စစ်အုပ်ချုပ်ရေးကနေ ဒီမိုကရေစီစနစ်ဆီကို ဦးတည်နေပြီး ၁၉၄၈ ခု နှစ် မြန် မာ နိုင် ငံ လွှတ်လပ်ရေး ကာလကတည်းက စတင်ခဲ့တဲ့ လက်နက်ကိုင်ပဋိပက္ခကိုလည်း အဆုံးသတ်ဖို့ ကြိုးစားနေသလို ဗဟိုက ချုပ်ကိုင်ထားတဲ့ စီးပွားရေးစနစ်ကနေ လွှတ်လပ်တဲ့ဈေးကွက်စနစ် တည်ထောင်ဖို့ ကြိုးစားနေတယ်လို့ ပြောပါတယ်။
ဒီလိုလုပ်ဆောင်ဖို့အတွက် နိုင်ငံခြား ရင်းနှီးမြုပ်နှံမှုတွေ၊ တတ်သိ ပညာရှင်တွေက မြန်မာနိုင်ငံအတွက် အရေးကြီးတဲ့ ကဏ္ဍမှာ ပါဝင်တယ်လို့လည်း ဖွင့်ပွဲအမှာစကားမှာ သမ္မတဦးသိန်းစိန်က ပြောခဲ့တာ ဖြစ်ပါတယ်။
ကမ္ဘာ့စီးပွားရေးညီလာခံကို နိုင်ငံပေါင်း ငါးဆယ်ကျော်က ကိုယ်စားလှယ်အယောက်ပေါင်း ၁၀၀၀ ကျော် တက်ရောက်နေကြတာဖြစ် ပါတယ်။
ဖွင့်ပွဲအခမ်းအနားမှာ သမ္မတဦးသိန်းစိန်နဲ့အတူ ဗီယက်နမ်နိုင်ငံ နဲ့ လာအိုနိုင်ငံက ဝန်ကြီးချုပ်တွေလည်း အတူရှိနေခဲ့ပြီး အာရှတိုက်ဖွံ့ဖြိုးတိုးတက်ရေး အကြောင်းတွေ ဆွေးနွေးခဲ့ကြပါတယ်။
ဒေါ်အောင်ဆန်းစုကြည်လည်း ညီလာခံ တက်ရောက်နေ
အဲဒီညီလာခံကို အမျိုးသားဒီမိုကရေစီအဖွဲ့ချုပ် ခေါင်းဆောင် ဒေါ်အောင်ဆန်းစုကြည်လည်း တက်ရောက်နေပြီး မြန်မာပြည်ရဲ့ အနာဂတ်ဆိုတဲ့ခေါင်းစဉ်နဲ့ ဆွေးနွေးမှု ပြုလုပ်ခဲ့ပါတယ်။
ဒီဆွေးနွေးမှုအတွင်း ဒေါ်အောင်ဆန်းစုကြည်က မြန်မာနိုင်ငံက တိုင်းရင်းသားလူမျိုးအားလုံးနဲ့ ဘာသာပေါင်းစုံက လူတွေဟာ တရားဥပဒေရဲ့ အစောင့်ရှောက်ကို အခွင့်အရေးကို ရပိုင်ခွင့်ရှိတယ်လို့ ပြောလိုက်ပါတယ်။
မြန်မာနိုင်ငံမှာ ဖြစ်ခဲ့တဲ့ ပဋိပက္ခနဲ့ ပတ်သက်ပြီး ဒေါ်အောင်ဆန်းစုကြည်က အကြမ်းဖက်မှုမှာ ပါဝင်သူတွေအနေနဲ့ ကိုယ်ကျူးလွန်တဲ့ ပြစ်မှုတွေအပေါ် တာဝန်ခံရမယ့်အကြောင်း ဒါပေမယ့် ဒီကိစ္စမှာ ဘယ်သူမှန်တယ်၊ ဘယ်သူမှားတယ်ဆိုတာကိုတော့ မပြောလိုကြောင်း၊ ဒီလို ပြောလိုက်ရင် တစ်ဖွဲ့ဖွဲ့အတွက် စိတ်အနှောင့်အယှယ်ဖြစ်စေပြီး လူတွေက ပိုပြီးတော့ ရန်လိုမှု များပြားလာတာတွေ၊ အစွန်းရောက်မှု ပိုများလာတာတွေဖြစ်လာတဲ့အတွက် ဒီအပေါ်မှာ အင်မတန်စိုးရိမ်မိတယ်လို့လည်း ပြောပါတယ်။
မြန်မာနိုင်ငံ ပြောင်းလဲရေးနဲ့ ပတ်သက်ပြီး ဒေါ်အောင်ဆန်းစုကြည်က ခုလောလောဆယ်အချိန်အထိ မြန်မာနိုင်ငံရဲ့ ပြောင်းလဲမှုဟာ ပြည်သူတွေ လိုလားတဲ့ အခြေအနေ မရောက်သေးဘူးလို့ ဆိုပါတယ်။
မြန်မာနိုင်ငံ ကျေးလက်ဒေသမှာ နေထိုင်တဲ့ လူတွေနဲ့ မြို့ပြက ဆင်းရဲသားတွေအတွက် တကယ်စစ်မှန်တဲ့ အပြောင်းအလဲလုပ်ပေးဖို့ အချိန်တန်ပြီလို့လည်း ပြောလိုက်ပါတယ်။
ဒေါ်အောင်ဆန်းစုကြည်အနေနဲ့ သမ္မတဖြစ်လိုပါသလားလို့ မေးရာမှာ အရင်က ဖြေကြားခဲ့တဲ့အတိုင်း သူ့အနေနဲ့ မဖြစ်ချင်ဘူးလို့ ဖြေပြီး ဟန်ဆောင်နေမယ်ဆိုရင် ပြည်သူတွေအပေါ် မရိုးသားရာရောက်မယ်လို့ ဖြေဆိုခဲ့ပါတယ်။
ဖွဲ့စည်းပုံအခြေခံ ဥပဒေလည်း ပြင်ဆင်ဖို့ လိုတဲ့အကြောင်း ဒေါ်အောင်ဆန်းစုကြည်က ပြောခဲ့ပြီး ဆွေးနွေးပွဲရဲ့ အဆုံးမှာ ဒေါ်အောင်ဆန်းစုကြည်က သူလူ့ဘဝထဲ မရှိခင်ကတည်းက မြန်မာနိုင်ငံဟာ အရင်ကတည်းက တည်ရှိလာခဲ့သလို သူမရှိတော့တဲ့ အချိန်မှာလည်း ဆက်လက်တည်ရှိမယ်ဆိုတာကို ယုံကြည်ကြောင်း ပြောကြားခဲ့ပါတယ်။ ဒီသတင်းနဲ့ ပတ်သက်ပြီး သတင်းပေးပို့ချက် ကဏ္ဍမှာလည်း နားဆင်ရမှာ ဖြစ်ပါတယ်။
No comments:
Post a Comment