ပြည်တွင်းတွင် ဆိုက်ဘာလုံခြုံရေး ဆောင်ရွက်ထားမှု ၂၀ ရာခိုင်နှုန်း အထိသာရှိဟု ဆို

မောင်မန်း

မြန်မာနိုင်ငံတွင် e-Government အကောင်အထည်ဖော်ဆောင်ရွက်ရန်အတွက် အရှိန်မြှင့် ဆောင်ရွက်လျက်ရှိပြီး နိုင်ငံ၏ ဆိုက်ဘာလုံခြုံရေးအတွက် ဆောင်ရွက်မှုသည် ၂၀ ရာခိုင်နှုန်း ခန့်သာရှိသည်ဟု ရန်ကုန်တိုင်းဒေသကြီး ကွန်ပျူတာပညာရှင်အသင်း နည်းပညာကော်မတီဥက္ကဋ္ဌ ဦးရဲကျော်သိန်းက မဇ္ဈိမကို ပြောသည်။

ဦးရဲကျော်သိန်းက “ eGovernment အတွက် လုပ်နေတဲ့အထဲမှာ ဆိုက်ဘာလုံခြုံရေးအတွက် လုပ်နေတာက ၂၀ ရာခိုင်နှုန်းလောက်ပဲရှိပါတယ်။ အားရစရာတော့ မရှိသေးပါဘူး” ဟု ဆိုသည်။

နိုင်ငံတော်သမ္မတက လ ၂၀ အတွင်း e-Government အကောင်အထည်ဖော်ဆောင်ရွက်ရန် လမ်းညွှန် ချက်ချမှတ်ခဲ့ပြီး နောက် ဆိုက်ဘာလုံခြုံရေးနှင့်ပတ်သတ်ပြီး လုပ်ဆောင်ရန်လိုအပ်သည်များကို တင်ပြထားခြင်း ရှိသည်ဟု ဦးရဲကျော်သိန်းက ဆိုသည်။ သို့သော်လည်း လ ၂၀ အတွင်းပြီးစီးနိုင်မည့် လုပ်ငန်းစဉ်များ ရွေးချယ် လုပ်ဆောင်ရာတွင် ဆိုင်ဘာ လုံခြုံရေးနှင့်ပတ်သက်၍ ပါဝင်ခြင်းမရှိနိုင်သေးဟုလည်း ၄င်းက ဆိုသည်။

၎င်းက “ e-Government လုပ်ဖို့ဆိုရင် လိုအပ်တဲ့ ဆိုက်ဘာလုံခြုံရေးလုပ်ငန်းတွေကို တင်ပြထားတာ တော့ ရှိတယ်။ လ ၂၀ အတွင်း လုပ်မယ့်ထဲမှာတော့ ပါဦးမှာမဟုတ်ပါဘူး” ဟုဆိုသည်။

ဆက်လက်ပြီး ၎င်းက “ လက်ရှိဒီစနစ်ကို အသုံးပြုမယ့် ၀န်ထမ်းတွေကို ဘယ်လိုတွေ လုပ်ဆောင်ရမလဲဆိုတာလည်း အသိပညာပေးလုပ်ရမယ်။ Password မေ့မှာစိုးလို့ ခုံမှာရေးမှတ်ထားတာမျိုးတွေ ကျတော့ အဆင်မပြေဘူး” ဟု ၎င်း၏အတွေ့အကြုံကို ပြောသည်။

ဆိုက်ဘာတိုက်ခိုက်မှုများတွင် နိုင်ငံအဆင့် ဆုံးရှုံးမှုမဖြစ်စေရန် ဆိုက်ဘာလုံခြုံရေးကို အလေးထားဆောင်ရွက်ရန် လိုအပ်သည်ဟုလည်း ပညာရှင်များက သုံးသပ်ကြသည်။ ပြည်တွင်း ဝန်ကြီးဌာန ၀က်ဘ်ဆိုက်များသည် ဆိုက်ဘာတိုက်ခိုက်မှုများကြောင့် ထိခိုက်မှုများ မကြာခဏ ရှိနေသည်။