ဇေယျာရွှေမြေ ဘောလုံး အသင်းပိုင်ရှင် ရွှေနဂါးမင်း ကုမ္ပဏီ၏ တရားလွှတ်တော် ရှေ့နေ ဒေါ်သူဇာဟန်က “ကျမတို့ ကုမ္ပဏီ ဘက်က ၇ ရက် အတွင်း လူမှုရေး ညှိနှိုင်းမှုတွေ လုပ်ဖို့ ၊ အဲဒါနဲ့မှ အဆင်မပြေရင် ဥပဒေ အတိုင်း ဆက်လက် လုပ်ဆောင် သွားမှာပါ။ ကုမ္ပဏီအနေနဲ့ အရင်ကလည်း လျော်ကြေး ပေးခဲ့တာတွေ ရှိပြီးသားပါ။ အခု နို့တစ်စာ ပေးပို့ထားတဲ့ လူတွေထဲ က တချို့ လူမှုရေး ညှိနှိုင်းမှုနဲ့ ပြီးပြတ်မယ့် သူတွေ ရှိနိုင်သလို မပြီးပြတ်တဲ့သူတွေလည်း ရှိနိုင်ပါလိမ့်မယ်။ လူမှုရေး ညှိနှိုင်းမှုနဲ့မှ အဆင်မပြေရင်တော့ ဥပဒေ အတိုင်း ကျမတို့ ဆက်လုပ်သွားမှာပါ”ဟု ဧရာဝတီကို ပြောသည်။
စီးပွားရေးနှင့် ကူးသန်းရောင်းဝယ်ရေး ၀န်ကြီး ဦးဝင်းမြင့်နှင့် သားဖြစ်သူ ကိုသူရိန်တို့၏ ရွှေနဂါးမင်း ကုမ္ပဏီက ထူထောင် ထားသည့် ဇေယျာရွှေမြေ ဘောလုံးကွင်း အတွက် မုံရွာမြို့ အ၀င် ၂၅ ဧက မြေလွတ်ကွင်း အတွင်း၌ ဘိုးဘွားပိုင်နှင့် ဂရန်ရှိ မြေများကိုပါ သိမ်းယူခံနေရခြင်းနှင့် စပ်လျဉ်းပြီး မြေသိမ်းခံရသော မုံရွာမြို့ခံများက ဇွန်၂၅ ရက်က သတင်းစာ ရှင်းလင်းပွဲ ပြုလုပ်မှု အပေါ် ရွှေနဂါးမင်း ကုမ္ပဏီ၏ ရှေ့နေက ယခုကဲ့သို့ ပြောဆိုခြင်း ဖြစ်သည်။
မြေသိမ်းခံရသူ တဦး ဖြစ်သည့် မြို့ခံ ကိုထွန်းနိုင်ထွေးက “လူမှုရေး ညှိနှိုင်းမှု ဆိုတာ လျော်ကြေးငွေကို ပြောတာပဲ၊ အရင် လူတွေတုန်းက အဲဒီလိုပဲ မစို့မနှံ့ ပေးပြီး ဖယ်ရှားခဲ့တာပဲ။ သူတို့ပြောတဲ့ ဥပဒေ ဆိုတာ ဘာလဲ”ဟု ပြောသည်။
အဆိုပါ မြေနေရာသည် ၂၀၀၉ ခုနှစ် ဒီဇင်ဘာလ အတွင်းက စစ်ကိုင်းတိုင်း ကိုယ်စားပြု ဇေယျာရွှေမြေ ဘောလုံးအသင်း၏ အားကစား အဖွဲ့များ ပရိသတ်များ နေထိုင်တည်းခိုရန် ဟိုတယ် တလုံး တည်ဆောက်ရန် အနောက်မြောက်တိုင်း စစ်တိုင်းမှူးထံ တောင်းခံခဲ့ရာ ၂၀၁၀ ပြည့်နှစ် သြဂုတ်တွင် မုံရွာတောင် ရပ်ကွက် ကွင်းအမှတ် ၆၈၃ ကူးတို့ကုန်းကွင်း အတွင်း မြေနေ ရာ ချထားပေးခြင်း ဖြစ်ပြီး ယခုအခါ ဘောလုံးကွင်း ဆောက်လုပ်မည် ဖြစ်သည်ဟု သိရသည်။
