ရပ်ကျေးပါတီဥက္ကဋ္ဌဓာတ်ပုံကို အလွဲသုံးစားပြုလုပ်ပြီး ရခိုင်အမျိုးသားပါတီ (အေအန်ပီ) မှ ပါတီထိပ်ပိုင်းခေါင်းဆောင်တချို့ကို စော်ကားပုတ်ခတ်ရေးသားမှုနဲ့ ဖေ့စ်ဘွတ်ခ် အကောင့်ပိုင်ရှင်တဦးကို စစ်တွေရဲစခန်းမှာ အမှုဖွင့်လိုက်ပါတယ်။
ရခိုင်ပြည်နယ်၊ ရသေ့တောင်မြို့နယ်၊ အောင်ဆိပ်ကျေးရွာမှ ရခိုင်အမျိုးသားပါတီဥက္ကဋ္ဌ ဦးမောင်တင်ထွန်းရဲ့ ဓာတ်ပုံကို အသုံးပြုပြီး ပါတီထိပ်ပိုင်းခေါင်းဆောင်တချို့ကို စော်ကားပုတ်ခတ် ရေးသားမှုနဲ့ သာလှထွန်း အကောင့်ပိုင်ရှင်ကို ပုဒ်မ ၆၆(ဃ) နဲ့ အမှုဖွင့်လိုက်တာပါ။
သာလှထွန်း အကောင့်ပိုင်ရှင်ကို ပုဒ်မ ၆၆(ဃ) နဲ့ စစ်တွေမြို့မရဲစခန်းမှာ အမှုဖွင့်ထားတယ်လို့ အောင်ဆိပ်ကျေးရွာမှ ရခိုင်အမျိုးသားပါတီဥက္ကဋ္ဌ ဦးမောင်တင်ထွန်းက ဒီဗွီဘီကို ပြောပါတယ်။
“ရခိုင်အမျိုးသားပါတီက ခေါင်းဆောင်တွေကို စော်ကားရေးထားတယ်။ နောက်ပြီး ရခိုင်အမျိုးသားပါတီက ဒေါက်တာအေးမောင်ကို စော်ကားပြီး ရေးသားပါတယ်။ ကျနော့်ဓာတ်ပုံ ခွင့်ပြုချက်မရှိဘဲ သူ့ရဲ့ဖေ့စ်ဘွတ်ခ်ပေါ်မှာ တင်ပြီးတော့ ပါတီကို စော်ကားရေးသားပါတယ်။ ဘာကြောင့် ဒီလိုလုပ်ရတာလဲ။ ကျနော့်ဆီ ဘာခွင့်ပြုချက်မရယူဘဲ ဒီပါတီထဲက ခေါင်းဆောင်တွေကို ကျနော့်ဓာတ်ပုံတင်ပြီး စော်ကားထားပါတယ်။ ဒါကြောင့် တရားဥပဒေကြောင်းအရ သူ့ကို အရေးယူဖို့ အမှုဖွင့်လိုက်တာပါ။”
အခုလို ရခိုင်အမျိုးသားပါတီနဲ့ ပါတီထိပ်ပိုင်းခေါင်းဆောင်တချို့ရဲ့ ဂုဏ်သိက္ခာကို ကျဆင်းအောင် ဆက်တိုက်ပြုလုပ်လာနေတာကြာင့် သာလှထွန်း အကောင့်ပိုင်ရှင်ကို အခုလို အမှုဖွင့်ယူဆောင်ရွက်ဖို့ ပြုလုပ်ရတာလို့ ဥက္ကဋ္ဌ ဦးမောင်တင်ထွန်းက ဆက်ပြောပါတယ်။
ဖေ့စ်ဘွတ်ခ်ပေါ်မှာ ရခိုင်အမျိုးသားပါတီကို ဂုဏ်သိက္ခာကျအောင် အမျိုးမျိုးပြုခဲ့ပေမယ့် အရင်က တရားစွဲဆိုမှုတွေ ပြုလုပ်တာမျိုး မရှိခဲ့ဘူးလို့ ရခိုင်အမျိုးသားပါတီ အထွေထွေအတွင်းရေးမှူး ဦးထွန်းအောင်ကျော်က ဒီဗွီဘီကို ပြောပါတယ်။
“ဒီလိုစော်ရေးတာမျိုး အများကြီးပဲ၊ ရခိုင်အမျိုးသားပါတီကို ဂုဏ်သိက္ခာကျဆင်းအောင် အကြိမ်ကြိမ်ပြုလုပ်တာတွေ ရှိတယ်။ ဒါပေမယ့် တခါမှ တရားစွဲဆိုတာတွေ မရှိဘူး။ အခုစွဲတာက ပါတီဗဟိုက စွဲတာတော့ မဟုတ်ဘူး။ ပါတီဝင်တဦးရဲ့ ဓာတ်ပုံကို အလွဲသုံးစားလုပ်တယ်။ ပြီးတော့ ရခိုင်အမျိုးသားပါတီက ထိပ်ပိုင်းခေါင်းဆောင်တချို့ကို စော်ကားပုတ်ခတ်ထားတယ်။ ဒါကြောင့် သူက အမှုဖွင့်လိုက်တာဖြစ်မယ်။”
၂၀၁၆ ခုနှစ် ဒီဇင်ဘာ ၃၀ ရက် ညနေပိုင်းက သာလှထွန်း အကောင့်ပိုင်ရှင်ကို အမှုဖွင့်တိုင်ကြားခဲ့ပြီး အဲဒီလို တိုင်ကြားမှုတွေကြောင့် ဆက်သွယ်ရေးဥပဒေပုဒ်မ ၆၆(ဃ) နဲ့ အမှုဖွင့်လှစ်ခဲ့ပြီး တရားခံကို ဖမ်းဆီးရရှိရေး ဆောင်ရွက်နေတယ်လို့ စစ်တွေမြို့မရဲစခန်းက ပြောပါတယ်။
No comments:
Post a Comment