Thursday, June 27, 2013

မူးယစ် တိုက်ဖျက် ရေး၌ အစိုးရ သည်သာ ပျက်ကွက်ဟု တိုင်းရင်းသား များကဆို

ဖြူဖြူကို

အစိုးရသည် မူးယစ်ဆေးဝါး တိုက်ဖျက်ရေးတွင် တိုင်းရင်းသား အဖွဲ့များနှင့် ပူးပေါင်း ဆောင်ရွက်မှု မရှိသည့် အတွက်ကြောင့် မူးယစ် ဆေးဝါးများ ထိန်းချုပ်ရန် အခက်အခဲ ရှိနေခြင်းသာ ဖြစ်ကြောင်း ယနေ့ ကျရောက်သော အပြည်ပြည် ဆိုင်ရာ မူးယစ် အလွဲသုံးမှုနှင့် တရားမ၀င် ရောင်းဝယ်မှု တိုက်ဖျက်ရေး နေ့တွင် ရှမ်းပြည်ပြန်လည် ထူထောင်ရေး ကောင်စီ (RCSS) မှပြောရေး ဆိုခွင့်ရှိသူ ဗိုလ်မှူး စိုင်းလောဝ်ဆိုင်က ဆိုပါသည်။

“ကျနော်တို့ ဆိုရင် မူးယစ်ဆေးဝါး တိုက်ဖျက်ရေး နေ့ကို ဒီနှစ်မှာ အခမ်းအနားနဲ့  ပြုလုပ် နိုင်တော့မှာ မဟုတ် တော့ဘူး ဘာကြောင့်လဲ ဆိုတော့ ဒီနှစ်မှာ ခုထိ အစိုးရ ဖက်က ပူးပေါင်းမှု အပိုင်း မရှိသေးတဲ့ အတွက်ကြောင့် ဖြစ်တယ်။ ဘာမှ အကောင်ထည် ဖော်လို့မရတဲ့ အတွက်ကြောင့် ဖြစ်တယ်။ တပ်စခန်း လောက်မှာဘဲ အခမ်းအနား လုပ်မှာပါ” ဟု ဆိုပါသည်။

အစိုးရသည် တိုင်းရင်းသား လက်နက်ကိုင် အဖွဲ့ငယ် များဖြင့် ပူးပေါင်း ဆောင်ရွက် လိုစိတ် မရှိကြောင်း၊ ၄င်းတို့သည် UNODC အဖွဲ့ နှင့်သာ လုပ်လိုကြောင်း၊ တိုင်းရင်းသား အဖွဲ့များနှင့် ပူးပေါင်း လုပ်ဆောင်လျှင် အဆင့်အတန်း ပေးလိုက် မိသလို ဖြစ်နေမယ် ဆိုပြီး စိုးရိမ် နေကြဟန် ရှိကြောင်း ဗိုလ်မှူး စိုင်းလောဝ်ဆိုင်က ဆိုပါသည်။

RCSS သည် မူးယစ်ဆေးဝါး ပူးပေါင်း တိုက်ဖျက်ရန် အပစ်အခတ် ရပ်စဲစဉ် ကတည်းက အဆိုပြု ထားသော်လည်း ယနေ့ အထိ အကောင်အထည် ဖေါ်ခြင်း မရှိသေးပေ။ ကုလ သမဂ္ဂ မူးယစ် တိုက်ဖျက်ရေး အဖွဲ့ (UNODC) ကမူ မူးယစ်ဆေးဝါး တိုက်ဖျက် ရာတွင် RCSS ၏ ပါဝင်မှုကို လိုလား သည်ဟု ဆိုပါသည်။

အလားတူ ပလောင်ပြည် လွတ်မြောက်ရေး တပ်ဦး( PSLF) သည်လည်း တအာင်းဒေသ မူးယစ်ဆေးဝါး ပပျောက်ရန် စီမံကိန်း ချပြီး လုပ်ဆောင် နေသည်ဟု အတွင်းရေးမှူး ဖြစ်သူ တာအိုက်ဖုန်းက ဆိုပါသည်။

