မို့မို့ကြည်
တမူးနယ်စပ်ကုန်သွယ်ရေးစခန်းတွင် မြန်မာနိုင်ငံဘက်မှ အိန္ဒိယနိုင်ငံဘက်သို့ ကြက်သွန်နီများပိုမိုတင်ပို့ခြင်းနှင့် အိန္ဒိယနိုင်ငံမှ မြန်မာနိုင်ငံသို့ မော်တော်ဆိုင်ကယ်များပိုမိုတင်သွင်းလာခဲ့ခြင်းတို့ကြောင့် ယခုရက်ပိုင်းအတွင်း နှစ်နိုင်ငံ နယ်စပ်ကုန်သွယ်မှုတန်ဖိုးမှာ ကျပ်သန်းပေါင်း ၁,၀၀၀ နီးပါးအထိရောက်ရှိလာခဲ့သည်ဟု တမူးနယ်စပ်ကုန်သွယ်ရေးစခန်းမှ စခန်းမှူး ဒေါ်သီးသီးမာ ဇူလိုင်လ ၁၅ ရက်တွင် မဇ္ဈိမကို ပြောသည်။
တမူးနယ်စပ်ကုန်သွယ်ရေးစခန်းတွင် ဇူလိုင်ပထမအပတ်အတွင်းကုန်သွယ်မှု တန်ဖိုးစုစုပေါင်း ကျပ် ၇၆၅ သန်းရှိခဲ့ရာမှ ဇူလိုင်လ ဒုတိယအပတ်တွင်ကုန်သွယ်မှု တန်ဖိုးမှာ ကျပ်သန်းပေါင်း ၁,၀၀၀ နီးပါး အထိ တိုးတက်လာခဲ့ကြောင်း ဒေါ်သီးသီးမာ ကပြောသည်။
“ ဒီတစ်ပတ်ထဲမှာနယ်စပ်ကုန်သွယ်ရေးတိုးလာပါတယ်။ အိန္ဒိယဘက်က ကြက်သွန်အမှာများလာတယ်။ နောက်ပြီး အိန္ဒိယဘက်ကနေ မြန်မာပြည်ထဲကိုဆိုင် ကယ်တင်သွင်းမှုကလည်း များလာတယ်။ ဇူလိုင်လ အတွက် နှစ်နိုင်ငံနယ်စပ်ကုန် သွယ်မှုတန်ဖိုး ဒေါ်လာ ၂ ဒသမ ၄ သန်းထိ ရောက်ရှိဖို့ရည်မှန်းထားတာပါ။ ဒီပုံ အတိုင်းဆိုရင်တော့ မျှော်မှန်းထားတဲ့ပမာဏ ထက်ကျော်လွန်သွားနိုင်ပါတယ် ” ဟု ၎င်းကပြောသည်။
အိန္ဒိယနိုင်ငံက ကြက်သွန်နီဝယ်ယူမှု များလာသော်လည်း တမူးနယ်စပ်ဘက် တွင်ကြက်သွန်နီဈေးနှုန်း များမှာ ပုံမှန်အနေအထားတွင်ရှိကြောင်း တမူးမြို့ နယ်မှ ကုန်သည်များကပြောသည်။
“အခုကျွန်တော်တို့ဘက်မှာတော့ ကြက်သွန်ဈေးကပုံမှန်ပဲ။ ဈေးမတက်ဘူး။ လက်ရှိတစ်ပိဿာ ကျပ် ၅၀၀ ဈေး ရှိတယ်။
အရင်ရက်ကတော့ အန္ဒိယက တော်တော်လေးအမှာများတယ်။တစ်ရက်ကို တန်ချိန် ၅၀လောက်ပို့ရတယ် ” ဟု တမူးနယ်စပ်ကုန်သည်ကြီးများအသင်းမှ အတွင်းရေးမှူး ဦးခင်မောင်ထင်က ပြောသည်။
အိန္ဒိယမှ မှာယူမှုများသောကြောင့် မုံရွာမြို့တွင်မူ ကြက်သွန်နီဈေးအနည်း ငယ်မြင့်တက်လာခဲ့သည်ဟုမုံရွာ မြို့ရှိ ကြက်သွန်နီပွဲရုံပိုင်ရှင်တစ်ဦးကပြောသည်။
“ ဈေးကမဆိုစလောက်တက်တယ်လို့ ပြောလို့ရတယ်။ တစ်ပိဿာကို ၂၅ ကျပ် လောက်ဈေးတက်တယ်” ဟု ၎င်းပြောသည်။ ဇူလိုင်လ ၁၅ ရက်တွင်ဖြစ်ပေါ်နေသော မုံရွာမြို့ရှိ ကြက်သွန်နီဈေးနှုန်းများမှာ တစ်ပိဿာလျှင် ကျပ် ၄၀၀ မှ ကျပ် ၆၀၀ ထိရှိသည်ဟုလည်း ယင်းကဆိုသည်။
“ အမတို့ရန်ကုန်မှာလည်းကြက်သွန် န်ီဈေးနှုန်းက သိသိသာသာတက်သွားတာ မရှိသေးပါဘူး။ အခုကပုံ မှန်ပဲလည်ပတ်နေတယ်။ ဈေးအရမ်းတက်သွားတာမျိုးတော့မရှိသေးဘူး။ ဒီနေ့ရန်ကုန် ကြက်သွန်နီဈေးက အမျိုးအစားအပေါ်မူတည်ပြီး တစ်ပိဿာကို ကျပ် ၃၄၀ ကနေ ၆၀၀ အထိဈေးရှိတယ် ” ဟုရန်ကုန် ဘုရင့်နောင် ပွဲရုံတန်းရှိ ရွှေပြည်စိုးကြက်သွန် အရောင်းဆိုင်မှ တာဝန်ရှိသူတစ်ဦးကပြောသည်။
No comments:
Post a Comment