ABC
မြန်မာအစိုးရနဲ့ ကချင်တိုင်းရင်းသားအဖွဲ့တို့တွေ့ဆုံ မနေ့က တရုတ်-မြန်မာနယ်စပ်ရွှေလီမြို့မှာတွေ့ဆုံခဲ့ပြီး နှစ်ဖက်စလုံးက ခိုင်မာတဲ့အပစ်အခတ်ရပ်စဲနိုင်ဖို့အတွက် နောက်ထပ်ဆက်လက်တွေ့ဆုံဆွေးနွေးမှု တွေ လုပ်ဆောင်သွား ဖို့သဘောတူခဲ့တယ်လို့ ပူးတွဲကြေညာချက်ထဲမှာဖော်ပြထားပါတယ်။
ထပ်မံတွေ့ဆုံ ဆွေးနွေးဖို့အတွက် နှစ်ဖက်စလုံးက လာမယ့်ဖေဖေါ်ဝါရီလကုန်ပိုင်းမှာပြုလုပ်ဖို့ သဘောတူခဲ့ကြတယ်လို့ ဆိုပါတယ်။
ဆွေးနွေးပွဲကို အစိုးရဘက်က ဦးအောင်မင်း ခေါင်းဆောင်တဲ့အဖွဲနဲ့ KIO ဘက်က ဦးဆွမ်လွတ်ဂမ်၊ ဗိုလ်ချုပ်ဂွမ်မော်တို့အပြင် တရုတ်ပြည်သူ့သမ္မတနိုင်ငံ နိုင်ငံခြားရေးဝန်ကြီးဌာနက သံအမတ်ကြီးမစ္စတာ လျိုကျောက်ဝေ့နဲ့အဖွဲ့ အပြင် KNU ဥက္ကဌ ဗိုလ်ချုပ်ကြီးမူးတူးဆေးဖိုးနဲ့အဖွဲ့၊ ရှမ်းပြည်ပြန်လည်ထူထောင်ရေးကော် မတီ(RCSS/SSA) ဗိုလ်မှူးချုပ် စိုင်းလူနဲ့အဖွဲ့ တို့တက်ရောက်ခဲ့ကြတယ်လို့ ငြိမ်းချမ်း ရေးအကျိုး တော်ဆောင်တဦးဖြစ်တဲ့ ဦခွန်ဂျာက ပြောပြခဲ့ပါတယ်။
“ဆွေးနွေးပွဲက ပြီးသွားပြီ၊ဒီနေ့ဆွေးနွေးတာက ၉နာရီကနေ ၄နာရီထိ၊ ဆွေးနွေးပွဲမှာ ထုတ်ပြန်ကြေညာချက် ထုတ်လိုက်ပြီလို့ ပြောတယ်ဗျ၊ ဒီဖေဖော်ဝါရီလမကုန်ခင်မှာ ဒုတိယအကြိမ်ပြန်ဆက်လက်ပြီးဆွေးနွေးဖို့အတွက် သဘောတူတယ်လို့ ပြောတယ်။”
ဆွေးနွေးပွဲပြီးတဲ့နောက် နှစ်ဘက်အဖွဲ့တွေရဲ့ သဘောတူညီချက် ၅ချက်ကို ထုတ်ပြန်ခဲ့ရာ ငြိမ်းချမ်းရေးဆွေးနွေးပွဲတွေဆက်လက်ကျင်းပသွားဖို့အပြင် နှစ်ဘက်အဖွဲ့တွေအကြား စစ်ရေးတင်းမာမှုတွေလျော့ချရေး၊ စစ်ပြေ ငြိမ်းရေးကို အလျင်အမြန် အကောင်အထည်ဖော်ဖို့နဲ့ ဆွေးနွေးပွဲကို စိတ်ဝင်စားတဲ့အဖွဲ့တွေ လေ့လာစောင့်ကြည့်နိူင်ဖို့ စတဲ့ အချက်တွေလည်း ပါဝင်တယ်လို့ ပြောပါတယ်။
KIO က ညီညွတ်သော တိုင်းရင်းသားဖက်ဒရယ်ကောင်စီ UNFC နဲ့ ညှိနှိုင်းပြီး နောက်တစ်ကြိမ် ဆွေးနွေးပွဲကို ဖေဖော်ဝါရီလမကုန်မှီ တွေ့ဆုံဆွေးနွေးကြဖို့လည်း သဘောတူခဲ့ကြပါတယ်။
၂၀၁၂ခု အောက်တိုဘာလ၃၀ရက်နေ့ တွေ့ဆုံဆွေးနွေးပွဲတွေတုန်းက KIOနဲ့ အစိုးရကြားမှာ သဘောထား ကွဲလွဲမှုရှိနေတာက KIO ဘက်က နိုင်ငံရေးအရတွေ့ဆုံဆွေးနွေးရေးကို တောင်းဆိုခဲ့တာဖြစ်ပြီး အစိုးရ ဘက်က အပစ်အခတ်အရင်ရပ်စဲပြီးမှ နိုင်ငံရေးဆွေး နွေးပွဲတွေပြုလုပ်ဖို့ ဆိုတဲ့အချက်အပေါ်မှာ ကွဲလွဲမှုတွေရှိခဲ့တာ ဖြစ်ခဲ့တဲ့အတွက် နှစ်ဘက်အဖွဲ့တွေကြားမှာ တိုက်ပွဲတွေပြင်းပြင်းထန်ထန်ပြန် လည်ဖြစ်ပွားခဲ့ တာဖြစ်တယ်လို့ ဦးခွန်ဂျာက ပြောပါတယ်။
လက်ရှိအခြေအနေမှာ KIO နဲ့ အစိုးရကြား ငြိမ်းချမ်းရေးဆွေးနွေးပွဲတွေကို ပြည်နယ်အဆင့်၃ကြိမ်၊ ပြည် ထောင်စုအဆင့် ၇ကြိမ်မှာ ဦးအောင်သောင်း ဦးဆောင်တဲ့အဖွဲ့နဲ့ ၃ကြိမ်၊ ဦးအောင်မင်းနဲ့တွေ့ဆုံ ဆွေး နွေးတာ တွေ၊ အလွတ်သဘောဆွေး နွေးတာတွေနဲ့ စာနဲ့ ဆက်သွယ်တာတွေအပါအ၀င်အားလုံး ၁၂ကြိမ်ရှိသွားပြီ လို့ ဦးခွန်ဂျာက ပြောခဲ့တယ်လို့ ရေဒီယိုသြစတြေးလျသတင်းထောက် မြတ်မိုးက သတင်းပေးပို့ခဲ့ပါတယ်။
No comments:
Post a Comment