“အစိုးရ ကတော့ သူတို့ ဖမ်းဆီး ရမိတဲ့ မူးယစ် ဆေးဝါးတွေကို မီးရှို့ ပြတာဟာ နှစ်တိုင်း လုပ်နေကျပါ။ ဒါပေမယ့် နိုင်ငံ တကာကို ပြစား ဖို့ အတွက် လောက်ဘဲ ဖြစ်မယ်။ ဘာကြောင့်ပြောရသလဲ ဆိုရင် တအာင်း ဒေသမှာက မူးယစ် ဆေးဝါး ဖြန့်ဖြူး နေတဲ့ သူတွေဟာ သူတို့ရဲ့ ပြည်သူ့ စစ်တွေ၊ ဥပမာ ပန်ဆေး ကျော်မြင့်ဆိုရင် အစိုးရရဲ့ ပြည်သူ့လွှတ်တော် အမတ်တောင် ဖြစ်နေတယ်။ ဒါကိုကြည့်ရင် သိသာပါတယ်။ ဒီတော့ အစိုးရ ကိုယ်နှိုက်က မူးယစ် စိုက်ပျိုး ရောင်းချ နေတဲ့ သူတွေကို အားပေး နေတယ်” ဟု ဆိုပါသည်။

PSLF ၏ မှတ်တမ်း များအရ ပြီးခဲ့သည့် (၂၀၁၂) ခုနှစ်တွင် တအာင်းဒေသ၏ ဘိန်းစိုက်ပျိုး ထုတ်လုပ်မှုသည် စိုက်ပျိုး မြေ၏ ၆၀ ရာနှုန်း ရှိခဲ့ရာမှ ယခုနှစ်တွင် ၈၀ ရာခိုင်းနှုန်း အထိ တိုးလာ ခဲ့ပါသည်။ ဤသည် (၁၀) စုနှစ် အတွင်း (၆)ရာ နှုန်းသာ ရှိခဲ့ရာမှ တိုးလာခြင်း ဖြစ်ပါသည်။

ဤသို့သော အခြေအနေ များကြောင့် PSLF သည် ၂၀၁၁ ခုနှစ်မှ စပြီး ဘိန်းတိုက်ဖျက်ရေး အတွက် (၅)နှစ် စီမံကိန်း တရပ် အကောင်အထည် ဖေါ်ခဲ့ပါသည်။ သို့သော် ဘိန်းစိုက်ပျိုးမှုကို အစိုးရ ပြည်သူ့စစ် အဖွဲ့ များနှင့် ဒေသခံ တပ်များက အကာအကွယ် ပေးနေသဖြင့် မကြာခဏ ရင်ဆိုင် တိုက်ပွဲများ ဖြစ်ပွား ခဲ့ကြောင်း ဆိုပါသည်။

PSLF သည် ဘိန်းစိုက်ပျိုးသူ တောင်သူများအား ပညာပေးခြင်း၊ ဘိန်းခြံများနှင့် ဘိန်းချက် စက်ရုံများ ဖျက်ဆီးခြင်းနှင့် ရောင်းဝယ် ဖေါက်ကားသူများကို အရေးယူခြင်းနည်းဖြင့် တိုက်ဖျက်နေပါသည်။ သို့သော် PSLF လက်လှမ်း မမှီသော နေရာ များ၌ ဘိန်းသုံးစွဲမှုများ ပိုမို တိုးတက် လာကြောင်း ဆိုပါသည်။

ထို့အတူ ကယားပြည်နယ်တွင်လည်း ကယောနှင့် ကယန်း လူမျိုးများ နေထိုင်သော ကယားပြည်နယ်နှင့် ရှမ်းပြည်နယ် နယ်စပ်တွင် ဘိန်းစိုက်ပျိုး ကြသည်ဟု ကရင်နီအမျိုးသား တိုးတက်ရေး ပါတီ ဒုတိယ ဥက္ကဌ ခူဦးရယ်က ဆိုပါသည်။

