အဆိုပါ လှုပ်ရှားမှုကို နိုင်ငံရေး အကျဉ်းသားများ စောင့်ရှောက်ရေး အသင်း (AAPP) နှင့် နိုင်ငံရေး အကျဉ်းသားဟောင်းများ အဖွဲ့တို့ ပူးပေါင်းပြီး လက်ဝါးတွင် အကျဉ်းကျ ခံနေရသည့် နိုင်ငံရေး သမားများ၏ နာမည်ကို ရေးသားကာ အမြန်လွှတ်ပေးရေး လှုပ်ရှားမှုများ လုပ်ဆောင်နေခြင်း ဖြစ်ကြောင်း AAPP အဖွဲ့ဝင် ဦးအောင်မျိုးကျော်က ဧရာဝတီကို ပြောသည်။
“၂၀၁၀ ခုနစ်က လက်ဝါးလှုပ်ရှားမှု တခါ လုပ်ဖူးတယ်။ အခု ဒုတိယ အကြိမ်ပေါ့။ လက်ဝါးပေါ် နာမည်ရေးပြီးတော့ တောင်းဆိုသွားမယ်။ လူသိများတဲ့ နိုင်ငံရေး အကျဉ်းသားဟောင်းတွေ လွတ်လာပေမယ့် လူမသိတဲ့ နိုင်ငံရေး အကျဉ်းသားတွေ ကျန်နေသေးတယ်။ တိုင်းပြည် ပြုပြင်ရေးကာလမှာ ဒီလူတွေ အမြန်ဆုံး လွှတ်သင့်တယ်” ဟု ၎င်းက ဆိုသည်။
လက်ဝါးလှုပ်ရှားမှုအပြင် လက်ရှိအချိန်၌ တရားစွဲဆို ခံနေရသည့် တက်ကြွလှုပ်ရှားသူ နိုင်ငံရေးသမား ၂၀၀ ကျော်၏ အမှုများကိုလည်း ပြန်လည် ရုပ်သိမ်းပေးရန် အစိုးရသို့ တောင်းဆိုထားသည်ဟု ဦးအောင်မျိုးကျော်က ဆက်ပြောသည်။
အစိုးရက အကျဉ်းကျ ခံနေရသည့် နိုင်ငံရေး အကျဉ်းသား တဦးမျှ မရှိသေးသည်ဟု ပြောဆိုနေချိန်တွင် ပြည်သူများနှင့် နိုင်ငံတကာက သိရှိစေရန်အတွက် ယခုကဲ့သို့ တောင်းဆိုရခြင်း ဖြစ်ကြောင်း၊ လူမှုကွန်ရက် Facebook နှင့် ဝက်ဘ်ဆိုဒ်များပေါ်တွင် တင်ပြ လှုပ်ရှားသွားမည် ဖြစ်ကြောင်း သိရသည်။
ယခုနောက်ပိုင်း အကျဉ်းချခံနေရသည့် နိုင်ငံရေးသမား အများစုသည် လယ်ယာမြေ ပြဿနာနှင့် လူ့အခွင့်အရေး ပြသာနာများကို ဖြေရှင်းကူညီပေးကြသည့် နိုင်ငံရေးသမားများ ဖြစ်ကြောင်း ဦးအောင်မျိုးကျော်က ပြောသည်။
ယနေ့ကာလတွင် ပြည်သူလူထု အနေဖြင့် လယ်ယာမြေ သိမ်းဆည်း ခံနေရမှုများ၊ အလုပ်သမားထု အခွင့်အရေးများ၊ ကျောင်းသားထု အခွင့်အရေးများစသည့် လူ့အခွင့်အရေး ချိုးဖောက်ခံနေရမှုများ အပြင် စားဝတ်နေရေး ပြဿနာ၊ ပြည်တွင်း ငြိမ်းချမ်းရေး တည်ဆောက်ရေး ပြဿနာ၊ ဖွဲ့စည်းပုံ အခြေခံဥပဒေဆိုင်ရာ ပြဿနာ၊ တရားဥပဒေ စိုးမိုးရေး ပြဿနာများနှင့် ရင်ဆိုင်နေရကြောင်း AAPP နှင့် နိုင်ငံရေး အကျဉ်းသားဟောင်းများ အဖွဲ့တို့က ပူးတွဲ ကြေညာချက် တစောင်ကို ၆၇ နှစ်ပြည့် လွတ်လပ်ရေးနေ့တွင် ထုတ်ပြန်ခဲ့သည်။
နိုင်ငံသား တယောက်၏ မိမိရပိုင်ခွင့် ဆုံးရှုံးခံရမှုများအပေါ် တောင်းဆို ဆန္ဒဖော်ထုတ်သူများ၊ နိုင်ငံရေး တက်ကြွလှုပ်ရှား သူများကို ခြိမ်းခြောက်ခြင်း၊ ဖမ်းဆီးခြင်း ထောင်ချခြင်းများအပြင် အသက်သေသည်အထိ အရေးယူနေမှုများသည် ယနေ့ ဒီမိုကရေစီနှင့် အမျိုးသားပြန်လည် ရင်ကြားစေ့ရေး အပေါ် အတားအဆီးများ ဖြစ်နေသည်ဟုလည်း ထိုကြေညာချက်တွင် ထည့်သွင်း ရေးသားထားသည်။
နိုင်ငံရေး အကျဉ်းသားဟောင်းများ အဖွဲ့မှ လုပ်ငန်းကော်မတီဝင် တဦးဖြစ်သည့် ဦးတင်မောင်ဦးက “နိုင်ငံရေးအရ အမြင်ကွဲလွဲတဲ့ သူတွေကို ဖမ်းဆီး ထောင်ချနေတာနဲ့ ဒီနိုင်ငံရေးက ပြေလည်သွားမှာ မဟုတ်ဘူး။ ဒီလူတွေနဲ့ တွေ့ဆုံပြီးတော့ နှစ်ဦးနှစ်ဖက် အကျိုးများစေမယ့် နည်းလမ်းနဲ့ လက်ခံနိုင်တဲ့ နည်းလမ်းတွေနဲ့ တိုင်းပြည်ကို ထူထောင်မှ တိုင်းပြည်လည်း နိုင်ငံရေး အကျဉ်းသား ကင်းစင်ပြီး သင့်မြတ်ရေး ရနိုင်မယ်” ဟု ဆိုသည်။
နိုင်ငံရေး အကျဉ်းသားအရေး ဆောင်ရွက်နေသူများ ဖြစ်သည့်အတွက် နိုင်ငံရေး အကျဉ်းသားများ ရှိနေသ၍ မြန်မာနိုင်ငံတွင် အမျိုးသားပြန်လည် ရင်ကြားစေ့ရေး မရနိုင်ကြောင်း မြန်မာနိုင်ငံတ၀န်း ဆက်လက် ဖြစ်ပွားနေသော ဖမ်းဆီးထိန်းသိမ်း အကျဉ်းချနေမှုများအား ချက်ခြင်း ရပ်တန့်ရန်နှင့် အကျဉ်းထောင် အသီးသီးတွင် ကျန်ရှိနေသေးသည့် နိုင်ငံရေး အကျဉ်းသား အားလုံးအား ချွင်းချက်မရှိ ချက်ချင်း ပြန်လွှတ်ပေးရန် ဤလက်ဝါးလှုပ်ရှားမှုမှ တဆင့် ထပ်မံ တောင်းဆိုပါသည်ဟုလည်း ထုတ်ပြန်ချက်တွင် ထည့်သွင်း ရေးသားထားသည်။
လက်ဝါးလှုပ်ရှားမှု ကဲ့သို့သော ဓာတ်ပုံလှုပ်ရှားမှု နည်းလမ်းအား ၂၀၁၀ ခုနှစ်တွင် အသုံးပြုကာ “ကျွန်ုပ် လွတ်မြောက် လာသော်လည်း ကျွန်ုပ် မလွတ်လပ်ပါ” ဟူသည့် သတင်းစကားနှင့် မြန်မာနိုင်ငံ၏ နိုင်ငံရေး အကျဉ်းသား ပြဿနာအား နိုင်ငံတကာသို့ အသိပေး တင်ပြခဲ့ဖူးသည်။
No comments:
Post a Comment