ကချင်စစ်ပွဲနှင့် သူတို့၏ အမြင်

မဇ္ဈိမသတင်းဌာန

ကချင်ပြည်နယ်တွင် ဖြစ်ပွားနေသည့် မြန်မာ့တပ်မတော်နှင့် ကချင်လွတ်မြောက်ရေး တပ်မတော် KIA တို့အကြား ဇွန်လ ၉ ရက်နေ့ကစတင်၍ ဖြစ်ပွားနေသည့် တိုက်ပွဲအပေါ် ထင်ပေါ်ကျော်ကြားသူများ၊ အမျိုးသား ဒီမိုကရေစီ အဖွဲ့ချုပ် အပါအဝင်နိုင်ငံရေး ပါတီများ၏ သဘောထားတို့ကို မဇ္ဈိမက ဆက်သွယ်မေးမြန်းထားခြင်းဖြစ်သည်။ ဒီကဏ္ဍကို ထပ်မံတင်ဆက်သွားမှာလည်းဖြစ်သည်။

ကေဂျာနူး
(အဆိုတော်)

အဲဒါတော့ ကျမကို မမေးရင်ကောင်းတယ်ထင်တယ်နော်။ကျမ မဖြေချင်ဘူး။

“ ကျမတို့ရဲ့ အလုပ်နိုင်ဆုံးဆန္ဒဖြင့်တဲ့ ဆုတောင်ခြင်းဖြင့် ပါဝင်တယ်ပေါ့နော်၊ အားလုံးငြိမ်းချမ်းဖို့ ကျမတို့ရဲ့ စိတ်ထဲမှာရှိတယ် ပေါ့နော်။ ငြိမ်းချမ်းရေးအတွက် ဘုရားသခင်ဆီမှာ ဆုတောင်း ပါဝင်လျှက်ရှိပါတယ်၊
အေးချမ်းတဲ့နည်းနဲ့ အားလုံးဖြေရှင်းနိုင်ပါစေလို့ပဲ ကျမက ဆုတောင်းတယ်”
--------------------------------------------------------------------------------

ဇေယျာသော်
(အဆိုတော်)

“ အဓိကက ဘယ်နိုင်ငံမှာမဆို ပြည်တွင်းစစ်တခု ဖြစ်နေမယ်ဆိုရင် ဘယ်အစိုးရပဲ အုပ်ချုပ်သည် ဖြစ်နေပါစေ၊ အဲဒီနိုင်ငံတိုးတက်မူက မရှိနိုင်ပါဘူး၊အဲဒါကြောင့် ပြည်တွင်းစစ်မဖြစ်အောင်အတွက် နိုင်ငံရေးနည်းနဲ့ ညှိနှိုင်း ဖြေရှင်းတာကို ကျနော်ယုံကြည်ပါတယ်၊ နိုင်ငံရေးနည်းနဲ့ ညှိုနှိုင်းဖြေရှင်းဖို့ကို ကျနော်နှစ်ဘက်စလုံး တိုက်တွန်းပါတယ်။”

“ လက်ရှိ တိုက်ပွဲတွေဖြစ်ပွားနေတဲ့နေရာတွေမှာ အဓိက အထိနာကို ကျနော်ပြည်သူတွေလို့ပဲ မြင်ပါတယ်၊ တဘက်နဲ့ တဘက် တိုက်ကြ ခိုက်ကြပြီဆိုရင် ပထမဦးဆုံး ထိခိုက်ခံစားရတာ ပြည်သူတွေပါ၊ အဲဒီအတွက်ကြောင့် အမှန်တကယ် တာဝန်ရှိတဲ့သူတွေအနေနဲ့ ပြည်သူတွေရဲ့ အသက်အိုးအိမ်စည်းစိမ်တွေ လုံခြုံမူအတွက် ညှိနှိုးဖြေရှင်းတဲ့နည်းနဲ့ ဖြေရှင်းဖို့ ကျနော်တိုက်တွန်းပါတယ်လို့”
--------------------------------------------------------------------------------

ဆရာကြီး ဒဂုန်တာရာ
(စာရေးဆရာ)

"အဲဒါတွေ ကြားရတာ စိတ်မကောင်းဘူးဗျ၊ တွေ့ဆုံဆွေးနွေး စေ့စပ်ညှိနှိုင်းပြီးတော့ လုပ်ကြဖို့ အဲဒီနည်း တနည်းပဲ အကောင်းဆုံးရှိတယ် ဒီအတိုင်းဆိုရင်တော့ တယောက်နဲ့တယောက်က ရန်ဆောင်နေကြဖို့များတယ် သူတို့အသံတွေမှန်းကြည့်ရတာ ရန်ဆောင်ချင်တဲ့ သဘောရှိတယ်။ တွေ့ဆုံဆွေးနွေးတဲ့နည်းကတော့ ငြိမ်းချမ်းတဲ့နည်းပဲလေ အဲဒါကောင်းတဲ့နည်းပဲ"