ဘိန်းစိုက်ပျိုး မှုသည် ၀င်ငွေ ကောင်းသော လုပ်ငန်း ဖြစ်သဖြင့် အလုပ်အကိုင် ရှားပါးသော မိသားစု များအတွက် ငွေရ လွယ်သော လုပ်ငန်းမျိုး ဖြစ်နေသောကြောင့် စိုက်ပျိုး ထုတ်လုပ်မှု အပိုင်းတွင် တဖြည်းဖြည်း များလာ နေကြောင်း ဆိုပါသည်။

“တိုက်ဖျက်ရေး အပိုင်း မှာက ကျနော်တို့နဲ့ အစိုးရ ပူးပေါင်းပြီးတော့ ဘယ်တော့ စပြီး တိုက်ဖျက် နိုင်မလဲ ဆိုတဲ့ အပေါ်မှာ အရေးကြီး နေတာပါ။ ခက်တာက အစိုးရ ဘက်ကလည်း အရေးယူ ဆောင်ရွက်တဲ့ အပိုင်းမှာ သူတို့ပဲ ကိုင်တွယ် ချင်တဲ့ သဘောမှာ ရှိနေပါတယ်။ ဒီနေရာမှာ ပြောချင်တာက UNODC နဲ့ အစိုးရနဲ့ ကျနော်တို့ ပူးပေါင်း အကောင်အထည် ဖေါ်ရင်တော့ အကောင်းဆုံး ဖြစ်မှာပါ” ဟု ဆိုပါသည်။

KNPP သည် မူးယစ်ဆေးဝါး တိုက်ဖျက်ရေး အတွက် အစိုးရနှင့် ညှိနှိုင်းနေဆဲ ဖြစ်ကြောင်း၊ စီမံကိန်းကို (၅) နှစ်မှ (၁၀) နှစ်အထိ လျှာထားကြောင်း၊ ဆိုပါသည်။ ကယားပြည်နယ်၏ ဘိန်းစိုက်ပျိုး ထုတ်လုပ် မှုသည် ၁၉၉၆- ၉၇ ခုနှစ်မှစတင် လာပြီး စိုက်ပျိုးလာရာ တဖြည်းဖြည်း များပြား လာသည့် အပြင် သုံးစွဲသူ လူငယ် များလည်း များပြား လာသည်ဟု ဆိုပါသည်။

အလားတူ ရှမ်းပြည် တိုးတက်ရေး ပါတီ (SSPP) နယ်မြေတွင်လည်း ဘိန်းစိုက်ပျိုးမှုများ တိုးလာနေသည့် အတွက် အပစ်အခတ် ရပ်စဲပြီးနောက် ပိုင်း တိုက်ဖျက်ရန် အစိုးရနှင့် ညှိနှိုင်းခဲ့သော်လည်း လက်တွေ့ အကောင် အထည် မဖေါ်နိုင် သေးကြောင်း ဆိုပါသည်။

အစိုးရသည် မူးယစ်ဆေးဝါး တိုက်ဖျက်ရေး အခမ်းအနား များကို နှစ်စဉ် ကျင်းပ လာခဲ့ပါသည်။ အစိုးရ၏ တိုက်ဖျက် မှုများသည်လည်း လူကြား ကောင်းရုံသာ ဘန်းပြပြီး လူမျိုးစု လက်နက်ကိုင် အဖွဲ့ များကိုသာ အပြစ်တင် စွပ်စွဲလေ့ ရှိပါသည်။ တကယ် လက်တွဲ၍ တိုက်ဖျက်မည် ဆိုလာလျှင် နောက်ဆုတ် တတ်ပါသည်။ ဤသို့ကြောင့် အစိုးရ၏ မူးယစ် ဆေးဝါး တိုက်ဖျက်မှု အစီစဉ် သည် UN ၏ မူးယစ်ဆေးဝါး တိုက်ဖျက်ရေး ရံပုံငွေ ရယူရေး ကိုသာ ဦးတည် ဆောင်ရွက် ခဲ့ခြင်းသာ ဖြစ်ကြောင်း ဆိုကြပါသည်။

No comments: