ပြည်သူ့လွှတ်တော် ကိုယ်စားလှယ် ဦးဖေသန်းက ရွေးကောက်ခံ ကိုယ်စားလှယ်များ မဲဆွယ် စည်းရုံးရာတွင် လွှတ်တော်၊ အစိုးရ၊ ဌာနဆိုင်ရာနှင့် တပ်မတော်တို့ကို ဝေဖန်ပြောဆိုခွင့် ရှိ၊ မရှိ ဖေဖော်ဝါရီ ၂၄ ရက်တွင် ပြုလုပ်သည့် ပြည်သူ့လွှတ်တော် အစည်းအဝေး၌ မေးမြန်းရာတွင် ရွေးကောက်ပွဲ ကော်မရှင်က ထိုသို့ ပြန်လည် ဖြေကြားခဲ့ခြင်း ဖြစ်သည်။
ရွေးကောက်ပွဲကော်မရှင်မှ ဦးဝင်းကိုက “ ရွေးကောက်ပွဲ အောင်နိုင်ရေးအတွက် စည်းရုံးခွင့် ရှိတာအမှန်ပါပဲ၊ ဒါပေမယ့် စည်းရုံးလှုပ်ရှားတဲ့အခါ တရားဥပဒေနဲ့ အညီ လေးစားလိုက်နာ စည်းရုံးရပါမယ်” ဟု ပြောသည်။
ထိုစည်းမျဉ်းစည်းကမ်းမှာ ၂၀၁၄ ခုနှစ်တွင် ထုတ်ပြန်ထားသည့် ရွေးကောက်ခံ ကိုယ်စားလှယ်များ မဲဆွယ် စည်းရုံးရာတွင် လိုက်နာရမည့် အချက်များ ဖြစ်သည်။
စည်းမျဉ်းစည်းကမ်းထဲတွင် ဘာသာရေးကို နိုင်ငံရေးအတွက် အလွဲသုံးစားလုပ်ခြင်း၊ ငြိမ်းချမ်းစွာ ပညာ သင်ကြားရေးကို ထိခိုက်ပျက်ပြားစေရန် လုပ်ဆောင်ခြင်း၊ နိုင်ငံ့ ၀န်ထမ်းများအား အစိုးရကို ဆန့်ကျင်ဆန္ဒပြစေရန် လှုံ့ဆော် သွေးထိုးခြင်းတို့ မပြုလုပ်ရဟူ၍လည်း ပါရှိသည်။
အထက်ပါ စည်းမျဉ်းစည်းကမ်းများမှာ ရွေးကောက်ပွဲကာလတွင် နည်းဥပဒေများအဖြစ် ပြဌာန်းကာ ရွေးကောက်ခံ ကိုယ်စားလှယ်များ လိုက်နာရမည်ဖြစ်ပြီး လိုက်နာခြင်းမရှိလျှင် တွေ့ရှိသူက နီးစပ်ရာ ရဲစခန်းသို့ တိုင်ကြားနိုင်ပြီး တရားစွဲဆိုမှုများ ပြုနိုင်သည်ဟု ၂၀၁၄ ခုနှစ်က ထုတ်ပြန်ချက်တွင် ဖော်ပြထားသည်။
အဆိုပါ အချက်များမှာ စစ်အစိုးရ စနစ်အောက်တွင် ပြုလုပ်ခဲ့သည့် ၂၀၁၀ ခုနှစ်၊ အထွေထွေ ရွေးကောက်ပွဲတွင် ချမှတ်ခဲ့သည့် အချက်များနှင့်လည်း အတူတူပင် ဖြစ်သည်။
မေးခွန်းမေးမြန်းခဲ့သူ ဦးဖေသန်းက ရွေးကောက်ခံ ကိုယ်စားလှယ်များမှ ပြည်သူများကို စည်းရုံးရေး ဆင်းရာတွင် လယ်သမားများ၏ လယ်သိမ်းယာသိမ်း ပြဿနာများ၌ တပ်မတော်က သိမ်းထားသည့်ကိစ္စများကို ပြောလျှင် တပ်မတော်ဂုဏ်သိက္ခာ ထိခိုက်စေမှု၊ လုပ်ခလစာကိစ္စ ပြောဆိုလျှင် အလုပ်သမားများကို ဆူပူစေရန် စည်းရုံးစေမှု၊ အမျိုးသားပညာရေး ဥပဒေကိစ္စပြောလျှင် အေးဆေးစွာ စာသင်နေသည့် ကလေးများအား ဆူပူအောင် နှောင့်ယှက်သည်ဟူသည့် အမှုများဖြင့် တရားစွဲဆိုမှုများ ရှိလာနိုင်ပါသည်ဟု ဆိုသည်။
ဆက်လက်၍ ဦးဖေသန်းက “ကျနော်တို့ရွေးကောက်ခံ ကိုယ်စားလှယ်တွေကို ဥပဒေတခုနဲ့ အကျဉ်းအကျပ်ထဲ ရောက်အောင် ချည်နှောင်ထားတာက ကျနော်တို့ ဘာမှ လုပ်လို့ရမယ်လို့ မမြင်ပါဘူး။ တရားစွဲခံရဖို့ အများကြီးရှိပါတယ်” ဟု လွှတ်တော် အစည်းအဝေးတွင် ပြောဆိုသည်။
အထက်ပါ ကန့်သတ်ချက်များမှာ ရွေးကောက်ပွဲ စည်းရုံးရေးကာလတွင် ကိုယ်စားလှယ်များနှင့် ပြည်သူလူထု အကြား လက်ရှိဖြစ်ပေါ်နေသည့် နိုင်ငံအရေး အခြေအနေနှင့် ပြည်တွင်း အခြေအနေ အရပ်ရပ်ကို အမှန်မပြောနိုင်အောင် တားဆီး ပိတ်ပင်ထားခြင်းလည်း ဖြစ်သည်ဟု လွှတ်တော် အမတ်များက ဧရာဝတီကို ပြောသည်။
သို့သော် ၂၀၁၅ ခုနှစ်၊ အထွေထွေ ရွေးကောက်ပွဲတွင် ပြည်ထောင်စု ရွေးကောက်ပွဲ ကော်မရှင်မှ ချမှတ်သည့် စည်းမျဉ်းစည်းကမ်းများ၊ နိုင်ငံရေးပါတီများ လိုက်နာရမည့် စည်းမျဉ်းစည်းကမ်းများ၊ နည်းဥပဒေများမှာ မထွက်ရှိသေးပေ။
No comments:
Post a Comment