ဖြိုးကြီး
အရပ်သားအစိုးရ ပြောင်းလဲသွားသော်လည်း မြန်မာပြည်တွင်းရှိ မီဒီယာများအနေဖြင့် ယခင်အတိုင်း ထိန်းချုပ်မှုများရှိနေပြီး အစိုးရကောင်းကြောင်းများသာ ဝါဒဖြန့် ဖော်ပြနေကြောင်း သတင်းမီဒီယာများ စောင့်ကြည့်လေ့လာ အကဲဖြတ်အဖွဲ့ (Memo 98) မြန်မာပြည် ညှိနှိုင်းဆက်သွယ်ရေးတာဝန်ခံက ပြောသည်။
အရပ်သားအစိုးရ ပေါ်ပေါက်ပြီးနောက်ပိုင်း ပြည်တွင်းပြည်ပရှိ မြန်မာသတင်းမီဒီယာများ၊ ပုံနှိပ်မီဒီယာများတွင် သတင်းများဖော်ပြမှုကို စောင့်ကြည့်လေ့လာအကဲဖြတ် စံနှုန်းများဖြင့် တိုင်းတာပြီး ယခုကဲ့သို့ ထုတ်ပြန်ပြောဆိုလိုက်ခြင်း ဖြစ်သည်။
“မဲဆွယ်ကာလမှာဘဲ အစိုးရသတင်းမီဒီယာတွေနဲ့ အခြားမီဒီယာတွေမှာ နိုင်ငံရေးပါတီတွေရဲ့ သတင်းတွေကို ဘယ်လောက်ဖော်ပြတယ်၊ လွတ်လပ်ခွင့်ရှိ/မရှိ အဲဒီအချက်အလက်တွေကို ခိုင်မာတဲ့ နည်းပညာတွေနဲ့ အကဲဖြတ်ခဲ့တယ်၊ အဲဒီကာလမှာ မီဒီယာတွေရဲ့ ဖြောင့် မှတ်မှုစံနှုန်းကို စောင့်ကြည့်ခဲ့သလို အခုပေါ်လာတဲ့အစိုးရကလည်း ဘယ်လောက်အထိ လူထုအပေါ်မှာ လွတ်လပ်ခွင့်၊ တရားမျှတခွင့်၊ ဖော်ပြခွင့်တွေရလည်းဆိုတဲ့ စံနှုန်းတွေနဲ့ ကြည့်တာပါ၊ ရေဒီယိုတွေ၊ ရုပ်မြင်သံကြားတွေမှာ စက္ကန့်အလိုက် ဗိုလ်ချုပ်ကြီး သန်းရွှေက အချိန်ဘယ်လောက်ယူတယ်၊ သိန်းစိုးကော်မရှင်က ဘယ်လောက်ယူတယ်ဆိုတာကို အတိအကျ လေ့လာအကဲဖြတ် စောင့်ကြည့်ခဲ့တယ်၊ အတိုက်အခံအုပ်စုတွေကိုရော အချိန်ဘယ်လောက်ပေးလဲ ပေးတယ်ဆိုရင် ဘယ်လိုအပြုသဘောဆောင်ဖော်ပြလဲ ဆိုတာ၊ ပရင့် မီဒီယာတွေမှာလဲ စပေ့ဘယ်လောက်ယူသလဲဆိုတာတွေကို ဂရပ်တွေနဲ့ ပြန်ပြီး ဖော်ပြလေ့လာအကဲဖြတ်ခဲ့တာပါ” ဟု ပြောသည်။
အုပ်ချုပ်သူ အစိုးရများအနေဖြင့် တိုင်းပြည်တွင် အမှန်တကယ်ဖြစ်ပျက်နေသည်များကို လွတ်လပ်စွာ ရေးသားဖော်ပြခွင့်ပေးပြီး ဖမ်းဆီးထားသည့် သတင်းမီဒီယာသမားများ၊ နိုင်ငံရေးအကျဉ်းသားများကို မြန်ဆုံးလွှတ်သင့်ကြောင်း ၎င်းက ဆက်ပြောသည်။
