Monday, February 22, 2010

သင်္ကန်းကျွန်းဈေး မီးလောင်မှု မီးသတ်နှင့်စည်ပင် မကျေလည်ဖြစ်

မျိုးချစ်သူ/ ၂၂ ဖေဖော်ဝါရီ ၂ဝ၁ဝ

သင်္ကန်းကျွန်းဈေး မီးလောင်မှုနှင့်ပတ်သက်၍ ရန်ကုန်စည်ပင်နှင့် လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေး ဦးစီးဌာနတို့အကြား မကျေမလည် ဖြစ်နေကြကြောင်း ရန်ကုန်တိုင်း မီးသတ်ဦးစီးဌာနမှ သိရသည်။

ပြီးခဲ့သည့် ဖေဖော်ဝါရီ (၁၂) ရက် ည (၇) နာရီခန့်က မီးစတင်လောင်ကျွမ်းခဲ့သည့် သင်္ကန်းကျွန်းဈေးကြီး ဆုံးရှုံးမှုများရခြင်းမှာ မီးစတင်လောင်ကျွမ်းချိန်တွင် မီးသတ်ကို သတင်းမပေးခြင်း၊ သတင်းပေးသည့်အချိန်တွင် (၂၅) မိနစ်ခန့် နောက်ကျနေခြင်း တို့ကြောင့် မီးသတ်ကားများ ရောက်ရှိချိန်တွင် မီးလောင်မှုမှာ ဆိုးရွားနေပြီဖြစ်ကြောင်း အဆိုပါ မီးသတ်ဦးစီးဌာနမှ အရာရှိကြီးတဦးက ပြောသည်။

၎င်းက “ဒါတွေအားလုံးကတော့ စည်ပင်ဈေးဌာနရဲ့ အပိုင်းဖြစ်တယ်လို့ ကျနော်မြင်တယ်။ အခုလို မီးလောင်တော့ ရန်ကုန်တတိုင်းလုံးမှာ ရှိတဲ့ မီးသတ်ကားတွေ လာပြီးငြိမ်းရတယ်။ ပြည်သူက ကျနော်တို့ မငြိမ်းနိုင်လုိ့ဘဲ မီးလောင်ပြာကျတာမျိုး ပြောတယ်။ မီးသတ်ကားဝင်ရတာ၊ မီးငြိမ်းဖို့ ရေယူရတာ၊ ပြောရရင် ရှည်သွားမယ်ဗျာ။ တခုပဲပြောချင်တယ်၊ ဈေးတွေ မီးလောင်မှုမဖြစ်အောင် ဈေးတွေက တာဝန်ယူထားတဲ့ သူတွေအပေါ်မှာပဲ မူတည်တယ်ဆိုတာပါပဲ” ဟု ပြောသည်။

ထို့အပြင် ဈေးတွင် မီးဘေးကြိုတင်ကာကွယ်မှု မလုပ်ထားကြောင်း၊ ဈေးတခုလုံးတွင် မီးသတ်ဆေးဘူး (၆) ဘူးသာရှိကြောင်း၊ ပြီးခဲ့သည့်လက ဈေးသို့ သွားရောက်စစ်ဆေးခဲ့ပြီး မီးဘေးကာကွယ်မှု လေ့ကျင့်မှုများပြုလုပ်ရန်နှင့် ဟောပြောမှုများလုပ်ရန် ခေါ်သော်လည်း ဈေးသူဈေးသားများက ဈေးရောင်းပျက်သည်ဟုဆိုကာ မလာကြကြောင်း ၎င်းက ဆက်လက်ပြောသည်။

အဆိုပါဈေးကြီး မီးလောင်ပြီးချိန်က ဆုံးရှုံးမှုတန်ဖိုးမှာ (၄၇) သိန်းဖြစ်ကြောင်း မီဒီယာများကို သတင်းထုတ်ပြန်ခဲ့သော်လည်း မီးသတ်အရာရှိကြီး၏ ပြောကြားချက်အရ (၇၃) သန်းကျော် ဆုံးရှုံးကြောင်း၊ ယင်းမီးကြောင့် ဈေးအနီးအိမ် (၂) လုံးနှင့် ဈေးတွင်းရှိ ဆိုင်ခန်းပေါင်း (၇၈၆) ခန်းအနက် (၆၅၁) ခန်း မီးလောင်ပျက်စီးသွားကြောင်း သိရသည်။

၂၀၁၀ ပြည့်နှစ် ဇန်န၀ါရီလအတွင်း မြန်မာတနိုင်ငံလုံးတွင် မီးလောင်မှုပေါင်း (၈၉) ကြိမ်ဖြစ်ပွားရာတွင် ရန်ကုန်တိုင်း၌ (၂၆.၂၅) ရာခိုင်းနှုန်းဖြင့် အများဆုံးဖြစ်ပွားခဲ့ကြောင်း ရန်ကုန်တိုင်း မီးသတ်ဦးစီးဌာနက တရားဝင်ထုတ်ပြန်ထားသည်။

ယင်းတို့အနက် မီးဖိုမီးနှင့် ပေါ့ဆမီး (၆၅) ကြိမ်၊ အလိုအလျောက်မီး (၁) ကြိမ်၊ လျှပ်စစ်မီး (၁၁) ကြိမ်၊ မသမာသူရှို့မီး (၁၁) ကြိမ်၊ တောမီး (၁) ကြိမ်တို့ ပါဝင်ကြောင်း သိရသည်။

အဆိုပါဈေး မီးလောင်ကျွမ်းမှုသည် ရှို့မီးဖြစ်နိုင်ဖွယ် ရှိသည်ဟုလည်း ဈေးသူဈေးသားများက သံသယဖြစ်ခဲ့ပြီး ဈေးတခု အသစ်ပြန်ဆောက်ပါက သိန်းပေါင်း ထောင်နှင့်ချီကုန်ကာ တာဝန်ခံတည်ဆောက်သော အင်ဂျင်နီယာတို့ ငွေကြေး တွက်ခြေကိုက်သောကြောင့် လုပ်ဇာတ်ခင်းလိုက်သည်ဟုလည်း ဈေးသူဈေးသားတို့က ထင်ကြေးပေးခဲ့ကြသည်။

မီးဘေးကြိုတင်ကာကွယ်မှုများ ပြုလုပ်ရန် သတိပေးသော်လည်း အဆိုပါဈေး၏ တာဝန်ရှိသူတို့က မပြုလုပ်ခဲ့ကြောင်း မီးသတ်အရာရှိက ပြောကြားသော်လည်း ဈေးတာဝန်ရှိသူများဘက်မှမူ ယခုအချိန်အထိ တစုံတရာ ပြန်လည်ဖြေရှင်းခြင်း မရှိသေးပေ။

ရန်ကုန်မြို့မှ အိမ်ခြံမြေ စီးပွားရေးလုပ်ငန်းရှင်တဦးက “အဲဒီသင်္ကန်းကျွန်းဈေး မီးမလောင်ခင်ကတည်းက မြို့တော်ဝန်က ဆောက်လုပ်ရေးကုမ္ပဏီတချို့ကို (၄) ထပ်ဈေး ဆောက်မယ့်ကိစ္စ မေးမြန်းဆွေးနွေးနေတာ ကြားတယ်။ အခု ဈေးမီးလောင်ပြီးလို့ (၃) ရက်လောက်အကြာမှာ သူက ဈေးကြီးဆောက်မယ်၊ အားလုံးပြင်ထားပြီးပါပြီ ပြောလိုက်တော့ ပိုပြီးသံသယပွားလာကြတယ်။ ဒါဟာ ရှို့မီးဆိုပြီး ပြောလာကြတယ်” ဟု ပြောသည်။

No comments: