၂၅ ပေ၊ ၅၈ ပေ ရှိသည့် မြေကွက်ပေါင်း ၇၀၀ ကျော်ကို ၁၉၉၄ ခုနှစ်တွင် မြို့ရွာနှင့် အိုးအိမ် ဖွံ့ဖြိုးရေး ဦးစီးဌာနကလျော်ကြေးငွေ မပေးဘဲ သိမ်းယူခဲ့၍ မေလ ၃ ရက်နေ့ နေ့လည်တွင် တောင်းဆိုဆန္ဒပြကြခြင်းဖြစ်သည်။
၁၉၉၄ ခုနှစ် မတိုင်မီက ထိုမြေကွက်များကို ကုန်သွယ်ရေးဝန်ကြီးဌာနနှင့် ဟိုတယ်နှင့် ခရီးသွားလာရေး ဝန်ကြီးဌာနတို့မှ မြေငှားရမ်းခကို လစဉ်ကြေးပေး၍ ငှားရမ်းခဲ့ပြီး သိမ်းယူပြီးခဲ့သည့် အချိန်မှစ၍ ငှားရမ်းခ ရရှိခြင်း မရှိတော့သဖြင့် ၎င်းတို့၏ မြေကွက်များကို ပြန်မပေးပါက ကာလပေါက်ဈေးအတိုင်း လျော်ကြေးငွေပေးရန်မြေပိုင်ရှင်တို့က လိုလားကြသည်။
“ကျနော်တို့ မြေကွက်တွေကို ပြန်မပေးရင် နေပါ။ မြေကွက်တော့ ပြန်မပေးဘူးကွာ၊ မင်းတို့ ကာလပေါက်ဈေးပဲလျော်ကြေးယူ ဆိုရင်တောင် ကျနော်တို့ ကျေနပ်တယ်။ အခုဟာက မြေကွက်လည်း မပေးဘူး။ လျော်ကြေးလည်း မပေးဘူး။ သူတို့ ဘာကြောင့် ထိန်းသိမ်းထားတာလဲ။ သူတို့မိသားစု ကောင်းစားရေးလား” ဟု ဆန္ဒပြပွဲ ထုတ်ဖေါ်မှုတွင်ဦးဆောင် သူ ဦးမြင့်အောင် က ပြောသည်။
ယခုကဲ့သို့ တောင်းဆိုဆန္ဒပြမှုမှာ ဒုတိယအကြိမ်ဖြစ်ပြီး ပထမအကြိမ်ကို ဧပြီလ ၂ ရက်ကလည်း မြို့တော်ခန်းမရှေ့တွင် ပြုလုပ်ခဲ့ကြသေးသည်။
“ကျနော်တို့ကတော့ ဆက်လုပ်မှာပဲ။ မရရင် နေပြည်တော်ကို တက်မယ်။ အဲဒါမှမရရင် ဥပဒေအရ တရားစွဲဆိုမယ်” ဟု မြေကွက်ပိုင်ရှင် ဦးမြင့်အောင် က ဆိုသည်။
ဂရမ် မြေကွက်ပိုင်ရှင်တဦးဖြစ်သည့် ဦးတင်ဦး ကလည်း “အခုက မတရား သိမ်းထားတာကိုး။ ပိုင်ဆိုင်ကြောင်း စာရွက်တွေက အပြည့်အစုံ အကုန်ရှိတယ်။ ဂရမ် မူရင်းလည်း ရှိတယ်” ဟု ဆိုသည်။
လက်ရှိတွင် ၎င်းတို့၏ မြေကွက်အချို့၌ ဆောက်လုပ်ရေး ကုမ္ပဏီကြီးများဖြစ်သည့် ယုဇန၊ ဝါဝါဝင်း၊ ဧဒင်တို့က အိမ်ယာများ စတင် ဆောက်လုပ်နေကြောင်းလည်း မြေကွက်ပိုင်ရှင်များက ဆိုသည်။
ထိုအကြောင်းကို သမ္မတ အပါအဝင် အမျိုးသားလွှတ်တော်၊ ပြည်သူ့လွှတ်တော်၊ လယ်ယာမြေနှင့် အခြားမြေများ သိမ်းဆည်းခံရမှု စုံစမ်းစစ်ဆေးရေးကော်မတီ၊ တရားဥပဒေစိုးမိုးရေးနှင့် တည်ငြိမ်အေးချမ်းရေး ကော်မတီနှင့် အိုးအိမ်ဦးစီးဌာနသို့လည်း အကြောင်းကြားစာများ ပေးပို့ထားပြီး ဖြစ်ကြောင်းလည်း ဆန္ဒပြသူများက ပြောသည်။
တောင်းဆိုသူများမှာ ဆန္ဒထုတ်ဖေါ်ရန် တရားဝင်ခွင့်ပြုချက် ရရှိထားပြီး အိုးအိမ်ဦးစီးဌာနရုံးရှေ့ မှတဆင့် ၎င်းတို့မြေကွက်များရှိသည့် ဗိုလ်တထောင်မြို့နယ်၊ အမှတ် ၃ ရပ်ကွက်အထိ ချီတက် ဆန္ဒပြခဲ့ကြခြင်း ဖြစ်သည်။
No comments:
Post a Comment