သီလ၀ါ အထူး စီးပွားရေးဇုန် စီမံ ကိန်း ဆောင် ရွက်ဖို့ မြေနေရာ တွေ အတွက် ကနဦး အသိမ်းခံ ရတဲ့ ဟက်တာ ၄၀၀ ရှိပြီး အဲဒီ အတွင်းမှာ ရှိတဲ့ ဒေသခံ တွေဟာ သီးနှံ လျော်ကြေးပဲ ရရှိကြပြီး ကျန်းမာရေး ဆိုင်ရာနဲ့ ကလေးတွေရဲ့ ပညာရေး ဆုံးရှုံး မှုတွေ အတွက် မရရှိတဲ့ အကြောင်း လယ်သမား တစ်ဦးဖြစ်တဲ့ ဦးအေးဌေးက အခုလို ပြောပါတယ်။
“ရန်ကုန်တိုင်း ဒေသကြီး အစိုးရ အဖွဲ့က မြေယာ အတွက် လျှော်ကြေး မပေးဘူးတဲ့ ။ သီးနှံလျှော်ကြေးပဲ ပေးမယ်တဲ့။ ဘာလို့လဲ ဆိုတော့ ကျွန်တော်တို့ လယ်က ၉၆/၉၇ ကပဲ သိမ်းထား တာမို့လို့တဲ့။ မြေယာဥပဒေ၊ ဂျိုက်ကာရဲ့ မူဝါဒတွေနဲ့ မကိုက်ရင် ကျွန်တော်တို့က ဖယ်ပေးမှာ မဟုတ်ဘူး မဖယ်ပေး တဲ့အပြင် ဂျပန် ၀န်ကြီးချုပ်ကို မြန်မာနိုင်ငံမှာ လာရောက် ရင်းနှီးမြှုပ် နှံမှုမလုပ်ဖို့ ပြောမယ်။”
စီမံကိန်း ဒုတိယ အပိုင်းအဖြစ် မြေရာ ဟတ်တာ ၂၀၀၀ အသုံးပြု သွားမှာ ဖြစ်တဲ့ အတွက် အဲဒီမြေရာမှာ ပါဝင်တဲ့ ဒေသခံ လယ်သမားတွေကို ၁၈၉၄ မြေသိမ်း ဥပဒေ အရ ခရိုင် အုပ်ချုပ်ရေး မှူးက မြေသိမ်း အမိန့် ထုတ်လိုက် တယ်လို့ သိရပါတယ်။
မြေသိမ်းခံရတဲ့ ဒေသခံတွေ အနေနဲ့ အခက်အခဲနဲ့ ကြုံနေ ရကြောင်း သီလ၀ါ လူမှုဘ၀ ဖွံ့ဖြိုးတိုး တက်ရေး တာဝန်ရှိ သူလည်းဖြစ်၊ လယ်တွေ အသိမ်းခံ ရသူ လည်းဖြစ်တဲ့ ဦးကျော်ကျော်က အခုလို ပြောပြပါတယ်။
“မြေလျှော်ကြေး မရတဲ့အခါ ကျွန်တော်တို့ အနာဂတ် အတွက် ကျွန်တော် တို့ရဲ့ ဘ၀တွေ ကျွန်တော် တို့ရဲ့ ကလေးတွေ ဘယ်လို အသက်မွေး ၀မ်းကြောင်းပြုမလဲ။ ကျွန်တော်တို့ သီးနှံ လျှော်ကြေးသည် ဘိုးဘေ အစဉ်အလာ ကိုစားသောက်နေတယ်။ သူတို့ပေးတာာ ၆ နှစ်စာပဲ ရှိတယ်။ ၁၀ ဧက လုပ်တဲ့သူသည် ၁၀ ဧက ပျောက်သွားရင် ဒါမှမဟုတ် ဒိပြင်နေရာမှာ ၁၀ ဧက အစားထိုးပေးနိုင်တဲ့ ရှိမှာ မူလအဆင့်အတန်းထက်မနိမ့်ကျမှာ ဖြစ်ပါတယ်။ ဘာ့ကြောင့်လဲဆိုတော့ မြေမရှိရင် ကျွန်တော်တို့ဘ၀က သေသွားတာနဲ့ အတူတူပါပဲ”
သီလ၀ါ အထူး စီးပွားရေးဇုန် စီမံကိန်းမှာ ဂျပန် အပြည်ပြည် ဆိုင်ရာ ကော်ပိုရေးရှင်း အေဂျင်စီ (JICA) အဖွဲ့ က ၁၀% နဲ့ ညီမျှတဲ့ ဂျပန် ယန်းငွေသန်း ၅၀၀ ရင်းနှီးမြှပ်နှံ ထားပြီး မစ်ဆူဘီရှီ၊ ဆူမီတိုမို နဲ့ မာရူဘယ်နီ စတဲ့ ဂျပန်ကုမ္မဏီ (၃) ခုကတော့ ၃၉% ရင်းနှီးမြုပ်နှံထားပါတယ်။
မြန်မာ အစိုးရ ကတော့ စီမံကိန်း ရဲ့ရှယ်ယာ ၁၀% နဲ့ ဖက်စပ် မြန်မာကုမ္မဏီ (၉) ခုက ၄၁% ရင်းနှီးမြှပ်နှံ ထားတာကြတာ ဖြစ်ပါတယ်။
သီလ၀ါ လူမှုဘ၀ တိုးတက်ရေး အဖွဲ့ကို ဂျပန်ကိုခေါ်ပြီး (JICA) ရဲ့ စုံစမ်း စစ်ဆေးရေး အရာရှိ ဒေါက်တာ Sachihiko Harashina ထံ တိုက်ရိုက် စာတင်နိုင်ဖို့ ကူညီပေးခဲ့တဲ့ မဲခေါင်ဒေသ စောင့်ကြည့်ရေး အဖွဲ့ တာဝန်ရှိသူက သီလ၀ါ စီးပွါးရေးဇုန် အတွင်းက ဒေသခံတွေကို ဘယ်လို ဆောင်ရွက်ပေး နေလဲဆိုတာကို အခုလိုပြောပါတယ်။
“သီလ၀ါ ပရိုဂျက်မှာ ဂျိုက်ကာ အဓိက ရင်းနှီးမြှုပ်နှံ မှုမှာ ပါလို့ လာရာက် စုံစမ်း တာပါဒေသခံတွေ ကလည်း ထိခိုက် နစ်နာတာတွေနဲ့ ပတ်သက်လို့ ဂျိုက်ကာက ထိထိရောက်ရောက် လုပ်ပေးတာ မရှိဘူးလို့ သိရပါတယ်။”
ပြီးခဲ့တဲ့ ဇွန်လ ဆန်းပိုင်းက ဒေသခံတွေ ပထမဦးဆုံး ရေးသားတဲ့ စီမံကိန်း ကန့်ကွက်စာကို မဲခေါင်ဒေသ စောင့်ကြည့်ရေး အဖွဲ့က ဒေသခံတွေ ကိုယ်စား (JICA) စုံစမ်း စစ်ဆေးရေး အရာရှိ ဒေါက်တာ Sachihiko Harashina ထံ တရားဝင်ပေး အပ်ခဲ့ တယ်လို့ ဆိုပါတယ်။
အဲဒီ ကန့်ကွက် လွှာမှာ စီမံကိန်း ပထမ အဆင့်မှာ အသုံးပြုတဲ့ မြေရာ ဟက်တာ (၄၀၀) က ဒေသခံတွေ ပြန်လည်နေရာ ချထားတာနဲ့ ပတ်သက်ပြီး ကြုံတွေ့နေရတဲ့ ထိခိုက် မှုတွေကို တင်ပြထား တယ်လို့ ဆိုပါတယ်။
ဒါ့အပြင် ဒုတိယ အဆင့်မှာ အသုံးပြုမယ့် မြေရာ ဟက်တာ ပေါင်း (၂၀၀၀) အတွင်းက ဒေသခံတွေ ကြုံရမယ့် ထိခိုက် နစ်နာမှုတွေပါ တင်ပြထား ပါတယ်။
ပထမ ကန့်ကွက်စာ တင်ပြီးနောက်ပိုင်း ဇူလိုင်လ ၁၈ရက်နဲ့ ၁၉ရက်နေ့တွေမှာ စုံစမ်းရေး အရာရှိက လာရောက် စစ်ဆေး မှုတွေလုပ်ခဲ့ တယ်လို့ ဆိုပါတယ်။
သီလ၀ါ စီးပွါးရေးဇုန်နဲ့ ပတ်သက်လို့ အစိုးရအနေနဲ့ ပြောဆိုမှု ပုံစံတွေက အမျိုးမျိုးဖြစ်နေ တဲ့အကြောင်းလည်း ပေါင်းကူး Civil Society Strengthening Initiative ရဲ့တာဝန် ရှိသူ ဦးကျော်မြင့်က ခုလိုပြောပါတယ်။
