“တတိယနေရာ အတွက် သေချာသလောက် ရှိနေပါတယ်၊ အုပ်စုပွဲတုန်းက မြန်မာအသင်းက စင်္ကာပူအသင်းကို ၁၀ ဂိုး သွင်းနိုင်ခဲ့ တဲ့ အခြေအနေ ရှိတယ်၊ ဗီယက်နမ်နဲ့ ကစားခဲ့တဲ့ ပွဲတုန်းက အစွမ်းကုန် ကစားခဲ့ပေမယ့် သရေပွဲ ဖြစ်သွားတော့ ရ ဂိုး၊ ပေးဂိုးသာတဲ့ ဗီယက်နမ်က ဗိုလ်လုပွဲ တက်သွားရတယ်”ဟု တာဝန်ခံ အိုကိုခြားက ဆိုသည်။
သြဂုတ် ၂၆ ရက်တွင် ကျင်းပမည့် တတိယ နေရာလုပွဲ အတွက် မြန်မာ လက်ရွေးစင် အမျိူးသမီး ယူ ၁၉ အသင်းသည် စင်္ကာပူ အသင်းနှင့် ယှဉ်ပြိုင်ရမည် ဖြစ်သည်။
အာဆီယံ အမျိုးသမီး ယူ ၁၉ ချန်ပီယံ ဆုဖလား ပြိုင်ပွဲကို သြဂုတ် ၁၆ ရက်က စတင် ကျင်းပခဲ့ခြင်း ဖြစ်ပြီး ထိုင်း၊ မြန်မာ၊ ဗီယက်နမ်၊ စင်္ကာပူနှင့် အရှေ့တီမော နိုင်ငံတို့ ယှဉ်ပြိုင် ကစားကြခြင်း ဖြစ်သည်။
သြဂုတ် ၂၄ ရက် အထိ အမှတ်ပေး ဇယားအရ အာဆီယံ အမျိုးသမီး ယူ ၁၉ ချန်ပီယံ ဆုဖလားပြိုင်ပွဲတွင် အိမ်ရှင် ထိုင်းအသင်းက ရမှတ် ၁၂ မှတ်ဖြင့် အုပ်စု ပထမ၊ မြန်မာနှင့် ဗီယက်နမ် အသင်းက ရမှတ် ၇ မှတ်ဖြင့် အုပ်စု ဒုတိယ၊ စင်္ကာပူ အသင်းက ရမှတ် ၃ မှတ်ဖြင့် အုပ်စု တတိယနှင့် အရှေ့တီမော အသင်းက ရမှတ် မရှိဘဲ အုပ်စုအဆင့်မှ ထွက်သွားခဲ့ရကြောင်း သိရသည်။
သြဂုတ် ၂၄ ရက် ညနေပိုင်းက ကစားခဲ့သည့် ဗီယက်နမ်နှင့် မြန်မာပွဲစဉ်တွင် မြန်မာအသင်းက ပထမပိုင်း ကစားချိန်တွင် ကိုယ့်ဂိုး ကိုယ် သွင်းမိပြီး ပြိုင်ဘက်အသင်းကို ဂိုးပေးခဲ့ရသည်။ ဒုတိယပိုင်းတွင် ချေပဂိုး ပြန်လည် သွင်းနိုင်ခဲ့သော်လည်း ရဂိုး ကွာခြားချက်ကြောင့် ဗီယက်နမ် အသင်းက ဗိုလ်လုပွဲသို့ တက်ရောက်သွားပြီး မြန်မာအသင်းက တတိယ နေရာလုပွဲကို ဆက်လက် ယှဉ်ပြိုင်ရမည် ဖြစ်သည်။
မြန်မာအသင်း တာဝန်ခံ အိုကိုခြားက“သြဂုတ် ၂၆ ရက်မှာ စင်္ကာပူနဲ့ တတိယနေရာ လုရမယ်၊ အမျိုးသား အသင်းက ဆုဖလား ရပြီး အမျိုးသမီး အသင်းလည်း ရခဲ့ရင် အကောင်းဆုံး ဆိုပေမယ့် ကံတရားက ဒီလို ဆုံးဖြတ်သွားတယ်၊ ဒါပေမယ့် သူတို့ အစွမ်းကုန် ကြိုးစားကြမှာ”ဟု ဆက်ပြောသည်။
မြန်မာ လက်ရွေးစင် အမျိုးသမီး ယူ ၁၉ အသင်းတွင် ဂိုးသမားများ အဖြစ် သန္တာဦးနှင့် မျိုးမြမြငြိမ်း၊ နောက်တန်း ကစားသမားများ အဖြစ် ခင်ဇာဇာဝင်း၊ ချစ်ချစ်၊ ငယ်ငယ်ထွေး၊ အိရတနာဖြိုး၊ အိသိဂီကျော်၊ ခင်ပြည့်လင်း၊ ယွန်းမီမီလွင်၊ အလယ်တန်း ကစားသမားများ အဖြစ် စုနန္ဒာလွင်၊ မေဇင်ထွန်း၊ ဝေဇင်နှင်း၊ ရူပါခိုင်၊ နှင်းကလျာကို၊ ပန်းအိခိုင်၊ စုငယ်ထွေး၊ မေစံပယ်ဖူးနှင့် ရှေ့တန်း ကစား သမားများ အဖြစ် သိမ့်ကိုကို၊ နီလာဝင်းနှင့် ကေဇင်မြင့် တို့က ပါဝင်ကစားမည် ဖြစ်ကြောင်း သိရသည်။
မြန်မာ၊ ထိုင်းနှင့် ဗီယက်နမ် အမျိုးသမီး ယူ ၁၉ အသင်းများသည် အာရှတွင် အင်အား တောင့်တင်းသော အမျိုးသမီး အသင်းများ အဖြစ် ရပ်တည်နေကြောင်း သိရသည်။
မြန်မာ လက်ရွေးစင် အမျိုးသမီး ယူ ၁၉ အသင်းသည် ၂၀၁၃ ခုနှစ် အတွင်းက အာဆီယံ အမျိုးသမီးအသင်း ခြေစစ်ပွဲတွင် ဗီယက်နမ် အသင်းကို အနိုင်ရပြီး အာဆီယံ ကိုယ်စားပြု အသင်းအဖြစ် တရုတ်နိုင်ငံတွင် ကျင်းပခဲ့သည့် အာရှဖလား ပြိုင်ပွဲသို့ သွားရောက် ယှဉ်ပြိုင်ခဲ့ဖူးသည့် အတွေ့အကြုံလည်း ရှိထားသည်။
No comments:
Post a Comment