“မီဒီယာတွေကို ဒီလိုစောင့်ကြည့်တာက အဓိက ပြည်သူလူထုအကျိုးအတွက်ပါဘဲ၊ ဘာအတွက်လဲဆိုရင် လွတ်လပ်စွာ ရေးသားနိုင်ခွင့်၊ ဖော်ထုတ်နိုင်ခွင့်၊ သတင်းထိန်းချုပ်မှုမရှိတဲ့ နိုင်ငံမျိုးဖြစ်အောင် လုပ်ဆောင်နေတာပါ၊ ဒါအပြင် နိုင်ငံတော်ရဲ့ သားကောင်းရတနာတွေ၊ ရဟန်းသံဃာတွေကို ချုပ်နှောင်ထားတာဟာ တိုင်းပြည်ကို အညွှန့်ချိုးတာနဲ့ တူတယ်၊ မီဒီယာလွတ်လပ်ခွင့်ပေးတယ်ဆိုရင် တကယ့်တိုင်းပြည်မှာ လွတ်လပ်စွာ ပြောဆိုခွင့်တွေပေးသင့်တယ်” ဟု ပြောသည်။
(Memo98) အနေဖြင့် ရွေးကောက်ပွဲ မတိုင်ခင်ကာလကတည်းက မီဒီယာများ၏ သတင်းဖော်ပြမှုများကို စောင့်ကြည့်လေ့လာမှုများ ပြုလုပ်ပြီး အစီရင်ခံစာ (၂)စောင် ထုတ်ပြန်ခဲ့ပြီး ဖြစ်သည်။
ယခုဒုတိယအကြိမ် အရပ်သားအစိုးရ သစ်ပေါ်လာပြီး သတင်းမီဒီယာများကို စောင့်ကြည့်လေ့လာအကဲဖြတ်ပြီး မကြာခင် အစီရင်ခံစာ (၂) စောင် ထပ်မံထုတ်ပြန်သွားမည် ဖြစ်သည်။
“ပြီးခဲ့တဲ့ နိုဝင်ဘာရွေးကောက်ပွဲမဲဆွယ်ကာလကစလို့ မြန်မာပြည်နဲ့ ပတ်သက်ပြီး ပထမဆုံး လေ့လာစမ်းစစ်မှု ပြုလုပ်ခဲ့တာပါ။ ပြည်တွင်း၊ ပြည်ပမှာမှာရှိတဲ့ ပုံနှိပ်မီဒီယာ၊ အသံလွှင့်မီဒီယာတွေကို စောင့်ကြည့်မှုတွေ ပြုလုပ်ခဲ့ပါတယ်၊ ပြည်တွင်းမှာရှိတဲ့ မီဒီယာတွေအားလုံးက အစိုးရရဲ့ကောင်းကြောင်းတွေကိုဘဲ အများဆုံး ဖော်ပြပေးကြရတယ်၊ အတိုက်အခံတွေက သေသေချာချာသုံးသပ်တဲ့ သတင်း၊ ဆောင်းပါး ဓါတ်ပုံတွေကို ဖော်ပြခွင့်မရခဲ့ဘူး၊ ဥပမာ လူထုခေါင်းဆောင် ဒေါ်အောင်ဆန်းစုကြည်ရဲ့ ပုံတွေဆိုရင် ဖော်ပြခွင့်သိပ်မရဘူး၊ အထူးသဖြင့် မြန်မာ့အသံတို့၊ မြဝတီတို့မှာ ဒေါ်အောင်ဆန်းစုကြည်ရဲ့ ပြည်သူတွေကို ပြောကြားချက်နဲ့ ပတ်သက်ပြီး ရွေးကောက်ပွဲ မတိုင်ခင်ကရော အခုအထိရော တခါမှ ဖော်ပြခဲ့တာ မရှိဘူး” ဟု ဆက်ပြောသည်။
သတင်းမီဒီယာများ စောင့်ကြည့်လေ့လာ အကဲဖြတ်အဖွဲ့ (Memo98) သည် ချက်ကိုစလိုဗက်အခြေစိုက် သတင်းမီဒီယာတခုဖြစ်ပြီး အထူးသဖြင့် ကမ္ဘာ့နိုင်ငံများ၏ ရွေးကောက်ပွဲကာလများတွင် တရားမျှတမှု၊ လွတ်လပ်မှုရှိမရှိနှင့် သတင်းမီဒီယာများ၏ သတင်းဖော်ပြမှုများကို စောင့်ကြည့်လေ့လာစမ်းစစ်မှုများပြုလုပ်ပြီး လူထုအခြေပြုအဖွဲ့အစည်းများကို နည်းပညာဖြန့်ဝေပေးခြင်းများကို လုပ်ကိုင်နေသည့် အဖွဲ့ဖြစ်သည်။
No comments:
Post a Comment