--------------------------------------------------------------------------------

ဆရာ အော်ပီကျယ်
(ကာတွန်းဆရာ)

"သမ္မတပြောတာတွေတော့ ရှိတာပေါ့ဗျာ Good government ပေါ့ဗျာ၊ Good government ဆိုတာက အခုလို ရန်ဖြစ်တာတွေ၊ စစ်တိုက်နေတာတွေက good မှ မgood တာပဲ"

--------------------------------------------------------------------------------

ဆရာကြီး အောင်သင်း
(စာရေးဆရာ)

"အရေးကြီးဆုံးအချက်က နှစ်ဘက်လုံးသောလူတွေက ယုံကြည်မှုရှိရမယ် နှစ်ဘက်လုံးသောလူတွေက ပညာရှိလာရမယ် ငြိမ်းချမ်းချင်တဲ့စိတ်ရှိလာရမယ် အတူတူပူးပေါင်းပြီး ငါတို့ အတူတူရှင်းကြမယ် အဲဒီလိုစိတ်ရှိရမယ်၊ အဓိက က အာဏာကွ၊ အာဏာလိုချင်လို့ ဒီလိုဖြစ်နေကြတာ"

--------------------------------------------------------------------------------

ဦးအုန်းကြိုင်
(NLD ပြန်ကြားရေးတာဝန်ခံ)

“လက်နက်နဲ့ ဖြေရှင်းတဲ့ကိစ္စကို ကျနော်တို့ သဘောမတူပါဘူး။ အထွေထွေအတွင်းရေးမှူးကော၊ ဒုတိယ ဥက္ကဋ္ဌကြီး ဦးတင်ဦးကကော၊ ဆရာဦးဝင်းတင်တို့လည်း ပြည်တွင်းမှာဖြစ်နေတဲ့ ပဋိပက္ခတွေအားလုံးကို ငြိမ်းချမ်းတဲ့နည်းနဲ့ ဖြေရှင်းဖို့ လိုလားတယ်။ အခြေအနေတွေ တင်းမာလာတဲ့အတွက် စိုးရိမ်သောက ရောက်ရတယ်လို့ ကျနော်တို့ အကြိမ်ပေါင်းများစွာ ပြောထားပြီးပါပြီ။ ကျနော်တို့ NLD ကျင့်သုံးနေ တာကလည်း နိုင်ငံရေးပြဿနာတွေ အားလုံးကို ငြိမ်းချမ်းစွာ နိုင်ငံရေးနည်းလမ်းနဲ့ ဖြေရှင်းဖို့ ဖြစ်ပါတယ်”

--------------------------------------------------------------------------------

ဦးခင်မောင်ဆွေ
(NDF နိုင်ငံရေးဦးဆောင်ကော်မတီဝင်)

“လက်နက်ကိုင်နည်းနဲ့ ပြည်တွင်းစစ်ကို ဖြေရှင်းနေတဲ့ကိစ္စက လွတ်လပ်ရေးပြီးကတည်းက ဖြေရှင်းတာ မရနိုင်သေးပါဘူး။ ပြည်တွင်းစစ်ဖြစ်တယ်ဆိုတာ အင်မတန်ဆိုးဝါးပါတယ်။ သေနတ်တချက်ဖောက်ရင် ကျည်ဆံနှစ်တောင့်ဖိုး ကုန်ကျပါတယ်။ ဟိုဘက်ကပစ်တာ၊ ဒီဘက်က ပစ်တာတွေက မြန်မာနိုင်ငံရဲ့ သယံဇာတတွေက နေပြီးတော့ ကျခံရတဲ့ တန်ဖိုးတွေပါ။ အဲဒီတော့ ပြည်တွင်းစစ်ချုပ်ငြိမ်းရေးဟာ လူမှုဘဝ စီးပွားတိုးတက်ရေးကို အဟန့် အတားဖြစ်တယ်ဆိုတာကလည်းပဲ အမှန်ပဲ”

--------------------------------------------------------------------------------

ဦးခက်ထိန်နန်
(စည်းလုံးညီညွတ်ရေးနှင့် ဒီမိုကရေစီပါတီ)

“ကိုယ့်ပြည်နယ် ကိုယ့်ဒေသ နောက်ဆုံး ကိုယ့်နိုင်ငံပေါ့လေ။ အဲဒါကိုတော့ ငြိမ်းငြိမ်းချမ်းချမ်း ဖြစ်ချင်တယ်။ ငြိမ်းငြိမ်းချမ်းချမ်း ဖြစ်ချင်တယ်ဆိုတာက ထာဝရငြိမ်းချမ်းရေး လိုလားတာပေါ့လေ။ အဲဒါကြောင့် အရင်ကလည်းပဲ ငြိမ်းချမ်းရေးကို ပြောခဲ့တာပဲ။ ရွေးကောက်ပွဲပြီးတော့လည်း ငြိမ်းချမ်းရေးကိုပဲ အလေးထားပြီး ပြောခဲ့တယ်”