“စည်ပင်ဌာနက ပေးတဲ့ရေ မရတာ ၃ လ လောက် ရှိပြီ။ ရေမရတော့ လူတွေ အတော်လေး ဒုက္ခရောက် ကြတယ်။ ကျနော်တို့ ဆိုင်အတွက် အပြင်ကနေ ရေ၀ယ်သုံး ရတယ်။ ရေဖိုးတင် တလကို ၂ သောင်းကနေ ၃ သောင်းလောက် ကုန်တော့ အမြတ်တွေက ရေဖိုးထဲမှာ ပါကုန်တယ်” ဟု ဟားခါးမြို့ရှိ စားသောက်ဆိုင်ပိုင်ရှင် တဦးက ဧရာဝတီသို့ ပြောသည်။
ပြည်နယ်အစိုးရ ရုံးစိုက်ရာ ဟားခါးမြို့တွင်းရှိ လမ်းများကို တိုးချဲ့ဖောက်လုပ်မှုကြောင့် မြေအောက် ရေပိုက်များ ပျက်စီးကုန်သည့် အတွက် စည်ပင်ဌာနမှ ရေပေးဝေမှု ရပ်ဆိုင်းထားရာ လချီကြာမြင့်လာသောကြောင့် ဟားခါးမြို့ခံ အများစုမှာ သောက်သုံးရေ အတွက် ပုဂ္ဂလိက ရေရောင်းသူများထံမှ ၀ယ်ယူသုံးစွဲ နေရသည်ဟု ပြောဆိုကြသည်။
စည်ပင်ဌာနမှ ပေးဝေသော ရေ မရသဖြင့် မြို့လူဦးရေ ၅၀ ရာခိုင်နှုန်းကျော်မှာ သောက်သုံးရေ အခက်အခဲများ ရင်ဆိုင်နေရကြောင်း မြို့ခံများက ပြောသည်။ ဟားခါးမြို့တွင် ပြည်တော်သာ၊ ဈေးဟောင်း၊ ဈေးသစ် စသဖြင့် ရပ်ကွက်ကြီး ၆ ခု ရှိပြီး၊ အိမ်ခြေ ၃၀၀၀ ကျော် ရှိကာ၊ လူဦးရေ ၁၅၀၀၀ ကျော် အခြေချ နေထိုင်ကြောင်း သိရသည်။
စီးပွားရေး သမားများသည် ဟားခါးမြို့နှင့် ၇ မိုင်ခန့်ဝေးသည့် သီးမြစ်သို့ ကားများဖြင့် သွားရောက် ရေသယ်ကာ ဟားခါးမြို့၌ ပြန်လည် ရောင်းချကြသောကြောင့် မြို့ခံများမှာ သောက်သုံးရေ ရရှိရေး အတွက် ရေ ၁ ပုံးလျှင် ၂၀၀ ကျပ်၊ ပုဂ္ဂလိက ရေသယ်ယာဉ် တစီးလျှင် ၁၂၀၀၀ ကျပ်နှုန်းဖြင့် ၀ယ်ယူသုံးစွဲ နေရသည်ဟု ပြောဆိုကြသည်။
ပျက်စီးသွားသည့် ရေပိုက်များ ပြုပြင်နေမှုနှင့် ပတ်သတ်ပြီး ဟားခါးမြို့နယ် စည်ပင်သာယာ ဌာနမှူး ဦးအောင်ထွန်းလင်းက “ဟားခါးမြို့တွင်း လမ်းတွေ တိုးချဲ့တော့ လမ်းဧရိယာမှာ ပါတဲ့ ရေပိုက်တွေ ပျက်သွားတယ်။ ဒါကြောင့် လမ်းချဲ့တဲ့ နေရာတွေ ရေမပေးနိုင်ပါဘူး။ ဇန်န၀ါရီလ ၁၅ ရက် နောက်ဆုံးထားပြီး ရေပိုက်တွေ ပြန်ဆက်ဖို့နဲ့ ရေတွေ ပြန်လည် ပေးဝေသွားဖို့ စီမံထားပါတယ်” ဟု ဧရာဝတီကို ပြောသည်။