ကုမ္ပဏီက ယင်းနေရာတွင် နေထိုင်နေသူများအား ဖယ်ရှားရှင်းလင်းခဲ့ပြီး မြေကွက် မြောက်ဘက်ရှိ ဘိုးဘွားပိုင်နှင့် ဂရန်ရှိမြေ များကိုပါ ဆက်လက် သိမ်းယူလာခြင်း ဖြစ်ကြောင်း မြေသိမ်းခံရသူများက ဆိုသည်။
မြေသိမ်းခံရမှုတွင် ပါဝင်သည့် မုံရွာတက္ကသိုလ် ဓာတုဗေဒ ဌာနမှူး ပါမောက္ခ ဒေါ်စိန်စိန်အောင်က “ဒီနေရာကို အေးချမ်းဖွံ့ဖြိုးရေး လက်ထက်က ခရိုင် အားကစားကွင်း လုပ်မယ် ဆိုပြီး လျာထားတယ်။ နောက်တော့ ဦးဝင်းမြင့်တို့ ကုမ္ပဏီကို ပေးလိုက် တယ်။ အများပြည်သူ အကျိုးရှိစေမယ့် စာသင်ကျောင်းလို ၊ဆေးရုံလို ဆောက်တာမျိုး ဆိုရင်တော့ မပြောလိုပေမယ့် အခုလို ကျမတို့ပိုင် ဘိုးဘွားပိုင်မြေ ၊ ဂရန်ရှိပြီးသား မြေတွေကို အခြားသူ တဦးတယောက် အကျိုးအတွက် သိမ်းဆည်းတာမျိုးကို တော့ လက်သင့် မခံနိုင်ပါဘူး”ဟု ပြောသည်။
မုံရွာမြို့မှ မြေသိမ်းခံရသူများသည် ရွှေနဂါးမင်း ကုမ္ပဏီက ဟိုတယ် ဆောက်လုပ်ရန် အတွက် မြေသိမ်းစဉ်က ကန့်ကွက်မှု ၊ ဥပဒေ နည်းလမ်းဖြင့် ဖြေရှင်းမှုများ ပြုလုပ်ခဲ့သော်လည်း ယခင် အစိုးရ လက်ထက် ဆောင်ရွက်ခဲ့သော အမှုများကို ပြန်လှန် တရားစွဲဆိုပိုင်ခွင့် မရှိဟု ဆိုကာ ပယ်ချခံခဲ့ရသည့် အတွက် မြေပိုင်ရှင်များသာ ထိခိုက်နစ်နာခဲ့ရကြောင်း မုံရွာမြို့မှ တရားလွှတ်တော် ရှေ့နေ ဦးလှဦးက ပြောသည်။
“ဟိုတယ် အတွက် မြေသိမ်းတုန်းက ကန့်ကွက်ခဲ့သလို ဥပဒေကြောင်း အရလည်း ဖြေရှင်းခဲ့တယ်။ အဲဒီတုန်းကလည်း မူလ မြေပိုင်ရှင်တွေပဲ တရားရှုံး ခဲ့ရတဲ့ အပြင် နို့တစ်စာ ဆွဲစုတ်ပစ်လို့ ဆိုပြီး မိန်းကလေး တယောက် ထောင်ကျခဲ့ရတယ်။ အခု ထပ်မံ သိမ်းဆည်းမှုမှာလည်း ဥပဒေ နည်းလမ်း အရတော့ အောင်မြင်နိုင်ဖို့ အင်မတန် နည်းပါတယ်” ဟု ၎င်းက ဆိုသည်။
မြေပိုင်ရှင်များက မြေသိမ်းယူခံရမှု အပေါ် ဥပဒေ နည်းအရ လွှတ်တော်သို့ တင်ပြ ဆောင်ရွက်ခဲ့သော်လည်း ထူးခြားမှု မရှိဘဲ ဆက်လက် သိမ်းဆည်းနေသဖြင့် မုံရွာမြို့အတွင်း ဆန္ဒဖော်ထုတ်ပွဲများ ပြုလုပ်မည့်အပြင် သမ္မတ သိရှိစေရန် နေပြည်တော် ၌ ဆန္ဒဖော်ထုတ် သွားမည်ဟု ပြောဆိုသည်။
No comments:
Post a Comment