ရန်ကုန်မြို့တွင် မေ ၁၀ ရက်နေ့က တက္ကသိုလ်ရိပ်သာလမ်း နေအိမ်၌ ဒေါ်အောင်ဆန်းစုကြည်နှင့် တွေ့ဆုံအပြီး ကျင်းပသော သတင်းစာ ရှင်းလင်းပွဲတွင် ၄င်းက အထက်ပါအတိုင်း ပြောဆိုလိုက်ခြင်း ဖြစ် သည်။
“ဥရောပသမဂ္ဂ နိုင်ငံခြားရေးဝန်ကြီးတွေနဲ့တွေ့တဲ့အခါ အခြေအနေတွေကို ပြန်ပြီးအစီရင်ခံ ပြောပြမှာပါ။ အားလုံးကိုခြုံပြီးတော့ သုံး သပ် မယ့် ကျနော့်အမြင်ကတော့ လက်ရှိပြုပြင်ပြောင်းလဲမှုတွေက ကျ နော်တို့ ထင်ထားတာထက် ပိုပျက်လွယ်နေပါသေးတယ်။ ကျနော်တို့အနေနဲ့ အခြေအနေတွေကို အနီးကပ်စောင့်ကြည့်ပြီး နောက်ပြန်မလှည့်နိုင်အောင် စီးပွားရေးနဲ့ နိုင်ငံရေးကဏ္ဍတွေကို ထောက်ပံ့ ကူညီ သွားပါမယ်”ဟု Mr.Radoslaw Sikorski က ရှင်းပြသည်။
Mr.Radoslaw Sikorski က မြန်မာနိုင်ငံ၏ပြုပြင်ပြောင်းလဲမှုများသည် ပိုလန်နိုင်ငံ၏ ဒီမိုကရေစီပြုပြင်ပြောင်းလဲမှုများနှင့် အလား သဏ္ဍန် တူကြောင်း၊ ပြုပြင်ပြောင်းလဲမှု လုပ်ငန်းစဉ်များသည် အလွန် ခက်ခဲ ကြောင်း၊ မြန်မာနိုင်ငံ၏ ပြုပြင်ပြောင်းလဲရေးများကို ပိုလန် က ဆက် လက် ထောက်ခံ မည်ဖြစ် ကြောင်း ၄င်း၏ အဆို အရ သိရှိ ရသည်။
“ပိုလန်အနေနဲ့ သမ္မတကြီးနဲ့ အတိုက်အခံခေါင်းဆောင် နှစ်ဦးစလုံးကို တွေ့ဆုံပြီးတဲ့အခါမှာ၊ ဒီမိုကရေစီပြုပြင် ပြောင်းလဲမှုတွေကို ဆက် လက် ထောက်ခံသွားမယ့်အကြောင်း ပြောချင်ပါတယ်။ ပိုလန်နိုင်ငံနဲ့ မြန်မာနိုင်ငံက အာဏာရှင်စနစ်ကနေ ဒီမို ကရေစီ ပြုပြင် ပြောင်းလဲ တာ၊ အမိန့်ပေး ဈေးကွက် ကနေ လွတ်လပ်တဲ့ ဈေးကွက် စီးပွား ရေး စနစ်ကို ပြောင်းလဲမှု တွေဟာ အတော်ကို ဆင်တူ ပါတယ်။ ဒါက လွယ် ကူတဲ့ အပြောင်း အလဲ ဖြစ်စဉ် မျိုးတော့ မဟုတ် ပါဘူး”ဟု ပိုလန် နိုင်ငံခြား ရေးဝန် ကြီး က ဆိုသည်။
ပိုလန်နိုင်ငံခြားရေးဝန်ကြီးက မြန်မာနိုင်ငံတွင် ရင်းနှီးမြုပ်နှံရေးကိစ္စများကိုလည်း ဒေါ်အောင်ဆန်းစုကြည်နှင့် ဆွေးနွေးခဲ့ကြောင်း၊ ပိုလန် အ နေနှင့် မြန်မာနိုင်ငံအတွက် စီးပွားရေးဆိုင်ရာ ပညာသင်ဆုများ ပေးအပ်မည်ဖြစ်ပြီး နှစ်ဦးနှစ်ဖက် အပြန်အလှန်အကျိုးရှိနိုင် သော ရင်းနှီးမြုပ်နှံမှုများကိုသာ ပြုလုပ်သွားမည် ဖြစ်ကြောင်း၊ ပိုလန်နိုင်ငံ၏ အခြေအနေများကို မြန်မာအစိုးရနှင့် အတိုက်အခံများအား လေ့ လာစေချင်ကြောင်းလည်း ဆက်လက်ပြောဆိုသည်။
