ABC
မြန်မာနိုင်ငံ လျှပ်စစ်စွမ်းအင်ဆိုင်ရာ ဝန်ကြီးဌာနနဲ့ ထိုင်းလျှပ်စစ်ကုမ္ပဏီတို့က မကွေးခရိုင် မင်းဘူးမြို့မှာ မီက္ကာဝပ် အင်အား ၂၂၀ ထုတ်လုပ်နိုင်မယ့် နေစွမ်းအင်စက်ရုံ တည်ထောင်ဖို့ တရားဝင် သဘောတူညီမှု စာချွန်လွှာ လက်မှတ်ရေးထိုးခဲ့ကြပါတယ်။
မြန်မာနိုင်ငံမှာ နေစွမ်းအင်ကနေ စွမ်းအင်တွေ အမြဲတမ်း ရရှိနိုင်တဲ့ အခြေအနေရှိတာကြောင့် မြန်မာနိုင်ငံရဲ့ စွမ်းအင် လိုအပ်ချက်ကို ရေရှည်မှာလည်း ဖြေရှင်းပေးနိုင်မယ့် စွမ်းအင်ဖြစ်တယ်လို့ ထိုင်းနိုင်ငံ Green Earth Power ရဲ့ ညွန်ကြားရေးမှူးချုပ် ဦးအောင်သီဟက The Nation သတင်းကို ပြောသွားခဲ့ပါတယ်။
အဲဒီနည်းက ရေနံတွေ၊ ကျောက်မီးသွေးတွေ မလုံလောက်မှုတွေ ဖြစ်နေတဲ့အခါ နေစွမ်းအင်ကို အစားထိုး အသုံးပြုနိုင်မှာ ဖြစ်တယ်လို့လည်း ပြောပါတယ်။
ဆွေးနွေးမှုတွေ တနှစ်ခွဲလောက် အဆင့်ဆင့် ပြုလုပ်ပြီးပြီ ဖြစ်တဲ့အတွက် မကြာခင်မှာ စီမံကိန်း အကောင်အထည် စတင်ဖော်တော့မယ်လို့လည်း ဖော်ပြထားပါတယ်။
မင်းဘူးမြို့ နေစွမ်းအင် စက်ရုံက အကျယ်အဝန်းအားဖြင့် ဟက်တာ ၃၄၄ လောက်ရှိမှာဖြစ်ပြီး နေပြည်တော်နဲ့ ကီလိုမီတာ ၂၀၀ အကွာအဝေးလောက်မှာ ရှိတာ ဖြစ်ပါတယ်။
လပေါင်း ၃၀ အတွင်း အဆင့်လေးဆင့်နဲ့ တည်ဆောက်သွားမှာဖြစ်ပြီး အဲဒီအတွက် ဒေါ်လာ သန်းပေါင်း ၃၅၀ လောက် ကုန်ကျမယ်လို့ ခန့်မှန်းထားကြပါတယ်။
အဲဒီစီမံကိန်းကနေ လူပေါင်း ၇၀၀ လောက်ကို အလုပ်အကိုင်ပေးမှာ ဖြစ်သလို အဲဒီစွမ်းအင်ကနေ ဒေသတွင်း စီးပွားရေးကို အထောက်အကူ ဖြစ်စေနိုင်တယ်လို့လည်း ဖော်ပြထားပါတယ်။
ဒီနေစွမ်းအင် စက်ရုံဟာ ကမ္ဘာ့ တတိယအကြီးမားဆုံး နေစွမ်းအင် စက်ရုံ ဖြစ်မယ်လို့လည်း မြဝတီ သတင်းမှာ ဖော်ပြထားပါတယ်။
အခုလောလောဆယ် မြန်မာနိုင်ငံရဲ့ လျှပ်စစ်ထုတ်လုပ်နိုင်မှု ပမာဏာဟာ ၂၅၀၀၀ မီက္ကာဝပ် အင်အားသာရှိပြီး ၂၀၃၀ ပြည့်နှစ်မှာ ၃၀၀၀၀ ထုတ်လုပ်နိုင်ဖို့ မြန်မာအစိုးရက ကြိုးစားနေတာ ဖြစ်ပါတယ်။
အခုလောလောဆယ် မြန်မာနိုင်ငံရဲ့ စွမ်းအင်ရဲ့ ၇၀%ကို ရေအားပေးစက်ကနေ အများဆုံးရရှိတာဖြစ်ပြီး ဓာတ်ငွေ့ကနေ ၂၀%နဲ့ ကျောက်မီးသွေးကနေ ၁၀% လောက် ရရှိနေတာလို့လည်း သိရပါတယ်။
မြန်မာနိုင်ငံရဲ့ လူဦးရေ တစ်ဝက်ကတောင် လျှပ်စစ်မီး မရှိပဲ နေထိုင်နေရတာဖြစ်ပြီး ကျေးလက်ဒေသမှာတော့ လူဦးရေ ၄% လောက်ကသာ လျှပ်စစ်မီး ရရှိကြတယ်လို့လည်း ဆိုပါတယ်။
No comments:
Post a Comment