ကိုပါကြီး သတ်ဖြတ်ခံရမှု အမှုမှန်ပေါ်ပေါက်ရေးအတွက် ရန်ကုန်မြို့၊ မြို့တော်ခန်းမရှေ့တွင် ၈၈ မျိုးဆက် (ငြိမ်းချမ်းရေးနှင့် ပွင့်လင်းလူ့အဖွဲ့အစည်း)၊ Generation Wave ၊ နိုင်ငံရေးအကျဉ်းသားဟောင်းများအဖွဲ့၊ တက္ကသိုလ် ကျောင်းသား များ သမဂ္ဂ၊ လူ့ဘောင်သစ်ဒီမိုကရက်တစ်ပါတီ အပါအ၀င် အဖွဲ့အစည်းပေါင်း ၄၆ ခုက စုဝေးတောင်းဆိုခဲ့သော်လည်း ကျောက်တံတား မြို့နယ်ရဲစခန်းက Generation Wave အဖွဲ့ခေါင်းဆောင် ကိုမိုးသွေးနှင့်အဖွဲ့ဟု အမည်တပ်ကာ အမှုဖွင့် လိုက်ခြင်းဖြစ်ကြောင်း ကျောက်တံတားမြို့နယ်ရဲစခန်းမှ သိရှိရသည်။
“ကိုမိုးသွေးနဲ့ အဖွဲ့ကို ပုဒ်မ ၁၈နဲ့ အမှုဖွင့်ထားတယ်။ ဘယ်သူတွေပါမလဲဆိုတာကိုတော့ အခု စီစစ်နေဆဲပဲ ရှိပါသေး တယ်”ဟု ကျောက်တံတား ရဲစခန်းမှ တာဝန်ကျရဲအရာရှိတဦးက ဧရာဝတီသို့ ပြောကြားသည်။
ကိုမိုးသွေးကလည်း ပုဒ်မ ၁၈ ဖြင့် မိမိကို အမှုဖွင့်ထားသည်မှာ မှန်ကန်ကြောင်း ကျောက်တံတားမြို့နယ်ရဲစခန်းထံ စုံစမ်း မေးမြန်းချက်အရ သိရှိရသော်လည်း လက်ရှိအချိန်အထိ မိမိကို တစုံတရာ အကြောင်းကြားခြင်းမရှိသေးဟု ဧရာဝတီသို့ ပြောသည်။
“ရဲစခန်းက ဟုတ်တယ်လို့ ပြောတယ်။ ဒါနဲ့ သောကြာနေ့က ဆန္ဒပြခွင့် တင်ထားတဲ့ စာမှာ လိပ်စာပါတယ်။ အဲဒီလိပ်စာ အတိုင်း ကျနော့်ကို တရားစွဲဆိုထားကြောင်း တရားဝင်စာပို့ပါလို့ ပြောလိုက်တယ်။ ဒါနဲ့ ဖုန်းနံပါတ် တလုံးပေးတယ်။ အဲဒီကို ဆက်ကြည့်တော့ ဖုန်းလုံးဝဆက်မရဘူး။ ဒါနဲ့ ကျနော် နဂိုဆက်တဲ့ ဖုန်းကိုပဲ တောက်လျှောက်ဆက်တော့မှ ဖုန်းကိုင်ပြီး စခန်းမှူး မရှိသေးပါဘူးလို့ ပြောတယ်။ ဒါကြောင့် ပုဒ်မ ၁၈ နဲ့ အမှုဖွင့်ထားတဲ့ ကိစ္စကို ကျနော် ဘာမှ မသိရသေးပါဘူး” ဟု ကိုမိုးသွေးက ဆိုသည်။
ရန်ကုန်မြို့တော်ခန်းမရှေ့ ဆန္ဒထုတ်ဖော်ပွဲတွင် ၈၈ မျိုးဆက်ကျောင်းသားခေါင်းဆောင် ကိုကိုကြီး၊ မင်းကိုနိုင်တို့က မိန့်ခွန်း ပြောဆိုခဲ့ရာ ဆန္ဒထုတ်ဖော်သူများကို ပုဒ်မ ၁၈ ဖြင့် ကျောက်တံတားရဲစခန်းက အမှုဖွင့်ထားခြင်းနှင့်ပတ်သက်၍ သဘော ထားမှတ်ချက် တစုံတရာ မပေးလိုဟု ၈၈ မျိုးဆက်ကျောင်းသားခေါင်းဆောင် ကိုပြုံးချိုက ပြောဆိုသည်။
ကိုပါကြီးသေဆုံးမှုသည် လူ့အခွင့်အရေး ချိုးဖောက်မှုဖြစ်ပြီး ယခင်စစ်အစိုးရ၏ အကျင့်ဆိုးများကို ပြင်ဆင်ခြင်း မရှိသေးကြောင်း ၈၈ မျိုးဆက်ကျောင်းသားခေါင်းဆောင်များက ရန်ကုန်မြို့ ဆန္ဒထုတ်ဖော်ပွဲတွင် ပြောဆိုခဲ့ကြသည်။
လူမှုအဖွဲ့အစည်း ၄၆ ခုကလည်း ကိုပါကြီးသေဆုံးမှုနှင့်ပတ်သက်၍ ပူးတွဲ ကြေညာချက်တစောင် အောက်တိုဘာလ ၂၆ ရက်နေ့ တွင်ထုတ်ပြန်လိုက်ပြီး ယင်းကြေညာချက်တွင် လက်နက်ကိုင် အဖွဲ့အစည်းနှင့် ချိတ်ဆက်မှု ရှိသည်ဟု ဆိုကာ စစ်တပ်က ဖမ်းဆီးချုပ်နှောင်ရာတွင် တရားရုံး၏ ချုပ်နှောင်ခွင့်ပြုမှု မရယူခြင်း ၊ ဥပဒေဖြင့် အကာအကွယ် မပေးခဲ့ခြင်း၊သေဆုံးသွားခဲ့ခြင်းကို သေဆုံးပြီး သီတင်းနှစ်ပတ်ကျော်မှ သတင်းထုတ်ပြန်ပေးခြင်း၊ အလောင်းကို ဖျောက်ဖျက်ခြင်း စသည့် သံသယဖြစ်စရာများ ရှိနေသောကြောင့် အမှုမှန်ဖော်ထုတ်ပေးရန် တောင်းဆိုထားသည်။
No comments:
Post a Comment