မြန်မာ့နိုင်ငံရေး နှင့် မြန်မာပြည်အကြောင်းများစွာကို ရေးသားပြုစုလျက်ရှိသော ဆွီဒင် သတင်းစာဆရာ Bertil Lintner ကလည်း မြန်မာ ပြည်၏ ဖြစ်ထွန်းမှုများသည် အခြေခိုင်ခြင်း မရှိသေးကြောင်း The Australian သတင်းဌာနသို့ ပြောဆိုထားသည်။
ဒေါ်အောင်ဆန်းစုကြည်ကမူ မြန်မာနိုင်ငံ၌ ရင်းနှီးမြုပ်နှံမှုများပြုလုပ်ရာတွင် လည်းကောင်း၊ အကူအညီပေးရာတွင် လည်းကောင်း လူနည်း စုကိုလည်း ထည့်သွင်း စဉ်းစားပေးရမည် ဖြစ်ကြောင်း ပြောသည်။
“ရင်းနှီးမြုပ်နှံ တာပဲဖြစ်ဖြစ်၊ အကူအညီတွေ ပေးတာပဲဖြစ်ဖြစ်၊ လူအများစုရှိနေရှိနေတဲ့ နေရာတွေတင် မဟုတ်ဘူး၊ တိုင်းရင်းသား လူနည်း စုတွေမှာလည်း လုပ်ဆောင်သင့်တယ် ဆိုတာ ကျမအမြဲ ထောက် ပြ ပါတယ်။ အမြဲပဲ ချိန်ဆကြဖို့ လိုပါတယ်။ ကျမတို့ ပြည်သူ တွေက ဆင်းရဲကြတယ်ဆိုပေမယ့် တိုင်းရင်းသားဒေသတွေမှာ ပိုပြီးဆင်းရဲတယ်၊ အကူအညီတွေပိုလိုတယ်”ဟု ဒေါ်အောင် ဆန်းစုကြည် က ဆို သည်။
ပိုလန်နိုင်ငံခြားရေးဝန်ကြီးသည် ဒေါ်အောင်ဆန်းစုကြည်ကို ပိုလန်နိုင်ငံသို့လာရောက်ရန် ဖိတ်ကြားခဲ့ပြီး ဒေါ်အောင်ဆန်းစုကြည် ကလည်း လာမည့် နှစ်အတွင်း သွားရောက်လည်ပတ်ဖွယ် ရှိကြောင်း ပြန် လည်ပြောဆိုခဲ့သည်။
မြန်မာနိုင်ငံကို ဗုဒ္ဓဟူးနေ့က စတင် လာရောက်သည့် ၂ ရက်ခရီးစဉ်အတွင်း ပိုလန် နိုင်ငံခြားရေးဝန်ကြီးသည် သမ္မတ ဦးသိန်းစိန်နှင့် လည်း တွေ့ဆုံခဲ့ပြီး ဥရောပ သမဂ္ဂ၏ စီးပွားရေး ပိတ်ဆို့မှုများ အပြီးတိုင် ရုပ်သိမ်းနိုင်ရေး၊ ပိုလန်က မြန်မာနိုင်ငံအတွင်း စက်ရုံ အလုပ်ရုံများ၊ သ ဘောင်္ကျင်း လုပ်ငန်း၊ ရထားပို့ဆောင်ရေး ဆိုင်ရာ လုပ်ငန်း၊ စွမ်းအင် ကဏ္ဍများတွင် ရင်းနှီးမြှုပ်နှံမှုများ ပြုလုပ်ရန် နှင့် နည်းပညာ ကဏ္ဍများတွင် အကူအညီများ ပေးနိုင်ရေးတို့အတွက် ဆွေးနွေးကြကြောင်းလည်း သိရသည်။
No comments:
Post a Comment