Sunday, January 29, 2017

တရုတ်နှစ်သစ်ကူး နွေဦးပွဲတော်ကို ရန်ကုန်တွင် ပထမဆုံးအကြိမ် ပြန်လည်ကျင်းပ

ကျော်ဇောဟိန်း၊ ထက်ထက်နိုင်

“သိုက်မြိုက်ဝေဆာ တရုတ်နှစ်သစ်မင်္ဂလာ”လို့ အမည်ရှိတဲ့ ကြက်နှစ် နှစ်သစ်ကူးနွေဦးပွဲတော်ကို တရုတ်ကုန်သည်ကြီးများ အသင်းကနေ ဦးစီးကျင်းပခဲ့တာဖြစ်ပြီး ရန်ကုန်မြို့ ၊တရုတ်တန်းမှာ နှစ်ပေါင်းငါးဆယ်ကျော်အကြာမှာ ပထမဆုံးပြန်လည်ကျင်းပခဲ့ပါတယ်။

ဒီပွဲနဲ့ စပ်လျဉ်းပြီး ရန်ကုန်တိုင်းဝန်ကြီးချုပ် ဦးဖြိုးမင်းသိန်း ကလည်း “ဘာသာ၊အယူအဆ၊အသားအရောင်တွေ၊လိင်ခွဲခြားမှုတွေ မရှိပဲ ကျွန်တော်တို့ ညီညီညွတ်ညွတ် ဖြတ်သန်းကြမယ်။ ကျွန်တော်တို့နိုင်ငံတော်ကြီးဟာ လူမျိုးပေါင်းစုံ ချစ်ကြည်ရင်းနှီးစွာ နေထိုင်ခွင့် ရှိတဲ့ နိုင်ငံကြီး ဖြစ်ပါတယ်” လို့ အဖွင့်အမှာစကားမှာ ထည့်သွင်းပြောခဲ့ပါတယ်။

အဲ့ဒီပွဲတော်ကို အမျိုးသားဒီမိုကရေစီအဖွဲ့ချုပ် နာယက ဦးတင်ဦး၊ ရန်ကုန်တိုင်းဒေသကြီးအစိုးရအဖွဲ့ ၀န်ကြီးချုပ် ဦးဖြိုးမင်းသိန်းနဲ့ ဇနီး၊ မြန်မာနိုင်ငံဆိုင်ရာ တရုတ်နိုင်ငံသံအမတ်ကြီး H.E မစ္စတာ ဟုန်လျန်နဲ့ ဇနီး၊ ၈၈မျိုးဆက်( ငြိမ်းချမ်းရေးနှင့် ပွင့်လင်းလူ့အဖွဲ့အစည်း)ကျောင်းသားတစ်ဦးဖြစ်တဲ့ ဦးကိုကိုကြီး တို့အပြင် အခြားတာဝန်ရှိသူတွေနဲ့ ပြည်သူတွေ ပါဝင်ဆင်နွှဲခဲ့ကြပါတယ်။

ဒီပွဲကို လာရောက်ဆင်နွှဲတဲ့ ဒေါ်ခင်မာကြည်ကတော့ “ တအားပဲ ၀မ်းလည်းဝမ်းသာတယ်။ ငယ်ငယ်လေးကတည်းက တစ်ခါမှ မတွေ့ဖူးဘူးဆိုတော့ မြန်မာပြည်မှာ ဒီလိုကျင်းပတဲ့အတွက် စိတ်ထဲမှာ တအားပျော်တယ်။ ကြည်နူးတယ်။လူထုတွေ အားလုံး၊ ခုနှစ်ရက်သားသမီး အပေါင်းအားလုံး ကျန်းမာပါစေ၊ ချမ်းသာပါစေ၊လိုအင်ဆန္ဒ အားလုံးပြည့်နိုင်ပါစေ လို့ ဆုတောင်းလိုက်ပါတယ်ရှင်” လို့ မဇ္ဈိမကို ပြောပါတယ်။

တရုတ်ရိုးရာ နှစ်သစ်ကူးနွေဦးပွဲတော်ကို သုံးရက်ကြာကျင်းပမှာဖြစ်ပြီး ဒီပွဲတော်တစ်လျှောက်မှာ အကပဒေသာဖျော်ဖြေမှုတွေ၊ တရုတ်ရိုးရာ လက်မှုပညာပြသမှုတွေအပြင် ခြင်္သေ့၊ နဂါးအကပြိုင်ပွဲ အစ ရှိတာတွေလည်း ပါဝင်မှာဖြစ်ပါတယ်။

No comments: