ရန်ပိုင် Monday, 01 November 2010
ဒေါ်အောင်ဆန်းစုကြည်ပုံနှင့် မဲမပေးရေးစာတန်းပါ ပို့စတာများကပ်ပြီး ရွေးကောက်ပွဲ ဆန့်ကျင်ရေး လှုပ်ရှားမှုတခု ပဲခူးတိုင်း အနောက်ခြမ်း ပြည်မြို့နှင့် တခြားသော မြို့ပေါင်း ၁၀ မြို့ခန့်၌ တပြိုင်တည်း ပြုလုပ်ကြောင်း သတင်းရရှိသည်။
စစ်အာဏာရှင်စနစ် သက်ဆိုးရှည်စေမည့် လာမည့် ရွေးကောက်ပွဲကို ပြည်သူများအနေဖြင့် မဲမပေးရန်အတွက် ရွေးကောက်ပွဲ ဆန့် ကျင်သည့် ပို့စတာများကပ်၍ လှုပ်ရှားမှုပြုလုပ်ရခြင်းဖြစ်သည်ဟု ဦးဆောင်ပြုလုပ်ခဲ့သည့် အဖွဲ့ဝင်တဦးက ဧရာဝတီသို့ ပြောသည်။
“မဲမပေးတာကလည်း ပြည်သူ့အခွင့်အရေးလေ၊ ဒါကြောင့် ပြည်သူတွေ မိမိတို့ အခွင့်အရေးကိုသိဖို့ လှုံ့ဆော်ရတာပါ”ဟု ၎င်းကဆို သည်။
ယင်းလှုပ်ရှားမှုကို ကျောင်းသားများ ဦးဆောင်သည့် ဘွိုင်းကောက် -၂၀၁၀ (Boycott-2010) အဖွဲ့က ပြုလုပ်ခဲ့ခြင်း ဖြစ်ပြီး ပြည်မြို့ တွင်ပင် စာရွက်ပေါင်း ၂၀၀၀ ကျော် ကပ်ခဲ့သည်ဟု ယင်း အဖွဲ့ ကပြောသည်။
ထို ပို့စတာများတွင် ဒေါ်အောင်ဆန်းစုကြည်၏ ဓာတ်ပုံ နဖူးစည်းတွင် ရွေးကောက်ပွဲကို မဲမပေးခြင်းဖြင့် ဆန့်ကျင်သပိတ်မှောက်ကြ ဆိုသည့်စာတန်း၊ မဲမပေးခြင်းသည်လည်း ဥပဒေအရ အခွင့်အရေးဆိုသည့် စာတန်းနှင့် စစ်ကျွန်ပြုမည့် ၂၀၁၀ ရွေးကောက်ပွဲကို ဆန့်ကျင်သပိတ်မှောက်ကြ ဆိုသည့် စာတန်းသုံးမျိုးကို ပြည်မြို့နှင့် တခြားမြို့များ၏ လူစည်ကားရာ အချက်အချာကြသည့် နေရာ အနှံ့တွင် ကပ်ခဲ့ခြင်းဖြစ်သည်။
ယင်းလှုပ်ရှားမှုနှင့် ပတ်သက်၍ အာဏာပိုင်များ၏ ဖမ်းဆီးခြင်းကို အဖွဲ့ဝင် တဦးတယောက်မှ မခံရကြောင်း အဆိုပါ အဖွဲ့ဝင်က ဆက်ပြောသည်။
ပြည်- ရန်ကုန် ကားလမ်းတလျှောက်ရှိ ပြည်၊ ရွှေတောင်၊ ပေါင်းတည်၊ နတ္တလင်း ဇီးကုန်း၊ ကြို့ပင်ကောက်၊ အုတ်ဖို၊ လက်ပံတန်း၊ သာယာဝတီ- သုံးဆယ်၊ သဲကုန်း၊ ပုတီးကုန်း၊ ဆင်မြီးဆွဲ၊ ပေါင်းတလည်၊ ပန်းတောင်း၊ ဥသျှစ်ပင်မြို့များနှင့် မကွေးတိုင်းအတွင်းရှိ အောင်လံ၊ ကမ္မမြို့နယ်များတွင် ရွေးကောက်ပွဲဆန့်ကျင်ရေး လှုပ်ရှားမှု ပြုလုပ်ကြခြင်း ဖြစ်ကြောင်း သိရသည်။
ပြည်မြို့ခံတဦးကလည်း“ရွေးကောက်ပွဲ ဆန့်ကျင်တဲ့ စာတန်းတွေ တမြို့လုံးနေရာအနှံ့ အများကြီး ကပ်ထားတယ်၊ ဓာတ်တိုင် အမြင့် ပေါ်မှာ ကပ်ထားတဲ့ဟာတွေကို ရဲတွေက ယူနီဖောင်းနဲ့ တက်ခွာနေရတော့ လူတွေက ပိုအာရုံစိုက်ခံ ရတာပေါ့”ဟု ဆိုသည်။
ထို စာရွက်များကို ရဲများက နံနက် ၇ နာရီခန့်တွင် လိုက်လံခွာယူနေကြောင်း၊ ဓာတ်တိုင်၊ ကြော်ငြာ ဆိုင်းဘုတ်၊ ဖုန်းရုံ၊ ဘုရားနံရံနှင့် လူအများမြင်သာသည့် အမြင့်နေရာများတွင် ကပ်ထားသည်ဟု အဆိုပါ ပြည်မြို့ခံက ဆက်လက်ပြောသည်။
ပြည်မြို့ရှိ ဈေးကြီး၊ လမ်းမတော်၊ လမ်းရှည်လမ်း၊ ဗိုလ်ချုပ်လမ်း၊ ရွှေဘုန်းပွင့်ဘုရား၊ မြို့သစ် အဝေးပြေး ကားဂိတ်၊ ဘုရားကြီး ဘုရား၊ တာဂွ၊ တီတွဒ် ကျေးရွာအထိ အဆိုပါ စာရွက်များကို ကပ်ထားကြောင်း သိရသည်။
သာယာဝတီမြို့နှင့် သုံးဆယ်မြို့ရှိ အချက်အချာကြသည့် ဗိုလ်စိန်မှန်တံတား၊ သာယာဝတီဈေးကြီး၊ ဗလီရှေ့၊ ကားဂိတ်တို့တွင် သာယာဝတီမြို့ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေး ရုံးရှေ့တွင်လည်း ပြုလုပ်ခဲ့သည်ဟု သာယာဝတီမြို့ခံ တဦးကလည်း ပြောသည်။
လာမည့် နိုဝင်ဘာ ၇ ရက်နေ့ ရွေးကောက်ပွဲကို တနိုင်ငံလုံးအနှံ့ ဆန့်ကျင်သည့် လှုပ်ရှားမှုများကို လူငယ်များက တီရှပ်များ ၀တ် ၍လည်းကောင်း၊ စာရွက်စာတမ်းများ ဖြန့်ဝေခြင်းဖြင့်လည်းကောင်း ပြုလုပ်နေရာ ယခုကဲ့သို့ မြို့ပေါင်း အမြောက်အမြားတွင် တပြိုင်နက်တည်း ပြုလုပ်ခြင်းသည် ပထမဆုံး အကြိမ် ဖြစ်ကြောင်း သိရသည်။
No comments:
Post a Comment