ALA ခေါ် ရခိုင်ပြည် လွှတ်မြှောက်ရေး တပ်မတော်နှင့် နအဖ စစ်တပ်တို့အကြား ဖေဖေါ်ဝါရီ ၁၁ ရက်နေ့က ပလက်ဝမြို့နယ်အတွင်း တိုက်ပွဲ ဖြစ်ပွားရာ နအဖ စစ်တပ်မှ တဦးကျဆုံးပြီး နှစ်ဦး ဒဏ်ရာ ရရှိသွားသည်။ ရခိုင်ပြည်လွှတ်မြောက်ရေး ပါတီ စည်းရုံးရေးနှင့် ပြန်ကြားရေးဌာန တာဝန်ခံ ခိုင်ထွန်းလင်းက နအဖ ဘက်မှ တဦးကျဆုံးပြီး နှစ်ဦးဒဏ်ရာ ရရှိသွားခြင်းကို ယခုကဲ့သို့ အတည်ပြု ပြောကြားသည်။
“ တိုက်ပွဲက ကျွန်တော်တို့ ရခိုင်ပြည်လွှတ်မြှောက်ရေးတပ်မတော်က တပ်ခွဲမှူး ဗိုလ်ခိုင်ကျော်မိုးထွန်း ဦးစီတဲ့ တပ်ဖွဲ့နဲ့ ဘူးသီးတောင် အခြေစိုက် ခမရ ၂၆၃ တပ်ရင်းက တပ်ဖွဲ့တဖွဲ့တို့ ပလက်ဝမြို့နယ် ပြိုင်ဇော်ရွာ အနီးမှာ တွေ့ဆုံတိုက်ပွဲ ဖြစ်ပွားခဲ့တာ ဖြစ်ပါတယ်။ ကျွန်တော်တို့ဘက် လက်ဦးမူ ရရှိပီး စတင် ပစ်ခတ်ခဲ့တဲ့ အတွက် ဗမာ နအဖ စစ်တပ်ဘက်က တဦးကျဆုံးပြီး နှစ်ဦး ဒဏ်ရာ ရရှိသွားပါတယ်။”
၎င်းပြင်သူက တိုက်ပွဲအသေးစိတ် အခြေအနေများကို ယခုကဲ့သို့ ပြောကြားသည်။
“ တိုက်ပွဲကတော့ ရင်ဆိုင်တွေ့ဆုံ ဖြစ်ပွားတာပါ။ ရန်သူဘက်က ဗိုလ်မှူး စိုးအောင် ဦးစီးတဲ့ စစ်ကြောင်း ဖြစ်ပါတယ်။ ကျွန်တော်တို့ဘက်ကလည်း ၁၅ ဦးခန့်ပါပီး ရန်သူဘက်ကလည်း ၁၅ ဦးခန့် ရှိတယ်လို့ သိရပါတယ်။ တိုက်ပွဲကတော့ နံနက် ၁၁ နာရီ ၄၅ မိနစ်က စတင် ဖြစ်ပွားခဲ့တာပါ။ စုစုပေါင်း မိနစ် ၅၀ ခန့် ကြာပါတယ်။ ကျွန်တော်တို့ဘက်ကတော့ ထိခိုက် ဒဏ်ရာ ရရှိတာ မရှိပါဘူး။”
ယခုကဲ့သို့ နအဖ ဘက်မှ တပ်သား တစ်ဦးကျဆုံးပြီး နှစ်ဦးဒဏ်ရာ ရရှိသွားကြောင်းကို အရပ်ဘက် သတင်းနှင့် နအဖ စစ်ဘက်ဆိုင်ရာ သတင်းရပ်ကွက်များ အရ သိရှိရကြောင်း သူက ပြောကြားသည်။
ယခု တိုက်ပွဲမှာ ၂၀၁၀ ခုနှစ်အတွင်း ပထမဆုံးအကြိမ် ရခိုင်ပြည်တပ်မတော်နှင့် နအဖ တပ်မတော်တို့ အကြား စတင် ဖြစ်ပွားသော တိုက်ပွဲ ဖြစ်ပီး ၂၀၀၉ ခုနှစ်က ALA နှင့် နအဖ တို့အကြား တိုက်ပွဲ ၉ ကြိမ် ဖြစ်ပွားခဲ့ကာ ၂၀၀၈ ခုနှစ်က ၇ ကြိမ် ဖြစ်ပွားခဲ့ကြောင်းသိရှိရသည်။
ရခိုင်ပြည် လွှတ်မြောက်ရေး တပ်မတော်သည် ရခိုင်ပြည်သူများ၏ အသက်အိုးအိမ်ကို ကာကွယ်စောင့်ရှောက်ရမည့် တာဝန်ရှိသည့် အတွက် ရခိုင်ပြည်အတွင်း လူ့အခွင့်အရေး ချိုးဖေါက်မူများကို နည်းမျိုးစုံဖြင့် ကျူးလွန်နေသော နအဖ စစ်တပ်အပေါ် အခြေအနေ အခွင့်ကောင်းများကို အရယူပြီး ဆက်လက် တိုက်ပွဲများ ဖေါ်ထုတ်သွားရန် အစီအစဉ်များရှိကြောင်း ကိုခိုင်ထွန်းလင်းမှ ပြောဆိုသည်။
No comments:
Post a Comment