ရဲနိုင်(လောက်ကိုင်)
ကချင်ပြည်နယ်၊ ဖားကန့်မြေစာပြိုကျမှုကြောင့် ပျောက်ဆုံးနေသူ ၂ ဦးကို တူးဖော်ရှာဖွေမှုများ ဆက်လက်လုပ်ဆောင်နေကြောင်း ဖားကန့်မြို့နယ်အုပ်ချုပ်ရေးမှူး ဦးကျော်စွာအောင်က ပြောသည်။
ပျောက်ဆုံးနေသူ ၂ ဦးမှာ အသက် ၄၅ နှစ်အရွယ် ဦးမောင်ရွှေနှင့် အသက် ၃၇ နှစ်အရွယ် ဦးချစ်ကိုတို့ဖြစ်ပြီး ၂ဝ၁၆ ခုနှစ် ဒီဇင်ဘာလ ၂၉ ရက်နေ့မှ စတင်ကာ ဘက်ဟိုး ၃ စီးဖြင့် ၃ ရက်ဆက်တိုက် တူးဖော်ရှာဖွေမှုများ ပြုလုပ်ခဲ့ကြောင်း ၎င်းက ရှင်းပြခဲ့ခြင်းဖြစ်သည်။
"ရှာဖွေနေတာက ၃ ရက်လောက်ရှိသွားပြီပေါ့နော်။ ၃ ရက်လောက်ကြာပြီ ဆိုတော့လည်း ပြန်တွေ့ဖို့ ခဲယဉ်းနေတဲ့ အနေအထားဖြစ်တာပေါ့။ ကာယကံရှင် မိသားစုတွေ သူတို့ကျေနပ်တဲ့အထိ ရှာပေးမှာပေါ့။ သူတို့ပြပေးတဲ့ နေရာတွေမှာ လိုက်ရှာနေတယ်။ နောက်ထပ် ပျောက်တဲ့သူ ထပ်များစရာလည်း အကြောင်းမရှိတော့ ဘူး။ ဒီနေ့လည်း ထပ်ရှာဦးမယ်။ နောက်ရက်တွေကတော့ မလွယ်လောက်တော့ဘူးဗျ။ ကျွန်တော်တို့ ဖြစ်နိုင် ခြေရှိတဲ့ထိတော့ ရှာမှာပေါ့။ "ဟု ဦးကျော်စွာအောင်က ပြောသည်။
အဆိုပါမြေစာပြိုမှုမှာ ၂ဝ၁၆ ခုနှစ်၊ ဒီဇင်ဘာလ ၂၈ ရက်၊ ညနေ ၄ နာရီ ၄၅ မိနစ်ခန့်က ယခင်မြေစာပြိုကျခဲ့သည့် ကျောက်စိမ်းနန်းတော်ကုမ္ပဏီ၏ မြေစာနေရာတွင် ထပ်မံဖြစ်ပွားခဲ့ခြင်းဖြစ်ကာ ဒဏ်ရာရသူ ၃ ဦးနှင့် ပျောက်ဆုံးနေသူ ၂ ဦးရှိပြီး မြေစာလာသွန်သည့် ကားတစ်စီးပါ မြေစာပြိုမှုတွင် ပါဝင်ခဲ့ခြင်းဖြစ်သည်။
"ပျောက်ဆုံးသူ နောက်ထပ် ထပ်တိုးလာတယ်ဆိုတဲ့ သတင်းတွေ တက်လာတာတော့ မရှိသေးပါဘူး"ဟု ဖားကန့် မြို့နယ် ပြည်သူ့လွှတ်တော်ကိုယ်စားလှယ် ဦးတင့်စိုးကပြောသည်။
အဆိုပါ မြေစာပြိုမှုမှာ ၂ဝ၁၅ ခုနှစ် နိုင်ဝင်ဘာလ လကုန်ပိုင်းက ပြိုကျခဲ့သည့် ၁၁၄ ဦးသေဆုံးခဲ့သော မြေပုံစာနေရာတွင် ထပ်မံပြိုကျခဲ့ခြင်းဖြစ်ကြောင်း သိရသည်။
No comments:
Post a Comment