မျိုးကြီး | အင်္ဂါနေ့၊ ဖေဖေါ်ဝါရီလ ၀၂ ရက် ၂၀၁၀
ရွှေလီ (မဇ္ဈိမ)။ ။ ရှမ်းပြည် (မြောက်ပိုင်း) ကွတ်ခိုင်မြို့နယ် နမ့်ဖတ်ကာရွာအနီးတွင် အရှေ့မြောက်တိုင်း ရမခ တိုင်းမှူးက စေတီတည်ရန် ကုန်သည်များထံမှ အလှူငွေကောက်ခဲ့ကြောင်း ဒေသခံများ အဆိုအရ သိရသည်။
လွန်ခဲ့သည့် တပတ်မှစ၍ ရမခ တိုင်းမှူး ဗိုလ်ချုပ်အောင်သန်းထွဋ်သည် ကွတ်ခိုင်ကုန်သည် တဦးလျှင် ကျပ် ၃ သိန်းမှ ၅ သိန်းအထိ ကောက်ခံခဲ့သည်ဟု ဆိုကြသည်။
''ဘုရားတည်မယ်ဆိုတော့ ဘယ်သူတည်တည် အလှူငွေကောက်တာပါပဲ။ ပြီးခဲ့တဲ့ တပတ်လောက်ကမှ ကောက်တာ။ တယောက် ၃ သိန်းကနေ ၅ သိန်းအထိပေါ့။ သိန်း ၆၀၀ ကျော်လောက် ရတယ်။ လူကြီး လာတည်တယ် ဆိုတော့လည်း ထည့်ကြတာပေါ့'' ဟု ဒေသခံ ကုန်သည်တဦးက မဇ္ဈိမကို ပြောသည်။ ယနေ့ နံနက်တွင် ပြုလုပ်သည့် စေတီပန္နက်ရိုက်ပွဲသို့မူ ဒုတိုင်းမှူး ဗိုလ်မှူးချုပ် ဝင်းသိန်း တက်ရောက်ခဲ့သည်။
လွန်ခဲ့သည့်တလခန့်က နမ့်ခမ်း-နမ့်ဖတ်ကာ ကားလမ်းရှိ နမ့်ဖတ်ကာမှ ၃ မိုင်ခန့်အကွာ၌ ဥာဏ်တော် တထွာခန့်ရှိ ရှေးဟောင်းဆင်းတုတော် ၂၀ ခန့်နှင့် အုတ်ချပ်ပြားများကို ပလောင် နွားကျောင်းသားများ တူးဖော်တွေ့ရှိခဲ့ရာ၊ ထိုနေရာတွင် တိုင်းမှူးက ဘုရားတည်ခြင်း ဖြစ်သည်။ ရှေးဟောင်း ဆင်းတုတော်များ တွေ့ရှိခဲ့သဖြင့် ယခင်စေတီအဟောင်းမှ ဌာပနာများ ဖြစ်ဖွယ်ရှိကြောင်း ဒေသခံများက ယူဆနေကြသည်။
No comments:
Post a Comment