ရခိုင်ပြည်နယ်၊ မင်းပြားမြို့နယ်က ကျေးရွာအချို့ကို စစ်တပ်ကဝင်ရောက်ပြီး အိမ်တိုင်းကို ရှာဖွေစစ်ဆေးမှုတွေ ပြုလုပ်နေတယ်လို့ ကျေးရွာသားတွေက ပြောပါတယ်။
ကျေးရွာတွေကို စစ်တပ်က ဝင်ရောက် စစ်ဆေးတာတွေ၊ ရှာဖွေတာတွေ ပြုလုပ်တာဟာ နယ်မြေလုံခြုံရေးအရနဲ့ ရက္ခိုင့်တပ်မတော် (အေအေ)နဲ့ပတ်သက်တဲ့သူတွေ ရွာတွေမှာ ရှိမရှိ၊ မကြာသေးခင်က မေလွမ်းကျေးရွာအနီးမှာ လက်လုပ်ဗုံး တလုံးတွေ့ခဲ့တာနဲ့ ပတ်သက်လို့ စစ်ဆေးမေးမြန်းတာ ဖြစ်နိုင်တယ်လို့ အဝရွာကျေးရွာအုပ်စုအုပ်ချုပ်ရေးမှူး ဦးအောင်ထွန်းက ဒီဗွီဘီကိုပြောပါတယ်။
“ကျနော်တို့ အဝရွာမှာဆိုရင် အိမ်တိုင်းတက်ပြီး မွှေတယ်။ ပြီးတော့ အိမ်တိုင်းကို မေးတယ်။ အိမ်ထောင်စုစာရင်းကို တိုက်ကြည့်ပြီး အိမ်က မရှိတဲ့သူတွေကို မေးတယ်။ ဘယ်သွားလဲ၊ ဘယ်မှာ နေလဲ၊ ဘာလုပ်တယ်ဆိုကို မေးတယ်။ ပြီးတော့ အိမ်ပေါ်အိမ်အောက်ကုန်စစ်တယ်။ စစ်တပ်က ၁၀ ဦးရယ်၊ ရဲက ၃ ဦး၊ အရပ်သားတွေ ခေါ်ယူပြီးတော့ အိမ်တိုင်းကိုဝင်ပြီးတော့ စစ်တာပါ။”
အခုလို စစ်ဆေးမှုတွေပြုလုပ်နေတဲ့အပေါ် ကျေးရွာသားတွေ ထိတ်လန့်နေကြတယ်လို့ အမည်မဖော်လိုသူ ဖားပြိုကျေးရွာနေတဦးက ဒီဗွီဘီကိုပြောပါတယ်။
“စစ်သားတွေက လက်နက်ကိုယ်စီဆိုတော့ ရွာကလူတွေတော့ ထိတ်လန့်နေကြတယ်။ သူတို့ မေးတာကို အကုန်ဖြေရတယ်။ မင်းပြားနဲ့မြောက်ဦးတပ်ရင်းက စစ်သားတွေပြောတယ်။ အိမ်မှာ ဘယ်နှယောက် ရှိလဲ။ နောက်လူတွေကော အိမ်မှာရှိလား၊ ဒါတွေမေးပါတယ်။ ကျနော်တို့ကတော့ ဘာလို့စစ်တယ်ဆိုတာကို ဘာမှပြန်မမေးရဲဘူး။ သူတို့မေးတာကိုပဲ အကုန်ဖြေတယ်။ နောက်ပြီး အိမ်တွေတက်ပြီး ဝင်စစ်တယ်။”
ကျေးရွာတွေမှာ ဒီလို စစ်ဆေးတာတွေ မလုပ်သင့်တော့ဘူးလို့ မင်းပြားမြို့နယ်၊ ပြည်နယ်လွှတ်တော် ကိုယ်စားလှယ် ဦးလှသိန်းအောင်က ဒီဗွီဘီကိုပြောပါတယ်။
“အမှန်တော့မသင်္ကာလို့ စစ်ဆေးတဲ့အခါမှာ ဒီလို့မစစ်ဆေးသင့်ဘူးလို့ ကျနော်မြင်ပါတယ်။ အေအေနဲ့ ဆက်စပ်မှု ရှိမရှိ ဆိုတာကို ကျောင်းဆရာကိုရွှေလုံးကိုလည်း စစ်ဆေးမေးမြန်းပြီးပြီ။ နောက်ပြီး သူတို့အနေနဲ့ မသင်္ကာတဲ့သူတွေကို အေအေနဲ့ဆက်စပ်တယ်ဆိုပြီး တရားဝင် ခေါ်လို့လည်း တပ်ထဲမှာ စစ်ဆေးမေးမြန်းပြီးပြီ၊ ကျေးရွာတွေကို ဒီလို့ စစ်ဆေးတာတွေတော့ မလုပ်သင့်ဘူးလို့ မြင်တယ်။”
အခုလို စစ်တပ်က ဝင်ရောက်ဆေးတာဟာ ဇန်နဝါရီ ၂၁ ရက်နေစလို့ ကျေးရွာအချို့တွေ ဝင်ရောက် စစ်ဆေးနေတာဖြစ်ပြီး ဝင်ရောက်စစ်ဆေးခဲ့တဲ့ ကျေးရွာတွေကတော့ ဇီးပင်ကြီးကျေးရွာ၊ ဂွဆုံကျေးရွာ၊ သင်းပုတ်ချောင်း ကျေးရွာ၊ ရွေဇင်းကုန်းကျေးရွာ၊ ဖားပြိုကျေးရွာ၊ အဝရွာကျေးရွာအုပ်စုနဲ့ ထောင့်ချေ ကျေးရွာမှာတွေကို စစ်တပ်က ဝင်ရောက်စစ်ဆေးခဲ့တာဖြစ်ပါတယ်။
ဝင်ရောက်စစ်ဆေးတဲ့အခါမှာ မသင်္ကာတဲ့ တစုံတရာမတွေ့ရှိခဲ့သလို့ ကျေးရွာက လူတွေကို စစ်တပ်က ဖမ်းဆီးခေါ်ဆောင်သွားတာတွေတော့ မရှိဘူးလို့ ဆိုပါတယ်။
ရန်ကုန်-စစ်တွေကားလမ်းအနီး မေလွမ်းကျေးရွာရဲ့မြောက်ဘက်၃မိုင် ခန့်အကွာမှာ ဇန်နဝါရီ ၁ ရက်နေ့က လက်လုပ် မိုင်တလုံးတွေ့ရှိ ခဲ့တဲ့နောက် မင်းပြားမြို့နယ်က မတရားအသင်း ဆက်သွယ်မှု ပုဒ်မ(၁၇)နဲ့ လွတ်မြောက်လာသူအချို့ကို စစ်ထောက်လှမ်းရေး(စရဖ)က ခေါ်ယူစစ်ဆေးမှုတွေ ပြုလုပ်ခဲ့ပါတယ်။
မနက်ဖြန်မှာတော့ ကျန်ရှိနေတဲ့ ကျေးရွာနှစ်ရွာကို စစ်တပ်က သွားရောက်စစ်ဆေးမှုတွေ ပြုလုပ်သွားမယ်လို့ သိရပါတယ်။ အခုသတင်းနဲ့ပတ်သက်လို့ တာဝန်ရှိသူတွေကို မေးမြန်ဖို့ ကြိုးစားခဲ့ပေမယ့် မရရှိခဲ့ပါဘူး။
No comments:
Post a Comment