ABC
မြန်မာနိုင်ငံမှာ စီးပွားရေးဖွံ့ဖြိုးမှုဟာ အသင့်အတင့်အရှိအဟုန်ရနေဖြစ်တဲ့အတွက် နောင်မှာဆက်ပြီးဖွံ့ဖြိုးလာဦးမယ်လို့ အပြည်ပြည်ဆိုင်ရာငွေကြေးရန်ပုံငွေအဖွဲ့ IMF က ခန့်မှန်းပြောဆိုလိုက်ပါတယ်။
မြန်မာနိုင်ငံရဲ့ စီးပွားရေးဖွံ့ဖြိုးမှုဟာ ပြီးခဲ့တဲ့ဘဏ္ဍာနှစ်အတွင်းမှာ ဖွံ့ဖြိုးမှုနှုန်း ၆.၅ ရာခိုင်နှုန်းရှိခဲ့သလို ၂၀၁၃ - ၂၀၁၄ ဘဏ္ဍာနှစ်မှာ ၆.၇၅ ရာခိုင်နှုန်းထပ်ပြီး ကြီးထွားလာမယ်လို့ IMF က မနေ့က ခန့်မှန်းချက် ထုတ်ပြန်လိုက်တာဖြစ်ပါတယ်။ မကြာသေးခင်က မြန်မာနိုင်ငံကို သွားရောက်လေ့လာပြီးနောက်မှာ အခုလိုထုတ်ပြန်ခဲ့တာ ဖြစ်ပါတယ်။
သဘာဝဓါတ်ငွေ့ရှာဖွေဖေါ်ထုတ်မှုတွေနဲ့ တခြားနိုင်ငံခြားရင်းနှီးမြုပ်နှံမှုတွေကြောင့် စီးပွားရေးဖွံ့ဖြိုးမှုနှုန်း ကြီးထွားလာတာဖြစ်တယ်လို့ ဆိုပါတယ်။ နိုင်ငံအတွင်း ဘဏ္ဍာရေးလိုငွေပြမှုနဲ့ နိုင်ငံခြားတိုက်ရိုက်ရင်းနှီးမြုပ်နှံမှုကရလာတဲ့အကျိုးအမြတ်ကို ချိန်ထိုးနှိုင်းဆကြည့်ရင် အကျိုးအမြတ်ဖက်က သာလိမ့်မယ်လို့လည်း ဆိုပါတယ်။
မြန်မာနိုင်ငံမှာ နိုင်ငံခြားငွေလဲလှယ်မှုနှုန်းထားတွေ နဲ့ ရင်းနှီးမြုပ်နှံမှုဆိုင်ရာဥပဒေတွေ ပြောင်းလဲသတ်မှတ်ခဲ့တာသာမက အခွန်တိုးမြှင့်ကောက်ခံမှုတွေကပါ ရလာတာတွေကို အချိန်ကာလကြာမြင့်စွာ လစ်လျူရှုထားခဲ့တဲ့ ကျန်းမာရေးနဲ့ ပညာရေးကဏ္ဍတွေအတွက် သုံးစွဲနိုင်လာမယ်လို့ သုံးသပ်မှုတွေ ရှိနေပါတယ်။
ပြီးခဲ့တဲ့ တစ်ပတ်က မြန်မာအစိုးရသတင်းဌာနတွေရဲ့ ထုတ်ပြန်ချက်တွေအရ ပြည်တွင်းနဲ့ နိုင်ငံခြားရင်းနှီးမြုပ်နှံမှုဟာ တစ်နှစ်အတွင်းမှာပဲ ငါးဆအထိတိုးလာခဲ့တာဖြစ်ပြီး ၂၀၁၂ - ၂၀၁၃ ဘဏ္ဍာနှစ်အတွင်း လုပ်ငန်းအမျိုးအစား ၉၄ မျိုးအတွက် နိုင်ငံခြားရင်းနှီးမြုပ်နှံမှုတန်ဖိုး ဒေါ်လာသန်း ၁,၄၀၀ (သန်းတစ်ထောင့်လေးရာ) ရှိခဲ့တယ်လို့ AFP သတင်းဌာနက ဖေါ်ပြခဲ့ပါတယ်။
လာမယ့်ဘဏ္ဍနှစ်အတွင်းမှာ မြန်မာအစိုးရအနေနဲ့ ဗဟိုဘဏ်နဲ့ပတ်သက်တဲ့ ဥပဒေသတ်မှတ်မှုပြုတာအပါအဝင် ဖွံ့ဖြိုးမှုဆိုင်ရာတွေ ဆက်လုပ်သွားမယ်လို့ မျှော်လင့်တဲ့အကြောင်း IMF ရဲ့ ထုတ်ပြန်ချက်မှာပါရှိပါတယ်။ မြန်မာနိုင်ငံအခြေစိုက်ရုံးခန်း မကြာခင်ဖွင့်လှစ်သွားဖို့လည်း ရှိနေပြီး မြန်မာနိုင်ငံကို နည်းပညာဆိုင်ရာအထောက်အပံ့နဲ့ အကူအညီတွေဆက်ပေးသွားမယ်လို့လည်း ဆိုပါတယ်။
No comments:
Post a Comment