အရင်တုန်းကတော့ တိုက်ရိုက်ရင်းနှီးမြုပ်နှံမှုက တန်ဖိုးအားဖြင့် ဒေါ်လာ ၄ ဘီလီယံလောက်ပဲ ရှိမယ်လို့ ခန့်မှန်းကြပေမယ့် အခုလောလောဆယ် ၃.၃၂ ဘီလီယံ ရှိနေတဲ့အတွက် ဒေါ်လာ ၅ ဘီလီယံကျော် ရှိနိုင်တယ်လို့ မြန်မာနိုင်ငံ ရင်းနှီးမြုပ်နှံရေးကော်မရှင်အတွင်းရေးမှူး ဦးအောင်နိုင်ဦးက ပြောပါတယ်။
နိုင်ငံရေးနဲ့ စီးပွားရေး ပြုပြင်ပြောင်းလဲမှု တချို့ ဖြစ်ပေါ်ပြီးနောက်ပိုင်း အခုလို တိုက်ရိုက်နိုင်ငံခြား ရင်းနှီးမြုပ်နှံမှု တိုးတက်လာတာပါ။
နိုင်ငံတကာက သူတို့ရဲ့ ဒဏ်ခတ်ပိတ်ဆို့မှု အတော်များများကို ရုပ်သိမ်းပေးပြီးနောက် စီးပွားရှင်တွေကလည်း ရင်းနှီးမြုပ်နှံမှု ပိုမို လုပ်နေကြတာ ဖြစ်ပါတယ်။
အခုလောလောဆယ် ရင်းနှီးမြုပ်နှံမှု အများဆုံးကဏ္ဍက တယ်လီဖုန်းဆက်သွယ်ရေး ကဏ္ဍဖြစ်ပြီး စုစုပေါင်း ရင်းနှီးမြုပ်နှံမှုရဲ့ ၃၁% ဖြစ်ပြီး ရေနံနဲ့ သဘာဝဓာတ်ငွေ့က ၂၃.၈% ဖြစ်ပြီး အိမ်ခြံမြေ လုပ်ငန်းမှာ ၁၃ % ကျော်နဲ့ ကုန်ထုတ်လုပ်ရေးမှာ ၈% ကျော် ရင်းနှီးမြုပ်နှံကြတာ ဖြစ်ပါတယ်။ လွန်ခဲ့တဲ့ သုံး လေးနှစ်တုန်းကတော့ တိုက်ရိုက် ရင်းနှီးမြုပ်နှံမှုက ဒေါ်လာ သန်းပေါင်း ၃၂၉ လောက် ရှိရာကနေ ၅ ဘီလီယံလောက် ခုန်တက်လာတာ ဖြစ်ပါတယ်။
အခုလို တိုးတက်မှုတွေ ရှိလာပေမယ့် အိမ်နီးချင်းနိုင်ငံတွေနဲ့ ယှဉ်ရင် အတော်လေး နောက်ကျနေပြီး ထိုင်းနိုင်ငံရဲ့ တိုက်ရိုက် ရင်းနှီးမြုပ်နှံမှုဟာ ၆ လအတွင်း ဒေါ်လာ ၆.၈ ဘီလီယံ တန်ဖိုးရှိနေသလို ဗီယက်နမ်မှာတော့ ၈ လအတွင်း ဒေါ်လာ ၇.၉ ဘီလီယံလောက် ရှိနေပြီလို့ ရိုက်တာသတင်းမှာ ဖော်ပြထားပါတယ်။
No comments:
Post a Comment