“ရန်ကုန်တိုင်းဒေသကြီးအစိုးရကို မြန်မာနိုင်ငံအစိုးရကနေပြီး ဒီသီလ၀ါဒေသမှာ ရှိတဲ့ စီးပွါးရေးဇုန်လုပ်ဖို့ အတွက် လယ်သိမ်းခံရတဲ့ သူတွေနဲ့ပတ်သက်လို့ အစိုးရနဲ့ စကားပြောတဲ့အခါမှာ အရေးကြီးတဲ့အချက် နှစ်ချက်ပြောပါတယ်။ ပထမ တစ်ချက်က ဒီမြေတွေဟာ ၉၆/၉၇ ကတည်းက သိမ်းပြီးတဲ့မြေတွေ ဖြစ်တဲ့အတွက်ကြောင့် ဒီလူတွေနဲ့ မဆိုင်ဘူးဆိုတဲ့ စကားမျိုးပြောပါတယ်။ နိုင်ငံတကာနဲ့ချိတ်ဆက်ပြီးတဲ့အခါ နိုင်ငံတကာက ဖိအားပေးလာတဲ့ အခါမှာတော့ ဂျိုက်ကာက ရင်းနှီးမြှတ်နှံတဲ့အတွက်ကြောင့်မို့လို့ ဂျိုက်ကာအဖွဲ့ ရင်းနှီးမြှုပ်နှံ တဲ့နေရာမှာ လိုက်နာရမယ့် စည်းမျဉ်းစည်းကမ်းတွေ ရှိတယ်။ ဒီစည်းမျဉ်းစည်းကမ်းတွေ ပါမှရမယ် ပြောတယ်။ တစ်ခါနိုင်ငံတကာက သတ်မှတ်ထားတဲ့ လိုက်နာရမယ့် စည်းကမ်းများဆိုတာ ရှိပါတယ်။ အဲဒီစည်းကမ်းအတိုင်းလိုက်နာရမယ်လို့ပြောပြန်ပြီ။ ဒီမှာ ထိခိုက်နေရတဲ့ သူတွေကို နိုင်ငံတကာ စံချိန်စံညွှန်းနဲ့အတူ လုပ်ပေးမလားလို့ မေးတဲ့အခါမှာနိုင်ငံတကာ အတိုင်းမပေးနိုင်ပါဘူးလို့ ပြောတယ်။ မြန်မာအစိုးရသတ်မှတ်ထားတဲ့ အတိုင်း ပေးပါမယ်လို့ ပြောတယ်။ အဲဒါကိုက လုံးဝအဓိပ္ပါယ် မရှိပါဘူး။”
ပြန်လည်နေရာ ချထားခံရတဲ့ ဒေသခံ မြိုင်သာယာရွာက ဒေါ်မြင့်မြင့်သိန်းက သူတို့ရွာမှာ ကြုံတွေ့နေ ရတာတွေကို အခုလို ရှင်းပြပါတယ်။
“ရေနှုတ်မြောင်းကရေက ရိုးကနေ ရပ်ကွက်ထဲကို ပြန်ဝင်တယ်။ ရွာဟောင်းက ရေတွေဆိုရင် အိမ်တွေပါမြုပ်တယ်။ အခု ၆၈ အိမ် က တော်တော် အခြေအနေဆိုးနေတယ်။အဲလိုအခြေအနေမှာ စားဝတ်နေရေး ။လမ်းပမ်းဆက်သွယ်မှု ။၆၈ အိမ်မှာ ၁၈ အိမ်က မရှိတော့ဘူး။ ကျန်တဲ့အိမ်တွေ ကလည်း အိမ် ၂၀ ပေါင်ထားရတယ်။”
သီလ၀ါအထူးစီးပွားရေးဇုန်ကို ဂျပန်နိုင်ငံက ကာလရှည် အတိုးနှုန်းနိမ့် Official Development Assistant (ODA) ချေးငွေနဲ့ လုပ်ဆောင်နေတာ ဖြစ်ပါတယ်။
ဂျပန်နဲ့ မြန်မာနိုင်ငံအကြား ပို့ဆောင်ဆက်သွယ်ရေး ကဏ္ဍမှာပူးပေါင်းဆောင်ရွက်နိုင်ဖို့အတွက် ၂၀၁၂ခုနှစ်တုန်းက သဘောတူ လက်မှတ်ရေးထိုးခဲ့တာ ဖြစ်ပါတယ်။
ဟတ်တာ ၂၄၀၀ လောက် ကျယ်ဝန်းတဲ့ သီလဝါအထူးစီးပွါးရေးဇုန် အတွင်းမှာ ပထမအဆင့်မှာပါဝင်တဲ့ ရင်းနှီးမြှုပ်နှံမှု စီးပွါးရေးလုပ်ငန်းရှင်တွေအနေနဲ့ လာမယ့် ၂၀၁၅ ခုနှစ်မှာ အခြေခံ အဆောက်အဦးတွေ စတင်တည်ဆောက်လို့မှာဖြစ်ပေမယ့် အခုထိ မြေယာလျော်ကြေးတွေကို ဥပဒေနဲ့အညီ ဆောင်ရွက်တာ မရှိသေးဘူးလို့ ဥပဒေပညာရှင် ဦးမြင့်သွင်က ပြောပါတယ်။
“အစိုးရက ခေတ်အဆက်ဆက် ဥပဒေကို မလိုက်နာလို့ ကျွန်တော်တို့ တောင်သူတွေ လယ်သမားတွေ နစ်နာနေရတာပါ။အဲဒါကတော့ ၁၈၉၄ မြေသိမ်း အက်ဥပဒေပုဒ်မ ၂၃ မှာဘာပြဌါန်းထားလဲဆိုရင် မြေသိမ်းခံရမယ့် နိုင်ငံသားတွေကို ၁၈၉၄ မြေသိမ်း အက်ဥပဒေပုဒ်မ- လေး ကွင်းစကွင်းပိတ် တစ်ထုတ်တဲ့အချိန်က ကာလပေါက်ဈေးနဲ့လျော်လိုက်ပါလို့ဥပဒေမှာ ပြဌါန်းထားတယ်။ပုဒ်မ ၁၁ နဲ့ ၁၅ မှာ ညှိနှိုင်းပြီးတော့ သဘောတူတာ လျော်ပါလို့ ပြဌါန်းထားတယ်။အခု ကျွန်တော်တို့ လယ်ယာမြေ ဥပဒေပြည်ထောင်စုလွှတ်တော် ဥပဒေအမှတ် ၁၁ ဖြစ်တဲ့ လယ်ယာမြေဥပဒေ နည်းဥပဒေ ၆၇-က(၁)စပါးနဲ့အခြားသီးနှံစိုက်တဲ့ မြေကို တစ်ဧက ကာလပေါက်ဈေး ရဲ့ ၃ ဆ လျော်လိုက်ပါ။နည်းဥပဒေ ၆၇-က(၂)နှစ်ရှည်ပင်တွေပါရင် ကာလပေါက်ဈေးရဲ့ ၃ ဆလျှော်လိုက်ပါ။နည်းဥပဒေ ၆၇-က(၃)အဆောက်အအုံတွေပါသွားရင် ကာလပေါက်ဈေးရဲ့ ၂ ဆ လျှော်လိုက်ပါ။မြေပါသွားရင် ဒေသကာလပေါက်ဈေး နဲ့ လျှော်ပါလို့ ပြဌါန်းပြီးသားရှိပါတယ်။”
ပြီးခဲ့တဲ့ ၂၀၁၃ ခုနှစ် သြဂုတ်လကုန်အထိ မြန်မာနိုင်ငံရဲ့ နိုင်ငံခြား ရင်းနှီးမြှုပ်နှံမှု "အဆင့်တစ်" နေရာမှာ တရုတ်က ဦးဆောင်ခဲ့ပေမယ့် လာမည့်နှစ် အနည်းငယ်အတွင်း အထူးစီးပွားရေးဇုန်နဲ့ တခြားရင်းနှီးမြုပ်နှံမှုတွေကြောင့် ဂျပန်နိုင်ငံဟာ မြန်မာနိုင်ငံရဲ့ "အဆင့်တစ်"နေရာကို ရောက်လာနိုင်တဲ့အကြောင်း မြန်မာနိုင်ငံ ရင်းနှီးမြုပ်နှံမှု ကော်မရှင်စာရင်းတွေအရ သိရတဲ့အကြောင်း ရေဒီယို သြစတြေးလျ သတင်းထောက် မေငယ် က သတင်းပေးပို့ထားပါတယ်။
No comments:
Post a Comment