Monday, February 18, 2013

ရေနက်ဆိပ်ကမ်းစီမံကိန်းကြောင့် ချာခန်းဒေသခံများ အိုးမဲ့အိမ်မဲ့ဖြစ်

နန်းသူးလေ (ကေအိုင်စီ)

တနင်္သာရီတိုင်း၊ ရေဖြူမြို့နယ်အတွင်းရှိ ရေနက်ဆိပ်ကမ်း စီမံကိန်းနယ်မြေ အ တွင်း ပါဝင်နေသသည့် ချာခန်း ကျေးရွာ၏ ဒေသခံနေအိမ်များကိုအီတာလျံထိုင်း ဖွံ့ဖြိုးတိုးတက်မှု(ITD)ကုမ္ပဏီ မှ မြေထိုးစက်ကြီး များ ဖြင့် ထိုးလိုက်သော ကြောင့် ဒေသခံများအိုးမဲ့အိမ်မဲ့ဖြစ်နေကြကြောင်း သိရသည်။

ချာခန်းကျေးရွာနှင့် နီးစပ်သူဒေသခံတစ်ဦးက “အရင်လကုန်ပိုင်းလောက်ကနေ စပြီး ITD ကုမ္ပဏီကနေ ချာခန်း ရွာက အိမ်တွေကို မြေထိုးကားနဲ့ လာထိုးတာ။ အခုဆိုရင် ၁၅အိမ်လောက်ပဲ ကျန်တော့တယ်။ အထိုးခံလိုက်ရ တဲ့ အိမ်ပိုင်ရှင် တွေကတော့ အခုနေစရာမရှိလို့ နီးစပ်ရာနေရာတွေမှာပဲ ခိုကပ်နေနေရတယ်”ဟု ကေအိုင်စီသို့ ပြောသည်။

အိမ်၊ ခြံမြေများကို မြေထိုးကားကြီးများဖြင့် ထိုးလိုက်သော်လည်း ချာခန်းဒေသခံ များအတွက် ကုမ္ပဏီ ဘက်မှ ယခုအချိန်ထိ တစုံတရာ လာရောက်ကူညီပေးခြင်း နှင့် လျော်ကြေးပေးခြင်း မရှိသေးသည့်အပြင် ကူညီဖြေရှင်း ပေးမည့် အဖွဲ့အစည်းများလည်း မရှိသေးကြောင်း သူက ဆက်ပြောသည်။

ထို့အပြင် ရေဖြူမြို့နယ်၊ နဘုလယ်ဒေသအတွင်းရှိ ရေနက်ဆိပ်ကမ်းနယ်မြေအတွင်း ပါဝင်သည့် ဗျင်းနီကျေးရွာ တွင်လည်း ITD ကုမ္ပဏီမှ မြေ ထိုးစက်ကြီးများဖြင့် တစ်ရွာ လုံး ထိုးကော်ပြီးစီးသွားပြီ ဖြစ်ကြောင်း လည်း သိရသည်။

ပြီးခဲ့သည့် ဇန်န၀ါရီလ ၃ရက်နေ့က ချာခန်းကျေးရွာတွင် (ITD)ကုမ္ပဏီမှ ဆောက်လုပ်ရေးအဖွဲ့က ဒေသခံများ ပိုင်သည့် လယ်မြေနှင့် ခြံများကို လျော်ကြေးမပေးဘဲ အသုံးပြုနေသောကြောင့် ထိုက်တန်သည့် လျော်ကြေးပေး ရန်အတွက် ဒေသခံများနှင့် လူမှုအဖွဲ့အစည်းများ ပူးပေါင်း၍ တောင်းဆို ဆွေးနွေးမှုများ ပြုလုပ်ခဲ့ကြကြောင်း ထားဝယ်လူထုအသံ၏ သတင်းဝက်ဘ်ဆိုဒ်ပေါ်၌ ဖော်ပြထားသည်။


ထားဝယ်ရေနက်ဆိပ်ကမ်းတွင် (ITD) ကုမ္ပဏီက ထုတ်လုပ်မည့်မဂ္ဂါဝပ် ၃,၀၀၀ရှိ ကျောက်မီးသွေး လျှပ်စစ်စွမ်း အင်စီမံကိန်းတွင် ထိုင်းနိုင်ငံ၏ အကြီးဆုံး စွမ်းအင်ထုတ်လုပ်သည့် PTT ကုမ္ပဏီမှ အမေရိကန် ဒေါ်လာ ၄သန်း ရင်းနှီးမြှုပ်နှံမည် ဖြစ်ကြောင်းလည်း အင်တာနက်စာမျက်နှာများတွင် ဖော်ပြချက်များအရ သိရသည်။

No comments: