မြန်မာနိုင်ငံတွင် Viber သုံးစွဲသူ ၅ သန်း အထိ ရှိလာ

သစ်နေမိုး

မြန်မာနိုင်ငံတွင် Viber ကို မှတ်ပုံတင်ပြီး သုံးစွဲသူဦးရေ ၅ သန်း အထိ ရှိလာပြီဖြစ်ကြောင်း ဗိုက်ဗာ (Viber) ကုမ္ပဏီက ထုတ်ဖော် ကြေညာသည်။

ဇူလိုင် ၃၀ ရက်က ပြုလုပ်သော မြန်မာနိုင်ငံနှင့် ဆိုင်သည့် ပထမဆုံး Viber ပွဲ အခမ်းအနားတွင် အထက်ပါအတိုင်း ထုတ်ပြန်ကြေညာခြင်း ဖြစ်သည်။

မြန်မာနိုင်ငံတွင် ယခုကဲ့သို့ viber သုံးစွဲသူ များပြားလာခြင်းနှင့် ပတ်သတ်ပြီး Viber ၏ အလုပ်အမှုဆောင် အရာရှိချူပ် Talmon Marco က “ သုံးစွဲသူတွေရဲ့နှုန်းက အံအားသင့်ဖွယ်ပဲ။ မြန်မာက ကျနော်တို့အတွက် အရမ်းအရေးကြီးတဲ့ ဈေးကွက် တခုပါပဲ” ဟု ပြောသည်။

နိုင်ငံတကာ သုတေသန အဖွဲ့အစည်း တခုဖြစ်သော On Device Research က Viber သည် မြန်မာနိုင်ငံတွင် သုံးစွဲသူ အများဆုံး မိုဘိုင်း အပလီကေးရှင်း တခုဖြစ်သည်ဟု ပြီးခဲ့သည့် ဇွန်လအတွင်းက ထုတ်ပြန်ခဲ့ကြောင်း Viber က ဆိုသည်။

မြန်မာနိုင်ငံတွင် လူမှုဆက်သွယ်ရေး ကွန်ရက်အတွက် မိုးဘိုင်း စာပို့စနစ်နှင့် အသုံးပြုမှုများကို viber ဖြင့် အသုံးပြုမှုနည်းတူ ဖေ့ဘွတ်စ်(facebook) ၊ ဂျီတော့(Gtalk) တို့ကိုလည်း ယှဉ်တွဲ အသုံးပြုကြသည်။

viber က ပေးသည့် ၀န်ဆောင်မှုမျိုးစုံကို လွယ်ကူစွာ အသုံးပြုနိုင်သည့်အတွက် အဆင်ပြေကြောင်းကို viber ကို ပုံမှန်သုံးစွဲသူ မရမ်းကုန်း မြို့နယ်တွင် နေထိုင်သည့် ကိုသီဟက “ Viber က free message service လည်းဖြစ်၊ အကောင့်ဖွင့်ရတာလည်း ဖုန်းနံပါတ်ရှိရုံနဲ့ ဖွင့်ဖို့ လွယ်တယ်။ ဖုန်းနဲ့ ရိုးရိုးမက်ဆေ့ ပို့ရင် တစောင်ကို ၂၅ ကျပ် ပေးရတယ်၊ Viber နဲ့ဆို တမိနစ်အတွင်း သုံးလေးငါးစောင် ရိုက်ပို့လို့ ရတဲ့အပြင် ကုန်ကျစရိတ်လည်း သက်သာတယ်။ မက်ဆေ့မှာ အသံဖိုင်လည်း ပို့ရတယ်၊ ပုံလည်းပို့လို့ ရတယ်၊ သူငယ်ချင်းတွေစုပြီး အုပ်စုဖွဲ့ ချက်တင်တွေ လုပ်လို့ရတယ်။ဒီဟာတွေကို လွယ်ကူစွာနဲ့ အလကား သုံးလို့ရတဲ့အတွက် အများကြီး အဆင်ပြေတယ်”ဟု ပြောသည်။

Viber သုံးစွဲမှုသည် နိုင်ငံတကာ ဖုန်းခေါ်ဆိုမှုကိုပါ လွယ်ကူစွာ ၀န်ဆောင်မှု ပေးထားသည့်အပေါ် လက်ရှိသုံးစွဲနေသူ မအေးအေးက “ Viber ကို ပိုသဘောကျတာက နိုင်ငံတကာ ဖုန်းခေါ်ဆိုမှုကို အင်တာနက် အသုံးပြုတဲ့ နှုန်းထားအတိုင်း ပေးရလို့ပါ။ Viber က ဂျီတော့၊ ဖေ့စ်ဘုတ်တွေထက် လိုင်းအားပိုကောင်းပြီး တိုက်ရိုက်စကားပြောလို့ အဆင်ပြေတယ်။ ဖုန်းပြောသလိုပဲ ခံစားရတယ်။ ဒါကြောင့် ၃ ရက်ခြားလောက် နိုင်ငံခြားဖုန်း ခေါ်ဖို့ ပုံမှန်သုံးဖြစ်တယ်”ဟု ဆိုသည်။

မြန်မာနိုင်ငံတွင် ဆက်သွယ်ရေးလုပ်ငန်း လုပ်ကိုင်ခွင့် လိုင်စင်ရခဲ့သည့် Telenor ကုမ္ပဏီက ယခုနှစ် ဧပြီလအတွင်းက Facebook တွင် ပြုလုပ်ခဲ့သော အွန်လိုင်း သုတေသန ပြုချက်အရ သုံးပုံနှစ်ပုံခန့်သော မိုဘိုင်းဖုန်း သုံးစွဲသူတို့သည် ၎င်းတို့အနှစ်သက်ဆုံး စာပို့စနစ် အပ်ပလီကေးရှင်းအဖြစ် Viber ကို ရွေးချယ်ခဲ့ကြသည်ဟု Viber ၏ သတင်းထုတ်ပြန်ချက်တွင် ဖော်ပြထားသည်။

Viber ကို လက်ရှိအချိန်တွင် နိုင်ငံပေါင်း ၁၉၃ နိုင်ငံက အသုံးပြုနေကြပြီး သုံးစွဲသူဦးရေ စုစုပေါင်း သန်း ၃၇၀ ကျော် ရှိကြောင်း Viber က သတင်းထုတ်ပြန် ထားသည်။

Viber သည် ကမ္ဘာ့ထိပ်တန်း မိုဘိုင်း စာပို့စနစ်နှင့် VoIP ကုမ္ပဏီ ဖြစ်သော Viber Media ကုမ္ပဏီ၏ ထုတ်ကုန်တခု ဖြစ်ပြီး ယူကေ၊ ဗီယက်နမ်၊ ရုရှား၊ ဖိလစ်ပိုင်၊ ဂျပန်၊ အစ္စရေး၊ အိန္ဒိယ၊ ဆိုက်ပရပ်စ်၊ ဘရာဇီးနှင့် ဘယ်လာရုစ် နိုင်ငံတို့တွင် ရုံးခွဲများ ဖွင့်လှစ်ထားသည်။

Viber သည် လက်ရှိတွင် အခမဲ့ ဆက်သွယ်နိုင်ရန် အကောင်းဆုံး ၀န်ဆောင်မှုပေးလျက်ရှိပြီး သုံးစွဲသူများ အနေဖြင့် အခမဲ့ စာပို့စနစ်များ၊ ရုပ်ပြောင်စတစ်ကာများ၊ ဓာတ်ပုံ၊ ဗီဒီယိုနှင့် ပုံကြမ်းများနှင့် အခြားဒေတာ အချက်အလက်များ ပေးပို့နိုင်သည့် အပလီကေးရှင်း တခုဖြစ်သည်။