တိုင်းရင်းသားလူမျိုးများ၏ အခွင့်အရေး ကာကွယ်စောင့်ရှောက်သည့် ဥပဒေကို ပြည်ထောင်စု လွှတ်တော်၌ အတည်ပြုခဲ့ပြီး ဖေဖော်ဝါရီ ၂၅ ရက်တွင် ပြဌာန်းလိုက်ပြီဖြစ်ကြောင်း နိုင်ငံပိုင် သတင်းစာများတွင် ဖော်ပြထားသည်။
ကချင်ပြည်နယ် မဲဆန္ဒနယ် အမှတ် ၁၂ မှ အမျိုးသားလွှတ်တော် ကိုယ်စားလှယ် ဦးဂျေယောဝူက“တိုင်းရင်းသားတွေရဲ့ ဘိုးဘွားပိုင်လယ်မြေတွေ ကို ဒေသခံတွေ သဘောတူညီခြင်း မရှိဘဲ သိမ်းဆည်းမှု မပြုရဆိုတာတွေ တိုင်းရင်းသားဒေသတွေက သဘာဝ သယံဇာတ တွေကို စီမံကိန်း ပြုလုပ်တဲ့အခါ ဒေသခံတွေ ရပိုင်ခွင့် ဆိုတာတွေ ဘာမှ မပါရှိဘူး၊ ဥပဒေက ပြဿနာ ရှိနေပါတယ်”ဟု ဧရာဝတီကို ပြောသည်။
ယခင်အစိုးရအနေဖြင့် တိုင်းရင်းသားဒေသများတွင် ပွင့်လင်းမြင်သာမှု မရှိဘဲ လုပ်ဆောင်ထားသည့် သယံဇာတဆိုင်ရာစီမံကိန်းများကြောင့် ပြဿနာများ ဖြစ်နေခြင်းနှင့် ဒေသခံတို့ နစ်နာရသည့် ကိစ္စရပ်များ ရှိနေသဖြင့် ယခုဥပဒေအပေါ်တွင်လည်း စိုးရိမ်မှုရှိသည် ဟု တိုင်းရင်းသား လွှတ်တော်အမတ်များက ဧရာဝတီကို ပြောသည်။
ဥပဒေတွင် အစိုးရမှ ဖြစ်စေ၊ ပြည်ပမှ ဖြစ်စေ၊ ကုမ္ပဏီများမှ တိုင်းရင်းသားလူမျိုးများ၏ ဒေသတွင်း ဖွံ့ဖြိုးရေးလုပ်ငန်းများ၊ စီမံကိန်းကြီးများ ဆောင်ရွက်မည်ဆိုပါက ဒေသခံများအား ကြိုတင်အသိပေးပြီးမှ ဆောင်ရွက်ရမည်ဟု ဥပဒေတွင် ဖော်ပြထားသော်လည်း ဒေသခံတို့၏ ရပိုင်ခွင့်ကို ဖော်ပြထားခြင်း မရှိပါ။
တိုင်းရင်းသားဒေသများတွင် သဘာဝ သယံဇာတများနှင့် စီမံကိန်းလုပ်နိုင်သည့် နေရာအမြောက်အများရှိသဖြင့် ဒေသခံတို့၏ ရပိုင်ခွင့်ကို အတိအကျ ထည့်သွင်း သတ်မှတ်ပေးရန် အဆိုပါ ဥပဒေကို လွှတ်တော်တွင်း ဆွေးနွေးခဲ့စဉ်က တိုင်းရင်းသား လွှတ်တော် အမတ်တချို့က ပြောဆိုခဲ့သော်လည်း လွှတ်တော်က အတည်မပြုခဲ့ပါ။
ဥပဒေတွင် တိုင်းရင်းသားလူမျိုးများ၏ ရပိုင်ခွင့်များအဖြစ် စကား၊ စာပေ၊ အနုပညာ ၊ ယဉ်ကျေးမှု ၊ ဓလေ့ထုံးတမ်း ၊ ကိုးကွယ်သည့် ဘာသာ၊ ပညာသင်ကြားခွင့် ၊ ဆေး ကုသခွင့်၊ အလုပ်အကိုင် ရပိုင်ခွင့်၊ စီးပွားရေးလုပ်ငန်းများတွင် တန်းတူ အခွင့်အရေး ရပိုင်ခွင့် များနှင့် ပတ်သက်၍ လွတ်လပ်စွာ လုပ်ပိုင်ခွင့်ရှိသည်ဟု ပြဌာန်းထားသည်။
ရှေးဟောင်းအမွေများထိန်းသိမ်းပိုင်ခွင့် ၊ တိုင်းရင်းသားကိုယ်စားလှယ်များ အဖြစ် ၀င်ရောက်ရွေးချယ်ခွင့်၊ သမိုင်းဖြစ်စဉ်များ၊ ပျောက်ကွယ်လုနီးပါး ဖြစ်နေသည့် တိုင်းရင်းဆေးပညာများကို ဆက်လက်ထိန်းသိမ်းရန် လုပ်ပိုင်ခွင့်များ ရှိသည်ဟုလည်း ဆိုထားသည်။
ရခိုင်ပြည်နယ် မဲဆန္ဒနယ် အမှတ် ၆ အမျိုးသား လွှတ်တော် ကိုယ်စားလှယ် တဦးဖြစ်သူ ဦးခင်မောင်လတ်ကလည်း “ဥပဒေမှာ တိုင်းရင်းသားတွေအတွက် အာမခံချက်တွေ ဘာမှ မပါဘူး၊ ဒါပေမယ့် မြန်မာ နိုင်ငံရဲ့ လွှတ်တော်၊ အစိုးရရဲ့ အခြေအနေအရ အခုက ဒီလောက်ပဲ ရနိုင်တာမို့ နောက်မှ ဖြည်းဖြည်းချင်း ပြင်ဆင်ဖို့ လုပ်ရမယ်”ဟု မှတ်ချက်ပြုသည်။
ဥပဒေပြဌာန်းလိုက်ပြီဖြစ်သဖြင့် တိုင်းရင်းသားလူမျိုးများ၏ အခွင့်အရေးကို ဆောင်ရွက်ပေးရန် တိုင်းရင်းသားလူမျိုးများ ရေးရာဝန်ကြီးဌာန တရပ်ကို ပြည်ထောင်စု လွှတ်တော်မှ ဖွဲ့စည်းသွားမည်ဖြစ်ကြောင်း သိရသည်။
ဥပဒေတွင် သတ်မှတ်ထားသည့် တိုင်းရင်းသားလူမျိုးများမှာ မြန်မာနိုင်ငံ၏ ပင်မ တိုင်းရင်းသားများ ဖြစ်ကြသည့် ကချင်၊ ကယား ၊ ကရင်၊ ချင်း၊ ဗမာ၊ မွန် ၊ ရခိုင်၊ ရှမ်း တို့ ဖြစ်ပြီး နိုင်ငံသားပြုခွင့်ရသူများနှင့် ဧည့်နိုင်ငံသားများ မပါဝင်ပါ။
No comments:
Post a Comment