မအေးအေးဝင်းကို ဓါတ်ဆီဖြင့်ပက်၍ မီးရှို့ခဲ့သည့် ကျိုင်းငင်းရပ်၊ ရပ်ကွက် ၂ ကျိုင်းတုံမြို့နေ ဦးနေဝင်းကို ဇွန်လ ၁၀ ရက်နေ့က လားရှိုးမြို့နယ် တရားရုံးတွင် စွဲချက်တင်ခဲ့ပြီး ဇွန်လ ၁၁ ရက်နေ့တွင် ပြစ်မှု ပုဒ်မ ၃၀၇ (လူသတ်ရန် အားထုတ်မှု)၊ ပုဒ်မ ၃၂၆ (အပြင်းအထန် ဒဏ်ရာရရှိစေမှု)၊ ၁၉၉၈ ခုနှစ် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများ ဥပဒေ ပုဒ်မ ၁၅/ ၁၆ (ဂ) တို့အရ ထောင်ဒဏ်စုစုပေါင်း ၂၆ နှစ်ကျခံစေကြောင်း သိရသည်။
“ဦးနေ၀င်း တစ်ယောက်ကိုပဲ စီရင်ချက် ချတာပါ။ စီရင်ချက် ချပြီးပြီးချင်း လက်ရှိုးထောင်ကို ချက်ချင်း လွှဲလိုက်တယ်။ အဓိကရုဏ်းမှာ ပါဝင်တယ်လို့ ယူဆပြီး ဖမ်းဆီးထားတဲ့ ၄၄ ယောက်ကိုတော့ စစ်ဆေးနေတုန်းပဲ” ဟု ပြည်နယ် ပြန်ကြားရေးဌာနမှ ပြောရေးဆိုခွင့်ရှိသူ ဦးဝေလင်းက ဧရာဝတီကို ပြောသည်။
မီးရှို့ခံခဲ့ရသူ မအေးအေးဝင်းမှာ ကျန်းမာရေးကောင်းမွန်သော်လည်း မိသားစု၏ သဘောထားအရ ယနေ့ နံနက်ပိုင်းတွင် ခရိုင်ပြည်သူ့ဆေးရုံ လူနာတင်ယာဉ်ဖြင့် မန္တလေး အထွေထွေရောဂါကု ဆေးရုံသို့ လွှဲပြောင်းပေးလိုက်ကြောင်း သိရသည်။
“တရားရုံးက ဆုံးဖြတ်တာဆိုတော့လည်း ကျမတို့က ဘာမှ ပြောစရာမရှိပါဘူး။ အမကတော့ သက်သာတယ်လို့တော့ ပြောလို့ မရဘူး။ အနာက အရမ်းကို နာနေတဲ့ပုံပဲ။ မန္တလေးမှာ ပိုအဆင်ပြေမယ် ဆေးဝါးလည်း ပိုပြည့်စုံမယ်လို့ ဆရာဝန်တွေကလည်း ပြောတယ်။ ကျမတို့ကလည်း ဒီမှာဆို အချိန်လည်း ကြာမယ်ဆိုပြီးတော့ မန္တလေးကို ပြောင်းလိုက်တာပါ” ဟု မအေးအေးဝင်း၏ မိသားစုဝင် တစ်ဦးက ဧရာဝတီကို ပြောသည်။
လားရှိုးတွင် အဓိကရုဏ်းစတင်ဖန်တီးခဲ့သည့် ဦးနေ၀င်းသည် မန္တလေး၊ တောင်ကြီးနှင့် ကျိုင်းတုံမြို့တို့တွင်လည်း အလားတူ ဖြစ်ရပ်မျိုးဖြစ်ပေါ်စေရန် ဖန်တီးခဲ့ပြီး အောင်မြင်မှု မရှိခဲ့ကြောင်း၊ သူ့နောက်တွင် ကြိုးကိုင်နေသူရှိနိုင်ကြောင်း ပြည်ထောင်စု ငြိမ်းချမ်းရေး ဖော်ဆောင်ရေး ကော်မတီ ဒုဥက္ကဌ ပြည်ထောင်စုဝန်ကြီး ဦးအောင်မင်းက ပြောဆိုခဲ့ဖူးသည်။
“ကျနော်တို့ အမှုစစ်တော့ ဒီကိစ္စတွေ ထည့်မစစ်ပါဘူး။ လားရှိုးကိစ္စ ကျနော့် စီရင်ပိုင်ခွင့်ထဲက အမှုကိစ္စတွေကိုပဲ အဓိက စစ်ဆေး စီရင်ချက် ချခဲ့တာပါ” ဟု လားရှိုးမြို့နယ် တရားသူကြီး ဦးနေ၀င်းက ဧရာဝတီကို ပြောသည်။
မေ ၂၈ ရက်နေ့ မအေးအေးဝင်းကို မီးရှို့ရာမှ စတင်ခဲ့သည့် လားရှိုးမြို့ အဓိကရုဏ်းသည် မေ ၂၉၊ ၃၀ ရက်များအထိ ဖြစ်ပွားခဲ့ပြီး ၁ ဦးသေဆုံးကာ ပျက်စီးဆုံးရှုံးမှု ပမာဏ စုစုပေါင်း ၆၈၄ သိန်း ၂ သောင်း ငါးထောင် ရှိသည်ဟု ပြည်နယ် ပြန်ကြားရေးက သတင်းထုတ်ပြန်ထားသည်။ အဓိကရုဏ်းတွင် ပါဝင်သူများ ၄၄ ဦးကို ဖမ်းဆီးထားပြီး စစ်ကြော ဖော်ထုတ်ရေးနှင့် တရားစွဲဆိုရေး အဖွဲ့ဖြင့် စုံစမ်းစစ်ဆေးလျှက်ရှိကြောင်း သိရသည်။ ပဋိပက္ခကြောင့် လားရှိုးမြို့မဈေးကြီးကို ၅ ရက်တိုင် ပိတ်ထားခဲ့ရသည်။
No comments:
Post a Comment