးတခုဖြစ်သလို တိုင်းရင်းသား လုပ်ငန်းရှင်အတွက်လည်း ကြုံတောင်ကြုံခဲ မျှော်လင့်တကြီး စောင့်စားနေရတဲ့ အခွင့်အရေးတခုဖြစ်ပါတယ်။ နိုင်ငံတကာမှ တက်ရောက်လာကြတဲ့ လုပ်ငန်းအမျိုးအစားတူ လုပ်ငန်းရှင် တွေနဲ့ ချိတ်ဆက်မိကာ မိမိလုပ်ငန်းကို ဖြန့်ကျက်တိုးချဲ့နိုင်ပြီး ၀င်ငွေတိုးပွားလာစေမှာ ဖြစ်ပါတယ်။ နိုင်ငံရပ်ခြားကို စရိတ်စက အကုန်ခံပြီး သွားစရာမလိုဘဲ ကုန်ကျစရိတ်သက်သာစွာနဲ့ တက်ရောက်ပြသ နိုင်မယ့်ပွဲလို့ ယူဆထားတာကြောင့် တိုင်းရင်းသားလုပ်ငန်းရှင်တွေ အတွက်တော့ ရတောင့်ရခဲ အခွင့်အရေး တခုပါ။

သို့ပေမယ့်လည်း ခရီးသွားပြပွဲမှာ တက်ရောက်ပြသခွင့်အတွက် သတ်မှတ်ထားတဲ့ ဈေးနှုန်းတွေက တိုင်းရင်းသား လုပ်ငန်းရှင်တွေအတွက်တော့ မတတ်နိုင်တဲ့ ဈေးဖြစ်နေတာပါ။ ကြီးမားတဲ့ အဟန့် အတားကြီး တခုဖြစ်နေတာပါ။ ခရီးသွားလုပ်ငန်းရှင်များအသင်း (UMTA) ရဲ့ ခရီးသွားလုပ်ငန်းမြှင့်တင်ရေး နှင့်ဈေးကွက် ရရှိရေးကော်မတီက စေတနာအပြည့်နဲ့ အသင်းဝင်တွေ ပါဝင်ပြသနိုင်အောင် ဖိတ်ခေါ်ခဲ့တာ ကိုလည်း အသိအမှတ်ပြုပါတယ်။ ဒါပေမယ့်လည်း အရောင်းပြခန်းငယ် (Booth) တခုအတွက် သတ်မှတ် ထားတဲ့ဈေးနှုန်းနဲ့ အခြားသော ဈေးနှုန်းတွေဟာ တိုင်းရင်းသား လုပ်ငန်းရှင်တွေအတွက် အဆမတန် ကြီးမားနေပါတယ်။

Travex ကို သွားရောက်ပြသနိုင်မယ့် သတ်မှတ်ဈေးနှုန်းတွေကတော့

UMTA ၏ ဈေးနှုန်း

အရောင်းပြခန်းငယ် Booth တခု = ၁၂ သိန်း

Full delegate = US Dollor 630

Co-Delegate = US Dollor 450

Delegate တဦးတည်းလည်း တက်ရောက်ခွင့်ရှိသည်။ အနိမ့်ဆုံးဈေးနှုန်း (၁၂ သိန်း + ၆၃၀ $ )

MTM (Myanmar Tourism Marketing) ၏ ဈေးနှုန်း

Booth + Full Delegate + Co- Delegate = 2400 US Dollar (တဦးတက်သည်ဖြစ်စေ၊ နှစ်ဦး တက်သည်ဖြစ်စေ အနိမ့်ဆုံးဈေးဖြစ်သည်။)

စုစုပေါင်း ၂၂ သိန်းနှင့် ၂၄ သိန်းကြား ကုန်ကျမှာဖြစ်ပါတယ်။ နေစရိတ်၊ စားစရိတ် သွားလာရေး စရိတ်တွေနဲ့ဆိုရင် အနည်းဆုံး သိန်း ၃၀ လောက် အကုန်ကျခံနိုင်မှသာ ဒီပွဲကို တက်ရောက်ပြသခွင့် ရကြမှာဖြစ်ပါတယ်။ ဘယ်လိုနည်းနဲ့မှ တိုင်းရင်းသား လုပ်ငန်းရှင် (SME) အများစုအနေနဲ့ တက်ရောက် နိုင်ကြမှာ မဟုတ်ပါဘူး။

ကမ္ဘာလှည့်ခရီးသွားလုပ်ငန်း ဖွံ့ဖြိုးတိုးတက်ရေးအတွက် အဓိက အင်အားစုတွေဖြစ်ကြတဲ့ တိုင်းရင်းသား လုပ်ငန်းရှင်အများစု ATF ၂၀၁၅ ရဲ့ Trevex မှာ ပါဝင်တက်ရောက်နိုင်ခွင့် ရရှိရေးအတွက် နိုင်ငံတော် သမ္မတကြီးမှသည် ဟိုတယ်နှင့် ခရီးသွားလာရေး ၀န်ကြီးအဆုံး ၀ိုင်းဝန်းစဉ်းစား ဆောင်ရွက်ပေးနိုင်ရန် ဆန္ဒပြုတိုက်တွန်းလိုက်ရပါတယ်။