စည်ပင်ရေ မရသဖြင့် ရေ၀ယ်သုံးသူများ ရှိသလို ၇ မိုင်ခန့် ဝေးသည့် သီးမြစ်သို့ ဆိုင်ကယ်များဖြင့် သွားရောက်၍ သောက်သုံးရေ ခပ်ယူကြသူများ ရှိနေကြောင်း သိရသည်။
“၀ယ်နိုင်တဲ့ လူကလည်း ရေကို ၀ယ်သုံးကြတယ်။ မ၀ယ်နိုင်တဲ့ လူတွေက သီးမြစ်ကို ဆိုင်ကယ်ပေါ် ရေပုံးတွေတင်ပြီး ရေသွားခပ်ကြတယ်။ အ၀တ်တွေဆိုလည်း သီးမြစ်ကို ယူသွားပြီး ဟိုမှာ လျှော်ကြတယ်။ တခါတလေ အချိန်မရလို့ သီးမြစ် မသွားနိုင်ရင်တော့ ရေ ၁ ပုံး ၂၀၀ နဲ့ ၀ယ်သုံး ရတာပေါ့” ဟု ချင်းဦးစီး ရပ်ကွက်နေ ဌာနဆိုင်ရာ ၀န်ထမ်းတဦးက ပြောသည်။
ဟားခါးမြို့အား စည်ပင်ဌာနက ရေပေးဝေမှု စနစ်မှာ မြို့အနီးရှိ ရေဝေရေလဲ စိမ့်စမ်းနေရာ ၈ ခုမှ ထွက်ရှိလာသည့် စိမ့်စမ်းရေများကို ရပ်ကွက်အလိုက် ရေပေးဝေရေး ကော်မတီများ ဖွဲ့စည်း၍ ပေးဝေနေခြင်း ဖြစ်သည်။
သစ်ခုတ်မှုများခြင်းနှင့် တောင်ယာ စိုက်ပျိုးမှုများကြောင့် သစ်တောပြုန်းတီးသည့် အတွက် ၂၀၀၀ ခုနှစ် နောက်ပိုင်းတွင် ရေဝေရေလဲ နေရာများမှ ရေထွက်ရှိမှု နည်းပါးလာပြီး နှစ်စဉ် မတ်၊ ဧပြီနှင့် မေလ ရောက်တိုင်း ဟားခါးမြို့၌ ရေပြတ်လပ်မှု အခက်အခဲများ ကြုံတွေ့လာရကြောင်း စည်ပင်ဌာနမှူး ဦးအောင်ထွန်းလင်းက ဆက်ပြောသည်။
“ဒီဒေသမှာ ရေ၀ဲရေလဲတွေကနေ ရေထွက်တာ နည်းလာပြီး စမ်းရေတွေလည်း တနှစ်ထက်တနှစ် ခမ်းလာတယ်။ အဓိကကတော့ ထင်းလောင်စာ အတွက် သစ်ပင်တွေ ခုတ်တယ်။ သစ်ပင်တွေ ခုတ်ပြီး တောင်ယာ စိုက်ပျိုးတာတွေ ကြောင့်ပေါ့။ ရေရရှိမှုက ၃၅ ရာခိုင်နှုန်းလောက် လျော့သွားပြီး ၆၅ ရာခိုင်နှုန်းလောက်ပဲ ရတော့တယ်။ ဒါကြောင့် ဟားခါးမှာ မတ်၊ ဧပြီ၊ မေလတွေဆို ရေရှားတာက နှစ်တိုင်းလိုလို ကြုံနေရတယ်”ဟု ၎င်းက ဆိုသည်။
ရေရှားပါးမှု ပြဿနာ ဖြေရှင်းရန် အတွက် ချင်းပြည်နယ် အစိုးရက ဟားခါးမြို့ အနီးရှိ သီးမြစ်တွင် ဆည်ဆောက်ပြီး ရေပေးဝေမည့် ဟားခါးမြို့ ရေပေးဝေရေး စီမံကိန်းကို ယခုနှစ် ဧပြီလ အတွင်းက စတင် အကောင်အထည်ဖော် တည်ဆောက်နေပြီး စီမံကိန်း ကုန်ကျငွေ တန်ဖိုးမှာ ကျပ်ငွေ ၈ ဘီလီလံ (ကျပ်သန်း ၈၀၀၀) ရှိကြောင်း သိရသည်။
No comments:
Post a Comment