အခုနှစ် ကျောင်းဖွင့်ချိန် ရန်ကုန်မြို့ရဲ့ ကားလမ်းပိတ်ဆို့မှုက အရင်ထက် ပိုမို ဆိုးရွားလာတဲ့အပြင် ခုံးကျော်တံတား စီမံကိန်းတွေနဲ့ မြို့တွင်းမှာ ရှိတဲ့ ကျောင်းတချို့ရှေ့မှာ စည်းကမ်းမဲ့ ကားရပ်နားမှုတွေ ရှိတာကြောင့် ခရီးသွားလာရေး အခက်အခဲတွေ အများကြီး ကြုံနေရတယ်လို့ နေ့စဉ် ရုံးတက်ရုံးဆင်း လုပ်နေကြရတဲ့ ခရီးသည်တွေက ပြောဆိုကြပါတယ်။
၂၀၁၂ ခုနှစ်အတွင်း အစိုးရက ကားသစ်တွေ တင်သွင်းခွင့် ပြုလိုက်ပြီးတဲ့ နောက်ပိုင်းမှာ ရန်ကုန်မြို့ ယာဉ်ကျောပိတ်ဆို့မှု ဆိုးရွာခဲ့ပြီး လက်ရှိ ကျောင်းဖွင့်ချိန် မိုးရာသီမှာတော့ အဆိုးဆုံးအဆင့်ကို ရောက်နေပြီလို့ ခရီးသည်တွေက ပြောကြတာ ဖြစ်ပါတယ်။
အစိုးရက ရန်ကုန်မြို့ရဲ့ ယာဉ်ကျော ကျပ်တည်းမှုပြဿနာကို ဖြေရှင်းနိုင်ဖို့ အများပြည်သူ သယ်ယူပို့ဆောင်ရေး အာဏာပိုင် အဖွဲ့ကို မေလ ၁၄ ရက်နေ့မှာ ဖွဲ့စည်းကာ ယာဉ်ကြော ပိတ်ဆို့မှုတွေ မဖြစ်နိုင်အောင် အစီအစဉ်တွေ ဆောင်ရွက်မှာ ဖြစ်တယ် လို့ ကြေညာခဲ့ပြီး သိပ်မကြာခင် မေလ ၂၉ ရက်မှာ ပြန်လည် ဖျက်သိမ်းပြီလို့ ကြေညာခဲ့တာကြောင့် အစိုးရနဲ့ တာဝန် ရှိသူတွေက လူဦးရေ ထူထပ်ပြီး ကားလမ်းပိတ်ဆို့မှုတွေ အများဆုံးကြုံတွေ့နေရတဲ့ ပြဿနာကို ဘယ်လို ဖြေရှင်းမယ်ဆိုတာ ပြည်သူလူထုက သိချင်နေကြတာပါ။
ရန်ကုန်မြို့တွင်းမှာ ခရီးသည်တင်ယာဉ်လိုင်းတွေ အများဆုံးပြေးဆွဲနေတဲ့ လမ်းတွေက ကမ္ဘာအေး ဘုရားလမ်း၊ ပြည်လမ်း၊ ဘုရင့်နောင်လမ်း၊ အင်းစိန်လမ်း၊ တာမွေအဝိုင်း၊ ဗားကရာလမ်း၊ ကမ်းနားလမ်းတွေ ဖြစ်ပါတယ်။ အဲဒီ လမ်းတွေပေါ်က မီးပွိုင့်တွေ ဖြစ်တဲ့ ချော်တွင်းကုန်း မီးပွိုင့်၊ ရွှေဂုံတိုင် မီးပွိုင့်၊ ဦးထောင်ဘို အဝိုင်း၊ လှည်းတန်းမီးပွိုင့်နဲ့ ဟံသာဝတီ အဝိုင်း၊ မြေနီကုန်း မီးပွိုင့်နဲ့ တာမွေအဝိုင်းတွေကပဲ နေ့စဉ် လမ်းပိတ်ဆို့မှု အများဆုံးဖြစ်နေတော့ ပုံမှန် အလုပ်ဆင်းနေကြတဲ့ ဝန်ထမ်းတွေအတွက် အခက်အခဲတွေ အများကြီး ရှိလာတယ်လို့ သိရတယ်။
ခုံးကျော်တံတား တည်ဆောက်ရေး လုပ်ငန်းခွင်တွေက ပိတ်ဆို့တာ တကြောင်း၊ ကျောင်းကြိုပို့ ယာဉ်တွေ စည်းကမ်းမဲ့ ရပ်နားတာ တကြောင်းကြောင့် ရုံးတက်ချိန်ဖြစ်တဲ့ နံနက် ၈ နာရီကနေ ၁၁ နာရီ ဝန်းကျင်နဲ့ ရုံးဆင်းချိန် ဖြစ်တဲ့ ညနေ ၅ နာရီ ဝန်းကျင်မှာ ဘုရင့်နောင်မီးပွိုင့် ၊ ရွှေဂုံတိုင်မီးပွိုင့်၊ ချော်တွင်းကုန်း မီးပွိုင့်နဲ့ အထက ၁ ဒဂုံ ကျောင်းနားမှာရှိတဲ့ ဦးထောင်ဘို အဝိုင်းနဲ့ အလံပြဘုရားလမ်းပေါ်မှာ ယာဉ်ကျော ပိတ်ဆို့မှုတွေ အများဆုံးဖြစ်နေတာ တွေ့ရပါတယ်။
ရန်ကုန်မြို့တွင်းမှာရှိ တဲ့ ဒဂုံမြို့နယ်၊ လသာမြို့နယ်၊ ကမာရွတ်မြို့နယ်တွေက ကျောင်းတွေမှာ ငွေကြေး တတ်နိုင်တဲ့ မိသားစုဝင် ကလေးတွေ အများဆုံး တက်ရောက်ကြတဲ့ အခြေခံ ပညာကျောင်းတွေ တည်ရှိပြီး ကားရပ်နားကွင်း လုံလောက်စွာ မရှိတဲ့ အစိုးရစာသင်ကျောင်း တွေကြောင့် နှစ်စဉ် ကျောင်းဖွင့် ရာသီရောက်တိုင်း ယာဉ်ကြော ပိတ်ဆို့မှု အများဆုံး ဖြစ်ပေါ်နေတာပါ။
“ဒဂုံ ၁ ကျောင်းလာပို့တဲ့၊ ကြိုတဲ့ ကားတွေက လမ်းမတွေပေါ်အထိ နေရာယူကြတယ်၊ ကျောင်းတက်ချိန် ဆင်းချိန်တွေ ဆိုရင် လမ်းပိတ် သွားတယ်၊ ခရီးသည်တင် ကားတွေက ရပ်ထားရတယ်၊ ကျောင်းကားတွေဆိုပြီး အခွင့်ထူးခံ ပုံစံမျိုးကို ဖြစ်နေကြ တာ” လို့ ခရေပင်ရိပ်မွန် – ဆူးလေ ပြေးဆွဲနေတဲ့ ၄၃ ယာဉ်လိုင်းက ယာဉ်မောင်းတဦးက သူ့အမြင်ကို ပြောပြပါတယ်။
ရန်ကုန်မြို့တော် စည်ပင်သာယာရေး ကော်မတီကလည်း အထက ၁ ဒဂုံကျောင်းအနီးမှာ ယာဉ်ရပ်နား စခန်းငယ်တခု ဆောက်လုပ် ပေးသွားဖို့ စီစဉ်နေပြီး ယာဉ်ထိန်းရဲတွေကတော့ ကျောင်းသား မိဘတွေနဲ့ ကျောင်းကားတွေအတွက် ယာဉ်စည်းကမ်း ပညာပေးကာလ အဖြစ် ဆောင်ရွက်နေတယ်လို့ သိရပါတယ်။
“ပုံမှန်အတိုင်းဆိုရင် လမ်းပေါ်မှာ သွားနေရတဲ့ အချိန်က နာရီဝက်ထက် မပိုသင့်ဘူး၊ အစိုးရ လမ်းပိတ်ဆို့မှုတွေကို အရင် မဖြေရှင်းဘဲနဲ့ ကားသစ်တွေ အကန့်အသတ်မဲ့ တင်သွင်းခွင့် ပေးလိုက်တော့ လမ်းပြဿနာက ဘယ်လိုမှ ဖြေရှင်းဖို့ မလွယ်တော့ဘူး” လို့ ရန်ကုန် အဝေးသင်တက္ကသိုလ်က အငြိမ်းစား ပါမောက္ခတဦးက ပြောပါတယ်။
နေ့စဉ်နဲ့အမျှ ရုံးတက်ရုံးဆင်း အလုပ်သွား အလုပ်ပြန်လုပ်နေတဲ့ ဝန်ထမ်း အများစုကတော့ ကျောင်းတွေပြန်ဖွင့်ရင် လမ်းပိတ်မှာကို ကြိုတွေးပြီး စိုးရိမ်ခဲ့ကြသလို ခရီးသည်တင် ယာဉ်တွေကလည်း မြို့ထဲက ကျောင်းတွေရဲ့ ကျောင်းတက်ချိန် ဆင်းချိန်တွေမှာ ကွင်းရှောင်ပြီး မောင်းလို့ရမယ့် လမ်းတွေနဲ့ ခုံးကျော်တံတား စီမံကိန်းတွေကို ရှောင်ပြီး မောင်းလို့ရမယ့် လမ်းကို ရွေးပြီး အဆင်ပြေသလို မောင်းနေကြတော့ တာပါ။
ရန်ကုန်တိုင်း ဒေသကြီး ယာဉ်စည်းကမ်း ထိန်းသိမ်းရေး ရဲတပ်ဖွဲ့ ဒုတိယ ရဲမှူးကြီး ဦးသာဌေးကတော့ လမ်းပိတ်ဆို့မှုဖြစ်အောင် လုပ်နေတဲ့ ကျောင်းကားတွေ အပါအဝင် ဖြူနီကြား မျဉ်းအတွင်း ရပ်ထားတဲ့ စည်းကမ်းမဲ့ ကားတွေကို အရေးယူနိုင်အောင် လတ်တလောမှာ ပညာပေး ကာလအဖြစ် ဆောင်ရွက်နေတယ်လို့ ဆိုပါတယ်။
“ပညာပေးပြီးရင်တော့ ကျောင်းကားတင် မဟုတ်ဘူး၊ အားလုံးကို ယာဉ်စည်းကမ်း လမ်းစည်းကမ်း ဥပဒေအရ အရေးယူမယ်။ ကျွန်တော်တို့ ဘက်ကတော့ စည်းကမ်းဖောက်တဲ့ ယာဉ်တွေကို အရေးယူတာနဲ့ လမ်းရှင်းတာ အတွက် တာဝန်ယူ ဖြေရှင်းတယ်” လို့ သူက ပြောပါတယ်။
လမ်းပိတ်ဆို့မှုတွေ အများဆုံးဖြစ်နေတဲ့ ရွှေဂုံတိုင်နဲ့ ဘုရင့်နောင် ဂုံးကျော်တံတား စီမံကိန်းတွေမှာလည်း လမ်းရှင်းစနစ် အတွက် ယာဉ်ထိန်းရဲတွေ အပြည့် တာဝန်ယူနေပေမယ့် လမ်းကြော တကြောင်းတည်း ဖြစ်နေတာ၊ လုပ်ငန်း ဆောင်ရွက်မှုပိုင်း တွေက ထပ်ပြီး တိုးချဲ့နေရတာတွေကြောင့် လမ်းပိတ်ဆို့မှုတွေ ပိုပြီး ဖြစ်နေရတာပါလို့ ယာဉ်ထိန်းရဲ တပ်ဖွဲ့ ဒုရဲမှူးကြီး ဦးသာဌေးက ရှင်းပြပါတယ်။
ယာဉ်ထိန်းတွေ အနေနဲ့ကတော့ လမ်းပိတ်ဆို့မှု ဖြစ်တဲ့နေရာမှာ လမ်းရှင်းပေးဖို့နဲ့ စည်းကမ်း ဖောက်ဖျက်တဲ့ ယာဉ်တွေကို အရေးယူဖို့က လွဲပြီး ကျန်တဲ့ ကိစ္စတွေကိုတော့ ဖြေရှင်းပေးလို့ မရဘူးလို့ သိရပါတယ်။
ကျောင်းဖွင့်ချိန် ယာဉ်ကျောပိတ်ဆို့မှု ပြဿနာကို တနည်းတဖုံ ပြေလည်စေဖို့ ကျောင်းကားပြေးဆွဲမှုတွေ လုပ်သင့်တဲ့ အကြောင်း၊ ကျောင်းကား ပြေးဆွဲချင်သူတွေ အနေနဲ့ လျှောက်ထားနိုင်တဲ့ အကြောင်း မထသက မကြာသေးခင်က ပြောဆိုခဲ့ပါ သေးတယ်။
ဒါပေမယ့် ကျောင်းကားတွေ ဘယ်လိုပဲ ပြေးဆွဲနေပေမယ့် ငွေကြေးတတ်နိုင်သူ၊ ကိုယ်ပိုင်ကားစီးနိုင်သူတွေက ကျောင်းကား မစီးဘဲ ကိုယ်ပိုင်ကားတွေနဲ့ပဲ ကျောင်းပို့၊ ကျောင်းကြို လုပ်နေမယ် ဆိုရင် ဒီနည်းလမ်းဟာလည်း ထိရောက်မှာ မဟုတ်တဲ့ အကြောင်း၊ ကျောင်းကားတွေ ပြေးဆွဲပြီး ကျောင်းသားတိုင်း ကျောင်းကားစီးဖို့ ပညာပေးနိုင်မှသာ ဒီနည်းလမ်းနဲ့ ကျောင်းဖွင့်ချိန် ယာဉ်ကျောပိတ်ဆို့မှုကို အနည်းငယ် ဖြေလျှော့နိုင်မှာ ဖြစ်တဲ့အကြောင်း ရန်ကုန်မြို့နေ ပြည်သူတချို့က ဆိုပါတယ်။
လှည်းတန်း ခုံးကျော်တံတား စီမံကိန်းကြီး ဆောင်ရွက်ခဲ့စဉ်ကလည်း နေ့စဉ် လမ်းပိတ်ဆို့မှုတွေကြောင့် ခရီးသွားသူတွေ ဒုက္ခ ရောက်ခဲ့ရ ပါသေးတယ်။
တံတားကြီး ပြီးသွားလို့ ဖြတ်သန်းလို့ ရပြန်တော့လည်း ပြည်လမ်းဘက် အခြမ်းက သွားလာရေး အဆင်ပြေသွားပေမယ့် တံတားအောက်ဘက်က ဖြတ်ရတဲ့ အင်းစိန်လမ်းဘက် အခြမ်းကတော့ အရင်အတိုင်း ကား ပိတ်ဆို့မှု ရှိနေတဲ့အပြင် ဟံသာဝတီအဝိုင်းမှာ အဝိုင်းပတ် ယာဉ်တွေနဲ့ ပြည်လမ်းအတိုင်း မောင်းတဲ့ ယာဉ်တွေအားလုံး လမ်းပိတ်ဆို့ တာတွေက နေ့စဉ် ဖြစ်နေတယ်လို့ မရမ်းကုန်းမြို့နယ်ကနေလာပြီး မြေနီကုန်း ဒဂုံစင်တာမှာ အရောင်းဝန်ထမ်း အဖြစ် လုပ်ကိုင်နေတဲ့ မနှင်းပွင့်အေးက ပြောပြပါတယ်။
“ယာဉ်ကြောတွေ ပိတ်လို့ဆိုပြီး တက္ကစီ ငှားစီးရင် ပိုက်ဆံပိုပေးရတယ်၊ လမ်းအရမ်းပိတ်တဲ့ နေရာတွေဆို ငှားရင်တောင် မလိုက်ဘူး။ သူတို့အတွက်လည်း ဆီပိုကုန်တယ်၊ ပို့ရတာနဲ့ မတန်ဘူးလို့ ပြောကြတယ်” ဟု မနှင်းပွင့်အေးက ဆိုပါတယ်။
ရန်ကုန်မြို့မှာ မီးပွိုင့် ၁၅၄ ပွိုင့်ရှိပြီး နားခိုတဲမရှိလို့ ယာဉ်ထိန်းရဲ လုံခြုံရေး မရှိတဲ့ ပွိုင့်က ၂၂ ပွိုင့်ရှိပါတယ်၊ ဒါကြောင့် ကျန်တဲ့ ပွိုင့်တွေနဲ့ အဓိက ယာဉ်ကြောပိတ်ဆို့တဲ့ လမ်းတွေက ကျောင်းတွေမှာ ယာဉ်ထိန်းရဲ အင်အားကို ပိုပြီး ချထားတယ်လို့ သိရပါတယ်။
No comments:
Post a Comment